"Oğru hakimiyyət azad sözü boğmaq istəyir"

Aprelin 17-də Müsavat Partiyasının qərargahında İctimai Palatanın İnsan Haqlarını Müdafiə Komitəsinin təşkilatçılığı ilə ölkədə müstəqil mətbuata qarşı basqılarla bağlı dinləmə keçirilib. Tədbirə İP Koordinasiya Şurasının üzvü, AXCP sədri Əli Kərimli sədrlik edib. AXCP sədri “Eurovision” ərəfəsi azad mediaya qarşı başlanan təzyiqlərin indi daha da ağırlaşdığını diqqətə çatıdırb. O, hazırda Azərbaycanda qanunsuzluqları işıqlandıran, tənqidçi mövqedə duran az sayda media orqanının qaldığını qeyd edərək deyib: “Bu media hakimiyyətin oğurluqlarını ifşa edir, oğru da bu ifşalardan dərs göturub düzəlmək əvəzinə azad sözu boğmaq taktikası seçib”.
Əli Kərimli diqqəti “Azadlıq” və “Yeni Müsavat” qəzetlərinə yönəldərək bildirib ki, bu iki mətbu orqan indiyədək öz gücü hesabına ayaqda qalıb. Amma indi ele vəziyyət yaranıb ki, cəmiyyət bu qəzetləri qorumaq üçün səfərbər olmalıdır. “Azad sözun müdafiəsi ayrı-ayrı fərdlərin və qurumların yox, bütün cəmiyyətin işidir”, - deyə o vurğulayıb.
İP Koordinasiya Şurasının üzvü Vidadi Mirkamal hakimiyyətin hazırda “bütün cəbhə boyu hücuma keçməsindən” bəhs edib. O, müxalifət partiyalarına, gənclər təşkilatlarına, ictimai fəallara, azad mətbuata qarşı paralel hücumlardan danışıb. V.Mirkamal bunu “avtoritarizmin özünü qorumaq cəhdi” kimi dəyərləndirib. O da hakimiyyətin bu hücumunu önləmək üçün cəmiyyətin səfərbər olmasını vacib sayıb.
“Azadlıq” qəzeti baş redaktorunun birinci müavini Rahim Hacıyev bildirib ki, hakimiyyət qəzeti susdurmaq planını addım-addım gerçəkləşdirməkdədir. O, hazırda qəzetin hesabına yenidən həbs qoyulduğu xatırladaraq təzyiqlərin son günlər güclənməsini Əliyevlər ailəsinin offşor şirkətlərlə bağlı beynəlxalq səviyyədə ifşa edilməsini qəzetin işqılandırması ilə əlaqələndirib. R.Hacıyev qeyd edib ki, hər dəfə beynəlxalq medaida dərc olunan ifşaedici məqalələrin çapı hakimiyyəti bir az da aqressivləşdirir. Baş redaktorun birinci müavini “Qasid” firmasının uzun müddətdir "Azadlıq"ın satışdan əldə etdiyi pullarını vermədiyini də xatırladıb və bunu siyasi addım kimi qiymətləndirib. O, bildirib ki, hakimiyyət azad mətbuatı çökdürmək üçün çox tələsir.
“Yeni Müsavat”ın baş redaktoru Rauf Arifoğlu bildirib ki, qəzet son 20 ildə ən ağır günlərini yaşayır. O, “Yeni Müsavat”ın da hesabına həbs qoyulmasının an məsələsi olduğunu diqqətə çatdıraraq, bildirib ki, qəzetin üzərində külli miqdarda cərimələr var. R.Arifoğlu maraqlı bir məlumat da verib. Deyib ki, tədbirə gəldiyi məqamda ANS-in vitse-prezidenti Mirşahin Ağayev ona zəng edərək, “Yeni Müsavat”a qarşı məhkəmə iddialarından geri çəkildiklərini, adlarının azad mətbuata qarşı kampaniyada hallanmasını istəmədiklərini bildirib.
Hüquq müdafiəçisi Vidadi İsgəndərli “Azadlıq”, “Yeni Müsavat” və “Gündəm Xəbər” qəzetlərinin cəmiyyətdəki rolunu yüksək qiymətləndirərək onlara qarşı basqını hakimiyyətin korrupsioner mahiyyəti ilə əlaqələndirib. O, hamını bu qzetləri dəstəkləmə çağırıb.
Tanınmış vəkil Aslan İsmayılov bildirib ki, azad mətbuata basqılar təkcə müxalifətə yox, bütövlükdə cəmiyyətə basqıdır. “Azad medianın olmaması məsələn, mənim vəkil kimi fəaliyyətimi məhdudlaşdıracaq. Çünki ədalətin ortaya çıxmasına azad media məhkəmələrdən də böyük rol oynayır” deyən A.İsmayılov cəmiyyəti azad mediaya güclü dəstək verməyə səsləyib.
