“Brizol” göz klinikasında 5 yaşlı uşaq əməliyyatdan sağ çıxmadı; klinika rəhbərliyi faktı ört-basdır etməyə çalışır, iş prinsipi: əvvəl pul, sonra tibbi yardım

Bakının “Brizol” göz klinikası 5 yaşlı uşağın əməliyyat zamanı ölümünü ictimaiyyətdən gizlətməyə çalışır. “Gündəm-xəbər”ə daxil olan məlumata görə, klinikada Qusar sakini, 5 yaşlı Yusif İbrahimovun əməliyyat masasında ölməsi ört-basdır olunmağa cəhd olunur.

Klinikanın ün meneceri Təranə suallara ətraflı cavab verməkdən yayınaraq, bu işin klinikanın daxili məsələsi olduğunu deyib. Hətta hadisəni “yoluna qoyacaqlarını” (?) da əlavə edib.

Klinika nümayəndəsi qısa şəkildə bildirib ki, 5 yaşlı Yusif klinikaya daxil olarkən onun problemləri var imiş: “Həkim onu əməliyyat edib və evə yola salıb. Yəni, ölüm faktı burda qeydə alınmayıb”.

Təranə xanım uşağı hansı həkimin əməliyyat etdiyini də açıqlamayıb. Menecer öz soyadını belə təqdim etməyib. Qəbul şöbəsindən bildirilib ki, nə mətbuatla əlaqəli şəxs, nə də baş həkim iş yerindədir.

Nərimanov Rayon Prokurorluğunun növbətçi hissəsindən bildirilib ki, ölüm faktını müstəntiq Orxan Rüstəmov araşdırır. Qeyd edək ki, çəpgözlük səbəbindən əməliyyata qaldırılan uşaq həkim səhlənkarlığının qurbanı olub.

Ona anesteziyanın düzgün verilmədiyi bildirilir. Hadisə iki gün əvvəl baş verib. Ancaq bu özəl klinikalarda ilk ölüm faktı deyil. Bu günə kimi özəl tibb ocaqlarında onlarla belə hal qeydə alınıb. Nazirlik isə məsələni “araşdırır” deməklə kifayətlənib.

Yalnız “Medi Sina” klinikasının bağlanmasını istisna nümunə göstərmək olar. Son illərdə isə klinikalarda səhlənkarlıq, ölüm faktları ilə yanaşı qiymətlər də əl yandırır. Azərbaycanda fəaliyyət göstərən özəl tibbi klinikalarda əhaliyə göstərilən tibbi xidmətin qiymət tariflərinin çox yüksək olması barədə mövzuya mətbuatda mütəmadi olaraq məlumatlar dərc olunur.

Amma təəssüflə qeyd edirik ki, özəl klinikalarda olan sözügedən problemlər hələ də istənilən səviyyədə həllini tapmayıb, əksinə, vətəndaşlardan bu sahədən gələn şikayətlər artmaqda davam edir. Təbii ki, bu problemlərdən söz açılanda ilk olaraq gündəmə olaylara təsir edəcək və nəzarət etməli olan səlahiyyətli hökumət strukturları gəlir. Təbii ki, özəl klinikalardakı nöqsanlardan söhbət gedirsə, Səhiyyə Nazirliyinin bu məsələlər müdaxiləsi qaçılmazdır.

Ölkədə əhalinin ən sıx məskunlaşdığı paytaxt Bakıda, demək olar ki, hər il bir neçə özəl klinika fəaliyyətə başlayır. Türkiyə kimi böyük dövlətdə özəl xəstəxanaların sayı 400-dən çox olduğu halda, Azərbaycanda bu rəqəm 500-ü keçib.

Gəlirli sahə olduğu üçün "yağışdan sonra çıxan göbələklər"də qiymətlər od tutub yanır. Burada məqsəd keyfiyyətli tibbi xidmət göstərmək olsa da əsas hədəf daha çox gəlir əldə etməkdir. Ölkədə tibbi fəaliyyətə başlamaq üçün lisenziyanın qiyməti 5500 manatdır.

Hər halda, milyonlar qazanmaq üçün bu məbləği ödəmək imkanlı şəxslər üçün elə də böyük pul deyil. Dövlət xəstəxanalarında əhalinin sosial vəziyyəti müəyyən mənada düşünülsə də özəl klinikalarda buna əhəmiyyət verilmir.

İş prinsipi belə qurulub: əvvəl pul, sonra tibbi yardım. Keyfiyyətli xidmətə və xəstənin sağalmasına isə heç kim zəmanət vermir. Bu vəziyyətə nəzarət isə dövlətin üzərinə düşür.

gundemxeber.az