ATƏT-in Bakı ofisini bağlamaq istəyirlər; qurum isə özünə
təzyiqləri təkzib edir: “Bakı Ofisində heç bir yoxlama aparılmır”

Hökumət Avropa Birliyi, Avropa Şurası və Qərb səfirliklərinin fəaliyyətindən narahatdır

ATƏT-in baş katibi Lamberto Zanyer martın 15-də Azərbaycana səfər edəcək. Səfər zamanı onun prezident İlham Əliyev, XİN rəhbəri Elmar Məmmədyarovla görüşləri nəzərdə tutulub. Tərəflər ATƏT ilə Azərbaycan arasında ikitərəfli münasibətləri, eləcə də Qarabağ münaqişəsinin nizamlanmasının gedişini müzakirə ediblər. Bu barədə ATƏT-in Bakı ofisinin mətbuat xidmətinin məlumatında deyilir. A.Zanyerin vətəndaş cəmiyyətinin nümayəndələri ilə görüşünün olub-olmayacağı açıqlanmır.
Diplomatik qaynaqlardan əldə etdiyimiz məlumata görə, ATƏT sədrinin səfiri zamanı hökumətin qaldırdığı bir məsələ ciddi müzakirə olunacaq. Əslində A.Zanyerin səfəri də bununla bağlıdır. Mənbə bildirib ki, rəsmi Bakı ATƏT-in Azərbaycanda fəaliyyətinin tamamilə məhdudlaşdırılması, yaxud diplomatik nümayəndəliyin qapadılmasını istəyir. Hökumət beynəlxalq təşkilatın apardığı «zərərli» fəaliyyətdən rahatsız olduğunu bildirib və seçkilərlə bağlı ATƏT müşahidəçilərinin hazırladıqları hesabatları, müxalifət partiyaları ilə birgə keçirilən layihələri əsas gətirib.
Qaynağın məlumatına görə hökumət ATƏT-dən tələb edir ki, həyata keçirdiyi bütün layihələri Azərbaycan Xarici İşlər Nazirliyi ilə razılaşdırmalıdır. Əks halda buna imkan verilməyəcək. Xəbərdə qeyd olunur ki, Rəsmi Bakının bu tələbi ATƏT-in Daimi Şurasında müzakirəyə çıxarılacaq. Əgər Şura Bakı ofisinin fəaliyyətinin tam məhdudlaşdırılması barədə qərar versə, missiya Tiflisdəki fəaliyyətinin həcmini genişləndirəcək. Mənbə ATƏT sədrinin Bakıda keçirdiyi görüşlər zamanı Azərbaycan rəsmilərini inandırmağa çalışacağını, əks halda ölkənin beynəlxalq təşkilatla qarşıdurmaya sürüklənəcəyini qeyd edib.
Qaynaq bildirib ki, Rəsmi Bakı Avropa Birliyinin, Avropa Şurasının Bakı ofislərinin, Qərb səfirliklərinin və təşkilatların fəaliyyətindən də narahatdır. Bu qurumlar ciddi nəzarət altında saxlanılır, onların yerli əlaqələri diqqətlə araşdırılır.
Məlumata görə ATƏT-ə olan təkliflər digər qurumlara da göndərilib, amma bu barədə hələlik müzakirələr başlamayıb. «Əgər Bakının israrları davam edərsə seçkilərdə Azərbaycanada beynəlxalq müşahidə missiyası gəlməyə bilər»-deyə mənbə vurğulayıb.
Xatırladaq ki, martın 9-da Novxanıda ATƏT-in təşkil etdiyi, müxalifətçi gənclərin də qatıldığı seminara polis müdaxiləsi olmuşdu. Gənclər həbs edilərək polis bölməsinə aparlmışdı, tədbirdə müdaxiləyə görə dayandırılmışdı.
Bir neçə gün əvvəl isə jurnalist Eynulla Fətullayev ABŞ-ın Milli Demokratiya İnstitununu (MDİ) Azərbaycanda facebook inqilabı hazırladığı, bu məqsədlə 2 milyon dollar xərcələyəcəyi barədə yazısı rezonans doğurdu. ABŞ səfirliyi və MDİ yazıdakı iddiaları təkzib edərək yalan adlandırmışdılar. Bu barədə «Bizim Yol»a şərh verən tanınmış politoloq Rauf Mirqədirov 2 milyon dolların bankdakı hərəkəti barədə informasiyaların xüsusi xidmət orqanları tərəfindən jurnalistə ötürülməsi versiyasını istisna etməmişdi.