AXCP sədrinin müavini Nurəddin Məmmədli bildirib ki, Azərbaycanda söz artıq təsir gücünü itirib. Odur ki, bəyanatlarla, müraciətlərlə basqıya məruz qalan azad mətbuatı qorumaq mümkün olmayacaq. Bunun üçün konkret addımlar atılmalıdır. N.Məmmədli basqıya məruz qalan hər iki qəzəetə kütləvi abunələr yazılmasını, imkan çatan səviyyədə maddi yardım göstərilməsini təklif edib.
Tanınmış vəkil Qurban Məmmədov “hakimiyyət adına mütəşəkkil cinayətkar dəstə qanunsuz vasitələrə ölkədə demokratik təsisatları boğu” deyə bildirib. O, qəzetlərə kəsilən cərimələrin ödənilməsinə qarşı olduğunu söyləyib: “Dövlət adından çıxarılan qərarların 75 faizini dövlət özü icra etmirsə, qəzetlır niyə icra etməlidir?”. Q.Məmmədov sonda problemin baiskarı kimi ölkə başçısı İlham Əliıyevin adını çəkərək deyib ki, problemin həlli onun istefasına nail olmaqdır.
Ziyalı Eldəniz Qulıyev çıxışında mətbuata təzyiqi "azad sözun qəfəsə salınması” kimi dəyərləndirib. Bildirib ki, bu təzyiqlərin kökündə azad medianın dünyaya açılan bir pəncərə olduğunu dərk etmək durur.
İP Koordinasiya Şurasının üzvü Pənah Hüseyn təklif edib ki, demokratik düşərgənin bütün qüvvələrinin iştirakı ilə mitinq keçirilsin, azad mətbuata basqılara da, sərbəst toplaşmaq azadlığının pozulmasına da bütövlükdə düşərgə adından etiraz bildirilsin.
İslam Partiyasının sədr müavini Rövşən Əhmədli azad mətbuatın müdafəsinə qəbul olunacaq bütün formalarda dəstək verməyə hazır olduqlarını deyib. “Bir müddət əvvəl mitinq cərimələri ilə bağlı çox uğurlu 5 qəpik aksiyası keçirildi. İndi də “Azadlıq”ın bank hesabına qoyulan həbslə əlaqədar qəzetin müdafiəsinə həsr edilən manat aksiyası keçirməyə gərək var”, deyə o, əlavə edib.
Müsavat başqanının müşaviri Yeganə Hacıyeva vəziyyətdən çıxış yollarından biri kimi qəzetlərin beynəlxalq təşkilatlarla birbaşa əlaqə saxlayıb, problemi qabartmasını təklif edib.
AXCP Rəyasət Heyətinin üzvü Nemət Əliyev isə ictimai fəaalrı internetdə öz dostlarına fərdi qaydada müraciət edərək qəzetlər üçün kömək istəməyə çağırıb.
Müsavat başqanı İsa Qəmbər vəziyyətlə bağlı bütün media təsisatlarına və hakimiyyətə müraciət edilməsini vacib sayıb. O, media ilə bağlı fəaliyyət göstərən QHT-lərin də hazırkı prinsipial məqamda ortaya mövqe qoymalı olduğunu deyib. İ.Qəmbər ölkədəki orta sahibkarlara da vəziyyətlə bağlı müraciət etməyin vacib olduğunu qeyd edib. Müsavat başqanı beynəlxalq təşkilatları yaranmış vəziyyətə prinsipial münasibət bildirməyə çağırıb. Bildirib ki, Azərbaycan hakimiyyəti üzərinə götürdüyü öhdəlikləri yerinə yetirməyə vadar edilməlidir.
Müzakirələrə AXCP sədri Əli Kərimli yekun vurub. Ə.Kərimli bildirib ki, hər bir böhrana həm də güclənmək üçün imkan kimi baxmaq lazımdır. O, hazırda azad mətbuata olan basqıların demokratik düşərgədən daha sıx inteqrasiya olunmağı, daha da güclənməyi tələb etdiyini deyərək, hər kəsi bu istiqamətdə fəaliyyətə çağırıb. AXCP sədri xalqa da səslənib. Bildirib ki, cəmiyyət ayrı-ayrı müraciətlər gözləmədən, keçirilən bu tədbiri çağırış kimi qəbul etməli və qəzetlərə düşdükləri vəziyyətdən çıxmaqda köməyini əsirgəməməlidir.