İsmayıllıda diskotekaların bağlanmasına etiraz olaraq
gənclər icra nümayəndəsinin evini daş-qalaq ediblər; polisə
aparılıb cərimələnənlər var, ölkədə aksiyalar vərdişə çevrilir

Toplum fərq etmir ki, nəyə etiraz edir, əsas etiraz edir. Deməli, hərəkətdədir, narazıdır, fəaldır. Əvvəl pıçıltı ilə danışırlar, sonra eşitdirirlər, narazılıq edirlər, aksiya keçirirlər, həbs olunurlar və müqavimət göstərirlər. Polis etirazçının üzərinə qışqırır və o əvvəlki kimi qorxub qaçıb getmir.

Etirazlar vərdişə çevrilir

Sərt və iti baxışları ilə hakimiyyət nümayəndəsinin qarşısında məğrur dayanır. O psixoloji an qorxu hissinin itirilməsidir. Tibbi terminlə desək insan aqoniyadan çıxıb real həyata tranformasiya olunur. İran inqilabının qələbəsi də kütlələrdə qorxu hissinin dəfn olunması ilə başladı. Azərbaycan toplumu Türkiyə, Yunanıstan, Çili xalqları kimi etiraza vərdiş etməyə alışır.
Etiraz mədəniyyəti, aksiyaların keçirilməsi vərdişə çevrilir. Vay o hökumətin halına ki, ölkəsində toplum həbslərdən, işgəncələrdən qorxu hissini itirə etirazlara vərdiş edə. Azərbaycan etirazların yeni bir fazasına qədəm qoyub və yetərincə təhlil tələb edən bu proseslər hansı istiqamətə cərəyan etdiyini aydınlaşdırmaq qəlizləşib.
Kremlin sərhədyanı ərazilərə qoşun yığması, Qərbin informasiya nüvələri ilə hakimiyyəti silkələməsi, daxilin isə etirazlar burulğanına çevrilməsi analiz imkanlarını məhdudlaşdırır. Axı nə baş verir? Bu ölkədə dəyişikliyi kim istəyir? Xalqmı, Qərbmi yoxsa Kremlmi? Və ikincilərin dəyişikliyi istəyinə səbəb nədir? Rusiyanın və ABŞ-ın hakimiyyətdən nə alıb verəcəyi var ki, bunu həll edə bilmirlər? Labirint suallar və təhlili geniş mülahizə tələb edən məsələlər meydanda cavabsız qalıb.

Diskotekalara azadlıq!

Belədə isə daxildə etirazlar rəngarəng xarakter almağa başlayıb. Məsələn, İsmayıllıda məmur balasının qudurğanlığına cavab olan üsyandan sonra növbəti dəfə etiraz aksiyası keçirilib. Etiraz nümayişi rayonun malakanlar və ləzgilər yaşayan İvanovka kəndində baş verib.
Belə ki, İvanovkada ənənəvi olaraq həftənin bir neçə günü təşkil olunan diskotekaların ləğv edilməsi kənd sakinlərini qəzəbləndirib(!). Etirazçıların tələbləri ilk baxışdan məişət səviyyəsində görünə bilər. Onlar diskotekaların bərpasını tələb edir. Necə deyərlər, “aclıq olsun, kef olsun”. Gəl ki, kəndlilər diskotekaların ləğvinə etiraz edirsə bunun özündə müsbət çalarlar tapmaq lazımdır. Bayaq söylədiyimiz kimi, nəyə etiraz edildiyi önəmli deyil, təki etiraz olsun.
Bəli, kimlərsə diskotekanın bağlanmasına, vaxt olacaq ki, kimlərsə domino oynamağa imkan verilməməsinə, bir başqaları acından ölməyə, bütöv xalq isə ayrı-ayrılıqda müxtəlif problemlərə də olsa mütəşəkkil şəkildə sistemə etiraz etmiş olacaq. Bu günün etirazı isə sabahın başqa etirazlarına cığır açır. Əgər bir qrup İvanovka sakini yığışaraq etirazlarını bildirirsə, tələblərinin məişət səviyyəsində olmasına əhəmiyyət verməməliyik.

İcra nümayəndəsinin evi daş-qalaq olundu

Hətta onlar kənd icra nümayəndəsinin evinə hücum edərək diskotekaların açılmasını tələb ediblər. İcra nümayəndəsinin onlarla görüşə çıxmadığını görən ivanovkalılar onun evini daş-qalaq ediblər.
Hadisədən xəbər tutan polis qüvvələri əraziyə cəlb olunub. Bir neçə aksiya iştirakçısı tutularaq polis bölməsinə aparılıb. Saxlanılanlar azyaşlı olduğu üçün cərimələnərək sərbəst buraxılıblar.
Məsələ ilə bağlı İvanovka kənd icra nümayəndəliyindən bildirilib ki, diskotekaların bağlanmasının əsas səbəbi məktəblilərin buna daha çox maraq göstərməsidir. “Məktəblilər diskotekada əylənərək dərslərini, təhsillərini yaddan çıxarırlar. Biz də belə qərara gəldik ki, diskotekanı müvəqqəti bağlayaq”. Hazırda İvanovkada sakitlik hökm sürür. Bəlkə irəli sürəcəyim mülahizə ironik ya da qeyri- ciddi arqument kimi görsənə bilər.
Fəqət sizə elə gəlmir ki, Kremlin rəsmi Bakıya təzyiqlərinin birə beş artdığı ərəfədə Azərbaycanın ruslar yaşayan kəndində əhalinin ayağa qalxmasında nəsə gizli bir əl var? Bununla qətiyyən etirazçıların əməyini yerə vurmaq və onların siyasi qüvvələrin əlində alət olduğuna işarə vermək niyyətim yoxdur. Kəndlilər doğal haqlarını tələb ediblər.
İvanovka - alınmaz qala
Zatən bu məntiqlə məsələn, islamçılar aksiya keçirəndə İran barmağı axtarırıq, sürücülər ayağa qalxanda Ziya Məmmədova əks-qüvvələr axtarışına çıxırıq, xarici şirkətlərdə işçilər tətil elan edəndə Qərbin təzyiqləri kimi qiymətləndiririk. Hərçənd problemlər var və sadəcə onların böyüməsinə gətirib çıxaran təkanverici güclərin olduğu istisna deyil. İvanokva isə mentalitet baxımdan fərqli yerdir. Yeganə kənddir ki, sovetdən sonra Nikitin kolxozunu qoruyub saxlaya bilib. Kəndlilərin ciddi müqaviməti nəticəsində hökumət buradakı kolxozu ləğv edə bilmədi. İndi də ivanovkalılar Nikitin kolxozundan ailəsinə çörək pulu qazanır. Bu kəndi çapıb talamaq istəyənlərə qarşı ciddi narazılıq var, kəndin kosmetik görünüşü məhv edilir, kolxozun hektarlarla ərazisi mənimsənilib.
Bu qədər problemlərin içində bir də illərdir ənənəvi olaraq diskotekadan istifadə edən gənclərə maneçilik yaratmaq gözlənilən nəticəni verib. Əgər icra nümayəndəsinin evi diskotekanın ləğvinə görə daş-qalaq olunursa, o zaman hökumət papağını qarşısına qoyub düşünməlidir. “Axırıncı aşırım”da deyildiyi kimi, “vəziyyət biz fikirləşdiyimizdən də ağırdır, Abbasqulu bəy”.

Aslan