Xatırladaq ki, yaxın keçmişdə ölkə parlamenti müvafiq nanuvericliklərə dəyişiklik edərərk qeyri hökumət təşkilatlarının xarici donorlardan qrant almaq imkanlarını tam nəzarətə götürmüşdü. İkik gün əvvəl Prezidentin təsdiqlədiyi dəyişikliklərə görə qeydiyyatı olmayan QHT-lər hər-hansı layihədə partnoyr olmaq hüququndan belə məhrum edilir. Bütün qrant vəsaitləri barədə dövlət qurumlarına tez-tez məlumatlar verilməlidir, əks halda QHT-ləri ağır cərimə sanksiyaları gözləyir.
Dəyişikliklərin daha bir mühüm aspekti partiyalara və ictimai təşkilatlara verilən ianələrin dövlət nəzarəti altında həyata keçirilməsini təmin etməkdir. Bundan sonra bütün 200 manatdan çox olan bütün ianələr ancaq banklar vasitəsi ilə köçürülə bilər, nağd ötürülmə cinayət məsuliyyəti yaradır.
Ekspertlər seçkiqabağı hökumətin bu pereventiv tədbirlərini müxalifət və ona yaxın təşkilatların xarici, yerli donorlardan maliyyə almaq imkanlarının məhdudlaşdırılması ilə izah edirlər.
Onu da yada salaq ki, Avropa Birliyinin Genişlənmə üzrə komissarı Ştefan Fule tərədaşlıq proqramına qoşulan ölkələrdəki demokratiya tərəfdarlarının onlardan hər cür dəstək alacaqlarını vəd etmişdi. Hökumətin sərt nəzarət tədbirləri bu bəyanatdan qısa müddət sonra həyata keçirilməsi ilə diqqət çəkdi.
Hökumətin son tədbirlərindən, diplomatik qaynağın verdiyi məlumatlardan belə nəticə çıxır ki, hökumət seçkiqabağı ölkədə total nəzarət sistemi bərqərar edəcək. Seçkilərlə bağlı layihələrin həyata keçrilməsinə, müşahidəsinə, alternativ sayıma imkan verilməyəcək. ATƏT-in Bakı Ofisi isə bəyanatla çıxış edib.
Ofisdən APA-ya daxil olan bəyanatda bildirilir ki, bu gün Azərbaycanın bəzi media orqanları ATƏT-in Bakı Ofisi haqqında həqiqətə uyğun olmayan məlumatlar dərc edib.
“Bununla əlaqədar bəyan edirik ki, hazırda ATƏT-in Bakı Ofisində heç bir yoxlama aparılmır. Ofis həmişəki fəaliyyətini, o cümlədən layihələrin icrasını, eləcə də hökumət orqanları və vətəndaş cəmiyyəti təşkilatları ilə əməkdaşlığı davam etdirir.
Digər tərəfdən, media orqanlarının ATƏT-in Bakı Ofisinin mövqeyini öyrənmədən bu cür xəbərləri yayması təəssüf doğurur. Bunun jurnalist etikasına zidd olduğunu bir daha xatırlatmaq istərdik”, - deyə bəyanatda vurğulanır.
Qeyd edək ki, sözü gedən material “Yeni Müsavat” qəzetinin dünənki sayında manşet yazısı olaraq dərc olunub. Əhatəli məqalə mötəbər mənbənin redaksiyaya ötürdüyü məlumatlar əsasında hazırlanıb. Məlumatlı mənbə deyib ki, baş ofis Bakı ofisini ATƏT-in bir neçə gün öncə qalmaqalla, polis müdaxiləsi ilə müşayiət olunan tədbirinin iştirakçılarının tam siyahısını Daxili İşlər Nazirliyinin hansısa idarəsinə ötürməkdə qınayır, ondan izahat tələb edir.
Məsələnin görünən tərəfləri budur ki, hakimiyyət əl-ayağa düşüb və seçki ilində beynəlxalq təşkilatların iş çevirməsindən narahatdır. Hakimiyyət 2013-cü ildən sağ-salamat çıxmaq üçün hətta Qərbə müharibə elan etməyə də hazırdır. Təki devrilməsin...

A.Ağasoy