Postsovet ölkələrində “məxməri inqilablar”ın müəllifi
Qriqoryevs Bakıya buraxılmayacaq; iqtidar ABŞ təşkilatı ilə
tarana gedir, deputat qurumun gələcək fəaliyyətindən danışdı

“Milli Demokratiya İnstitutunun fəaliyyətinə gəldikdə, onlar əvvəllər öz ölkələrində müxalif olan zaman da Azərbaycanda fəaliyyət göstəriblər. Amma öz sələflərindən - o vaxt iqtidarda olan Respublikaçılar Partiyasının maliyyələşdirdiyi və Azərbaycanda fəaliyyət göstərmiş Beynəlxalq Respublikaçılar İnstitutundan fərqli olaraq, onlar balanslaşdırılmış fəaliyyət göstərmirlər”. Deputat Əli Hüseynli ABŞ-ın Milli Demokratiya İnstitutu haqqında danışarkən belə deyib.

Əli Hüseynli: “Radikal müxalifətin təsiri altında...”

Onun sözlərinə görə, beynəlxalq təşkilatlar ölkələrdə insan hüquqları, demokratiya və sair ilə bağlı müxtəlif layihə həyata keçirirlər: “Lakin bütün bu fəaliyyət qarşılıqlı anlaşma, şəffaflıq çərçivəsində, məram və məqsəd aydın olmalıdır. Hər hansı təşkilatın fəaliyyəti ölkədə qarşıdurma yaratmağa, daxili sabitliyi pozmağa, ölkə həyatına müdaxiləyə yönəldikdə isə qarşısı alınmalıdır. Bu istiqamətdə Azərbaycan hüquq-mühafizə orqanlarının mövqeyi başa düşüləndir”.
Deputatın dediyinə görə, MDİ həyata keçirdiyi layihələrdə tərəfli partnyorlar seçib və onlar daha çox radikal siyasi müxalifətin təsiri altında fəaliyyət göstərənlərdir: “MDİ daha çox tərəfli mövqe tutur. Müstəqil yox, daha çox siyasiləşmiş QHT-lərlə layihələr həyata keçiriblər. Eyni zamanda keçirdikləri bu layihələrin özü də tam şəffaf deyil. Baxmayaraq ki, buna görə MDİ təkziblər verir, amma ciddi əsaslandırmır”.
Ə.Hüseynli MDİ-nin gələcək fəaliyyətinə də toxunub: “MDİ Azərbaycan dövlətinin məktubuna, bəyanatına adekvat cavab verməsə, reaksiya olmasa, təbii ki, qanunvericilik çərçivəsində tədbirlər görüləcək. QHT haqqında mövcud qanunvericilik, bundan irəli gələn bütün məsuliyyət növləri, o cümlədən inzibati məsuliyyət növləri tətbiq oluna bilər”.

Qərbə qarşı ikili oyun

Hakimiyyətin MDİ ilə bağlı dərin narahatlığı aşkar şəkildə hiss olunur. Hökumət gerçəkdən də ciddi bir həyəcan təbili çalır və ajiotaj yaradır. Hakimiyyət MDİ ilə bağlı mühüm və səhih məlumat əldə etməsə bu qədər təşkilatın üzərinə getməzdi.
Diqqətçəkən odur ki, proses hakimiyyətin Qərblə münasibətləri yaxşılaşdırmağa çağırışları ilə eyni zamanda baş verir. “Azərbaycan” kimi rəsmi, “Yeni Azərbaycan” kimi hakim partiyanın orqanı olan qəzetlərdə iki zidd xətt yürüdülür.
Birincidə Qərb Azərbaycanda hakimiyyət çevrilişi etməkdə suçlanır, ikincidə isə Qərblə münasibətlərin yaxşılaşdırılmasının vacibliyi təbliğ edilir.
“Hakimiyyət çevrilişinə cəhd” çox ağır ittihamdır. Belə bir ağır ittihamın fonunda Qərblə münasibətlərin yaxşılaşdırılması nə dərəcədə mümkündür? Həm də ortada “Milyarderlər İttifaqı” nümunəsi varkən “Milyarderlər ittifaqı” yarananda hakimiyyət mediası Kremlə qarşı da “çevriliş iddiası” irəli sürmüşdü. İndiyə olan nəticə budur ki, seçki yaxınlaşdıqca iki ölkə arasında münasibətlər sürətlə qırılma nöqtəsinə yaxınlaşır. Həm də prosesin Rusiyanın xeyrinə olması şərti ilə...
MDİ kimi nüfuzlu quruma qarşı ciddi suçlamalar iqtidarı dünyadan təcrid nöqtəsinə daşımırmı? Seçki öncəsi digər dövrlərlə müqayisədə daha ciddi həssaslıq göstərməli olan iqtidar texnoloqları hansı səbəbdən prosesi əngəlləyə bilmir? MDİ-nin Bakı ofisinin rəhbəri A.Qriqoryevsin postsovet məkanında son 15 illik fəaliyyətinə diqqət yetirməyə dəyər.

“Məxməri inqilab”ın “ata”sı

Analitiklər bildirir ki, MDİ olan yerdən inqilab qoxusu gəlir. Bu səbəbdən ötən ilin payızında MDİ-nin Rusiya ofisinin fəaliyyəti də məhdudlaşdırılıb. MDİ Rusiya ofisinin personalını Litvaya köçürüb. Bu bölgədə isə Qərb institutlarının fəaliyyətinə heç bir məhdudiyyət yoxdur. Qurumun Bakı ofisinin rəhbəri A.Qriqoryevs də əslən bu bölgədən, daha dəqiqi Latviyadandır. Filologiya elmləri doktoru olan Qriqoryevsin postsovet məkanında “antirusiya qurşağı”nın yaradılması üçün ciddi əmək sərf etdiyi bildirilir. Onun bu kampaniyaya 90-cı illərdə qatıldığı və bir neçə ildə bu hərəkatın aparıcı şəxslərindən birinə çevrildiyi çoxlarına bəllidir.
A.Qriqoryevs postsovet məkanındakı, demək olar ki, bütün “məxməri inqilab”ların ideya müəllifi kimi təqdim olunur. Gürcüstanda inqilabçılar onu “ata”, Moldovada “baş komandan”, Ukraynada “demokratiya daşıyıcısı”, Rusiyada “əsas mitinq nəzəriyyəçisi” adlandırırdı. Rusiya analitiklərinin fikrincə, Qriqoryevs harada varsa, ətrafında gənclər və milyonlarla dollar mütləq yığışacaq.
A.Qriqoryevs bir neçə aydır Azərbaycanda deyil. Onun Türkiyədə olduğu haqda xəbərlər var. Onun Azərbaycana dönüb-dönməyəcəyi isə ciddi sual altındadır.

Yusif Hüseyn