“Bütün ləyaqətli insanlar həbsə alınır,
oğru-quldurlar isə dövlət strukturlarına yerləşib”

İctimai Palatanın İctimai Təhqiqat Komissiyası dünən keçmiş rektor Elşad Abdullayevin yaydığı videolar və siyasi qətllərlə bağlı dinləmələr keçirib. Müsavat Partiyası başqanı İsa Qəmbər mövzuya yenidən qayıtmağı onun aktual olması ilə əlaqələndirib. Yayılan videomateriallardan sonra qətl törədilməsinə toxunub. Mövcud rejim 20 il ərzində silsilə qətllər törətməkdə ittiham edilib. Akademik Ziya Bünyadov, Afiyəddin Cəlilov, Şəmsi Rəhimov, Elmar Hüseynov, Rafiq Tağı və s. məhz rejimin qurbanları kimi dəyərləndirilib. E.Abdullayevin yaydığı videolarda vasitəçi kimi adı keçən Sevinc Babayevanın ölümü qətl adlandırılıb.
Şahidlərin aradan götürülməsi “çox şey bilmələri”lə əlqələndirilib. Keçmiş rektorun yaydığı videolarda adları cinayət törətməkdə çəkilən şəxslərin cinayətlərinin Hacı Məmmədovun quldur dəstəsinin törətdiyi cinayətlərdən daha ağır olduğu nəzərə çatdırılıb. İ.Qəmbər keçmiş rektorun yaydığı videomaterialların ölkədəki iqtidarın mahiyyətini ortaya qoyduğunu qeyd edib. “Bu videomaterialalr xalqın təhlükə ilə üzbəüz qaldığını sübut edir və bu təhlükə inidiki hakimiyyətin özüdür və buna görə bu məsələnin üstünə gedirik”, - deyə Müsavat lideri dinləmələrin mahiyətinə toxunub.
Keçmiş siyasi məhbus Vidadi İsgəndərli bu videosənədlərdə əksini tapan cinayətləri ayrı-ayrı vəzifəli şəxslərin yox, rejimin qəsdən xalqa qarşı törətdiyi cinayət kimi şərh edib. Bu cinayətin motivinin iqtidarın xalqı əzmək yolu ilə daha çox var-dövlət, sərvət toplamaq istəməsi olduğu vurğulanıb. Belə cinayət şəbəkələrinin cinayətləri ifşa olunduqca çökdüyü deyilib. Keçmiş rektorun yaydığı videosənədlər məhz ifşa mərhələsi adlandırılıb. Amma keçmiş siyasi məhbus hüquq-mühafizə orqanlarının özlərinin də bu cinayətlərdə iştirakçı olduğu üçün cinayətlərə görə rejimi mühakimə etməyin mümkünsüz olduğunu deyib. Hakimiyyətin kriminallığı daha çox ifşa edildikcə, xalqın etirazlarının rejimə son verəcəyi nəzərə çatdırılıb.
“Bu iqtidar qarşısında duran problemləri qətllər törətməklə həll etmək təcrübəsi yaradıb və indi ömrünü uzatmaq üçün insanları öldürmək yolundan gedir”, - deyə AXCP sədrinin müavini Nurəddin Məmmədli qeyd edib. Onun fikrincə, bütün ləyaqətli insanlar həbsə alınır, oğru-quldurlar isə dövlət strukturlarına yerləşib. Bu məsələnin hüquqi həlli olmadığını, hakimiyyətin islaholunmazlığını deyən natiq xilas yolunun rejimi dəyişməkdən keçdiyini söyləyib.
“Azadlıq” qəzetinin redaktoru Rahim Hacılı adı çəkilən videolara 100 minlərlə insanın baxdığını deyərək, ictimai marağa səbəb olmasına toxunub. Bu videomateriallarla bağlı İctimai Palatanın Avropa məhkəməsinə müraciət olunması təklifi səsləndirib. “İctimai Palata bu məsələdə uğur qazana bilməsə, seçkilərdə də uğur qazana bilməyəcək”, - deyə R.Hacılı yekun rəyini ifadə edib.
AXCP sədri Əili Kərimli S.Babayevanın ölümünü videosənədlərin yayımından sonra “şahidlərin aradan götürülməsi kimi faciəvi mərhələnin başlanması” kimi dəyərləndirib. Cəmiyyətin buna “yox” deməsinin vaxtı çatdığı söylənilib. Eyni zamanda, Ə.Kərimli şahidlərin aradan götürülməsinin video-sənədlərdə adları cinayətdə hallanan şəxsləri “sübut yoxdur” deyə ittihamdan azad edə bilməyəcəyini xüsusi nəzərə çatdırıb.
Şamil