Ayaz Orucov oğlunun 8 güllə atması, Əsabil Qasımovun
biznes qalmaqalı, Fərhad Qəribovun Kürdəmir bazarındakı aksiyası və
Rüstəm Xəlilov passivliyinə görə növbəti seçkiyə buraxılmayacaqlar

Növbəti seçkilərdə mandat ala bilməyəcək 4 biznesmen deputat haqqında sensasion xəbərlər var. Deputatlar - Ayaz Orucov, Əsabil Qasımov, Fərhad Qəribov və Rüstəm Xəlilov növbəti seçkilərdə parlamentdə görünməyəcək.
“Gündəm-xəbər”ə məlumat verən qaynağın sözlərinə görə, hər 4 deputat “ÇP” ilə yadda qalıb və hakimiyyətin siyahısından silinib. Mənbənin qeydlərindən belə nəticə hasil olur ki, onlar çarmıxa çəkilə bilər. Biznesi hesabına millət vəkili olan bu 4 deputat 5 illik fəaliyyətdə iqtidara başağrısı olublar.
Hakimiyyət ona problem yaradan deputatlarla üzülüşmək qərarına gəlib.
Növbəti seçkilərdə adıçəkilən deputatlar parlamentə buraxılmayacaq. Mənbə iddia edir ki, Ayaz Orucov oğlunun 8 güllə atması, Əsabil Qasımovun biznes qalmaqalı, Fərhad Qəribovun Kürdəmir bazarındakı aksiyası və Rüstəm Xəlilov passivliyinə görə növbəti seçkidə mandatsız qalacaqlar.
Xəbərdə o da bildirilir ki, hakimiyyət gələn il özünə yaxın olan “müstəqillər”in parlamentdə daha çox yer qazanmasını istəyir. Bununla parlamentin bir partiyanın orqanına çevrilməsi ittihamlarının qarşısını almağı planlaşdırırlar.
Məlumatdan aydın olur ki, indi deputat mandatı daşıyanlardan xeylisi növbəti parlament seçkisinə buraxılmayacaq. Həmin şəxslərin sırasına hakimiyyətin gözündən düşən, son vaxtlar iqtidarın yanaşması baxımından bir sıra “ÇP”lərə yol verən, müəyyən qruplaşmalara bağlı, yaşlı, artıq 3-4 dəfə deputat olmuş şəxslər və daha hakimiyyətin işinə yarımayanlar daxildir. Ona görə də parlamentin hazırkı tərkibinin təxminən yarıdan çoxu dəyişəcək.
Xüsusilə də, yuxarıda adını qeyd etdiyimiz deputatların “qələmi qırılıb”. Onlar 5 illik fəaliyyətdə hakimiyyətə qarşı problem yaradıblar. Fərhad Qəribovun oğlunun Kürdəmir bazarında yer haqlarını artırmasına görə ticarətçilər ayağa qalxmışdı. Özü də seçkilər ərəfəsində və hakimiyyət çox gərgin dönəm yaşayırdı. Ardınca məmur balalarının özbaşına hərəkətləri barədə davamlı kompromatlar yayılan ərəfədə, Ayaz Orucovun oğlunun maşından silah atəş açması məlum oldu.
Əsabil Qasımov isə biznes siyasətində xətalara yol verib. Eyni zamanda Sabirabaddan olan Rüstəm Xəlilov heç nə ilə yadda qalmayıb. Parlamentdə susmaq funksiyasını yerinə yetirən bu deputat da hakimiyyət üçün passiv və yararsızdır.
Ümumiyyətlə, Rüstəm Xəlilovla Əsabil Qasımovu passiv millət vəkili sayılırlar. Parlamentdəki biznesmen deputatlardandırlar. Qasımov deputat yox, “Karat” şirkətinin sahibi kimi tanınır. Qeyd edək ki, deputatın bina tikən qardaşı vətəndaşları aldadıb.
“Yenilik” Mənzil Tikinti Kooperativinə (MTK) məxsus Bakı şəhəri, Xətai rayonu Neapol küçəsi 2348-ci məhəllədəki binanın sakinləri alqı-satqı müqaviləsinin tələblərinə hələ də əməl edilməməsindən şikayətçi idilər. Hakimiyyət adı tez-tez fırıldaqda, korrupsiyada, şikayətdə hallanan deputatların siyahısını hazırlayır və dosyeyə uyğun addımlar atılacaq.
Yerli sakinlərin söylədiyinə görə, onlar hələ ki deputatlarının indiyə qədər parlamentdə çıxışını, ya hansısa məsələ ətrafında müzakirəyə qoşulmağını eşitməyib. Mandat Əsabil Qasımova isə heç də ucuz başa gəlməyib.
2010-cu ilin parlament seçkilərinə start verilən vaxt 3 milyon manat həddində vəsait ödədiyi iddia edilir. Onun qələbəsinin təmin edilməsi üçün sabiq deputat, müsavatçı İltizam Əkbərlinin namizədliyinin müdafiəsi üçün verilmiş seçici imzaları etibarsız hesab edilib.
Beləliklə, deputatlar - Ayaz Orucov, Əsabil Qasımov, Fərhad Qəribov və Rüstəm Xəlilov növbəti seçkilərdə bizneslə yenə məşğul olacaqlar. Onlara toxunulmazlıq statusu verən mandat isə əllərindən alınacaq. Bu iddialarla bağlı adıkeçən şəxslərin mövqeyini dərc etməyə hazırıq.
Rafiq Qara