Ramiz Mehdiyevin komandasına sarsıdıcı zərbə gözlənilir; sabiq rəis DİN-nin rəhbərliyini əvəz edəcəyi ehtimal olunur

gundemxeber.az Qeyd edək ki, dövlət başçısı İlham Əliyev noyabrın 30-da imzaladığı sərəncamlara əsasən PA-nın xarici əlaqələr şöbəsinin müdiri Novruz Məmmədov, PA-nın regional idarəetmə və yerli özünüidarəetmə orqanları ilə iş şöbəsinin müdiri Zeynal Nağdəliyev, prezidentin iqtisadi məsələlər üzrə köməkçisi Əli Əsədov və müdafiə məsələləri üzrə köməkçisi Vahid Əliyev Ramiz Mehdiyevin müavinləri təyin ediliblər. Bunun ardınca isə dövlət başçısı Bakı Şəhər Baş Polis İdarəsinin sabiq rəisi, Azərbaycanın Tacikistandakı keçmiş səfiri Məhərrəm Əliyevin prezidentin müdafiə məsələləri üzrə köməkçisi xidmətinin Müdafiə məsələləri şöbəsinin müdiri vəzifəsinə təyin edib.
Məlumat üçün bildirək ki, PA rəhbəri postundan sonra üç mühüm vəzifə var: İctimai-siyasi şöbə, hüquq-mühafizə orqanları ilə iş şöbəsi və regional idarəetmə və yerli özünüidarəetmə orqanları ilə iş şöbəsinin müdiri. Amma maraqlıdır ki, İlham Əliyev bunlardan yalnız birini - Zeynal Nağdəliyevi Ramiz Mehdiyevin müavini təyin edib. PA rəhbərindən sonra mühüm postlar tutan ictimai-siyasi şöbənin müdiri Əli Həsənov və hüquq-mühafizə orqanları ilə iş şöbəsinin müdiri Fuad Ələsgərov İlham Əliyevin diqqətini “cəlb etməyib”. Ölkə başçısının onları Ramiz Mehdiyevin müavini postuna layiq bilməməsi siyasi mülahizələrlə izah edilir. Bildirilir ki, bu təyinatlar əslində Ramiz Mehdiyevi sıxışdırmaq məqsədi daşıyır. Onun müavini təyin edilən şəxslərdən ikisi PA rəhbərinə qarşı olan şəxslərdir. Əli Əsədov milli təhlükəsizlik naziri Eldar Mahmudovla yaxın qohumdur və birbaşa Ramiz Mehdiyev və komandasına rəqib olan Paşayevlərə yaxındır. Zeynal Nağdəliyev isə İlham Əliyevin özünə yaxın şəxsdir. Digər tərəfdən o Ramiz Mehdiyevin postuna iddialıdır. Novruz Məmmədovla Vahid Əliyevə gəlincə, onların təyinatı iz azdırmaq məqsədi daşıya bilər.
Bu təyinatlarda məqsəd Ramiz Mehdiyevin təsir imkanlarını azaltmaqdırsa, əlbəttə ki, Əli Həsənovun PA rəhbərinə müavin təyin edilməsi səhv addım olardı. Çünki bu şəxs Ramiz Mehdiyevin komandasının üzvüdür.
Son təyinatların içində Bakı Şəhər Baş Polis İdarəsinin sabiq rəisi, Azərbaycanın Tacikistandakı keçmiş səfiri Məhərrəm Əliyevin yeni vəzifəyə təyin olunması müxtəlif mülahizələrə yol açıb. Sabiq rəisin Prezident Administrasiyasına (PA) gəlişindən sonra daxili işlər naziri Ramil Usubov da natahat olub. Bu bərədə "Gündəm Xəbər"ə məlumat verən mənbə iddia edir ki, Məhərrəm Əliyevin əzəli rəqibi olan daxili işlər naziri bu təyinatı onun yerinə hazırlanması kimi dəyərləndirir. Ramil Usubov düşünür ki, bir müddət keçdikdən sonra Məhərrəm Əliyevdən ona qarşı istifadə ediləcək və o istefaya göndəriləcək. Məhərrəm Əliyev onun postuna təyin edildikdən sonra məsələ daha da dramatikləşə bilər. Daxili işlər nazirinin yaxın ətrafını da ən çox narahat edən məqam budur. Çünki Məhərrəm Əliyevin DİN rəhbərliyinə gələcəyi təqdirdə, heç şübhəsiz Ramil Usubovun kadrları ilə işləməyəcək.
Məlumatın səhih olduğunu qəbul etsək, hakimiyyətin Məhərrəm Əliyevə yenidən etimad göstərməsi maraq doğurur. Daxili işlər naziri Ramil Usubovla qarşıdurmada olan Məhərrəm Əliyevi Tacikistana sürgün edən hakimiyyət nədən ona ehtiyac duyub? Mülahizələrə görə, Məhərrəm Əliyevin yüksək vəzifəyə gətirilməsi və ona general-leytenant rütbəsi verilməsi Ramil Usubovun vurulması planının başlanğıcı ola bilər. Nəzərə alsaq ki, sabiq rəislə DİN rəhbərliyi arasında münasibətlər gərgindir və bu halda Məhərrəm Əliyev PA-da yüksək vəzifəyə təyin edilir, onda mülahizə ağlabatan görünür.
Əslində ehtimal etmək olar ki, Məhərrəm Əliyevin PA-ya yeni təyinatı onun üçün daxili işlər naziri vəzifəsinə tramplin rolunu oynaya bilər. Lakin burda PA-nın rəhbəri Ramiz Mehdiyev faktoru dayanır. Təbii ki, Ramiz Mehdiyev də artıq nəzarətə götürülüb. Dövlət başçısı İlham Əliyevin Ramiz Mehdiyevə yeni müavinlər təyin etməsi bunu deməyə əsas verir. Ehtimal etsək ki, Ramiz Mehdiyev yaxın gələcəkdə yola salınacaq, onda Ramil Usubovun da uzun müddət vəzifədə qala biləcəyi mümkün olmayacaq. Elə hakimiyyətdə də Məhərrəm Əliyevin Ramil Usubovun yerinə hazırlandığını düşünənlər var. Bu qənaətdə olanlar hesab edir ki, Ramiz Mehdiyev yola salınacağı təqdirdə onun komandasına sarsıdıcı zərbələrin endiriləcəyi istina deyil. Elə bu baxımdan Ramil Usubovun DİN-də qalması "yuxarılar"ı qane etməyəcək. Ona görə də DİN rəhbərinin əvəzlənməsi qərarına gəlinib. Burda Ramil Usubovdan başqa PA rəhbərinin komandasına daxil olan qurupların da vurulacağı gözləniləndir. Sadəcə prosesin mərhələ-mərhələ həyata keçirilməsi nəzərdə tutulub. Məhərrəm Əliyevin namizədliyinin necə meydana çıxmasına gəlincə, mənbə bildirir ki, Məhərrəm Əliyevin namizədliyini hakim ailəyə yaxın şəxslər tərəfindən irəli sürülüb.
Hər bir halda Məhərrəm Əliyevin nazir postuna gətirilməsi xəbəri doğrudursa, deməli, bunun arxasında hansısa ciddi məqsədlər var.

Fuad