Vaxtilə ana ölümünə görə işdən çıxarılan Rəşxəndə Şahbazovanın əlində daha bir qadın ölsə də, iş ört-basdır edilib
Bir neçə il bundan əvvəl Bakıda özəl klinikaların yaradılması intensiv şəkil almışdı və hazırda da bu prosesin davam etdiyi diqqəti çəkir. Son dövrlər isə proses rayonlara da sirayət etməyə başlayıb. Artıq əksər rayonlarda özəl klinikaların fəaliyyətə başlaması prosesi diqqəti çəkir.
“Gündəm xəbər”in əldə etdiyi məlumatlarda deyilir ki, rayonlarda yaradılan özəl tibb ocaqlarının bəzilərinin rəhbərləri vaxtilə buraxdıqları səhvlər üzündən işlədikləri yerlərdən çıxarılmış şəxslərdir. Onlardan biri kimi İmişlidə fəaliyyət göstərən “Leyla” Klinikası göstərilir.
Məlumatda deyilir ki, “Leyla” Özəl Klinikasının rəhbəri Rəşxəndə Şahbazova bir zamanlar İmişli Mərkəzi Xəstəxanasında Doğum Şöbəsinin müdiri vəzifəsində çalışıb. 4 il bundan əvvəl isə baş vermiş ana ölümü ilə əlaqədar o, işdən çıxarılıb.
Daxil olan məlumata görə, R.Şahbazovanın işdən çıxarılmasının ardından həyat yoldaşı onun üçün özəl klinika açmaq qərarına gəlib və nəticədə, “Leyla” Klinikası ərsəyə gətirilib. Amma keçmiş şöbə müdirinin keçmiş əməlləri yeni klinikada da davam edib. Mirtalıb Şahbazovun kifayət qədər imkanlı biri olduğunu bildirən mənbələr qeyd edirlər ki, İmişlidə sələmçiliklə məşğul olduğu iddia edilən bu şəxs klinikanı açdıqdan sonra işləri Rəşxəndə xanıma həvalə edib.
“Leyla” Klinikasının əsasən qadın xəstəlikləri və doğum işləri ilə məşğul olduğu deyilir. Bildirilir ki, yeni tibb mərkəzində R.Şahbazovanın səriştəsizliyi üzündən daha bir ölüm hadisəsi də qeydə alınıb. Belə ki, ötən ilin noyabrında həmin klinikaya doğum üçün gətirilən Ruzigar Yavər qızı Behbudova doğuş zamanı dünyasını dəyişib. Hadisədən sonra cinayət işi açılsa da, Mirtalıb Şahbazovun sayəsində iş ört-basdır edilib. Ananın doğuş zamanı ölümü isə gizlədilib və sənədləşdirmədə qeyd olunub ki, guya, R.Behbudova evdə uşaq dünyaya gətirib, halı pisləşdikdən sonra klinikaya aparıb. Və orada bioloji ölüm prosesi baş verib.
Qarşı tərəfin də mövqeyini dərc etməyə hazırıq..
ELMAN