Hacıqabul Elektrik Şəbəkəsinin rəisi Cəlal Kərimov «Nur» restoranını zülmətə qərq edib

Ölkə rəhbərliyi tərəfindən sahibkarlığın inkişafına hər cür diqqət və qayğı göstərilir. Prezident İlham Əliyevin sahibkarları dəstəkləyən fərman və sərəncamları buna bariz nümunədir. Ölkə başçısı yerli və mərkəzi icra hakimiyyəti orqanlarının rəhbər şəxsləri ilə hər görüşündə sahibkarlarla bağlı məsələlərə toxunur, dövlət məmurlarına iş adamlarını incitməməyi tapşırır. Əfsuslar olsun ki, bəzi vəzifəli şəxslər hələ də öz bildiklərini edirlər. Gundelik-baku.com saytına «Azərişıq» ASC-nin Hacıqabul rayon Elektrik Şəbəkəsinin rəisi Cəlal Kərimovla bağlı şikayət daxil olub. Hacıqabul rayonunda yerləşən «Nur» ailəvi istirahət mərkəzinin rəhbərliyindən verilən məlumata görə, şəbəkənin rəisi Cəlal Kərimovun göstərişi əsasında obyektə verilən elektrik enerjisi kəsilib: «Buna səbəb kimi borcu göstərirlər. Düzdür, borcumuz var və ödəyirik. Təxminən 5 manata yaxın borcumuz var idi. 1 ay ərzində həmin borcun 3 min manatını ödədik. Yerdə qalan məbləği isə hissə-hissə ödəyəcəyimizə söz verdik. Buna baxmayaraq, şəbəkə rəisi razılaşmadı və restoranın işığını kəsdilər. Ailəvi istirahət mərkəzində 60 nəfər adam işləyir. Bu o deməkdir ki, bu qədər ailə burdan dolanır. Artıq 1 aya yaxındır ki, işığımızı kəsiblər. Çətin vəziyyətdə qalmışıq. Cəlal Kərimov deyir ki, gedin hara istəyirsiniz şikayət edin. Məgər, bu adam prezidentin sahibkarlarla bağlı dediyi fikirləri eşitmir? Xahiş edirik ki, bu məsələni ictimailəşdirin. Əgər restorana elektrik enerjisinin verilişi bərpa olunmasa, burda işləyənlərin hamısı müvafiq qurumların qarşısında etirazlarını bildirəcəklər». Şikayətlə bağlı Hacıqabul Elektrik Şəbəkəsinin rəisi Cəlal Kərimovun mövqeyini öyrənməyə cəhd göstərsək də, bir nəticəsi olmadı.