Politoloqlar Vladimir Putinin səfərindən nə gözləyirlər?

Rusiya prezidenti Vladimir Putinin Azərbaycana rəsmi səfəri gözlənilir. Artıq səfərlə bağlı Bakıda ciddi hazırlıq işləri görülür. Ümumilikdə isə cəmiyyəti bir məsələ düşündürür – Rusiya prezidentinin Azərbaycana səfəri Azərbaycana nə vəd edir və bu Azərbaycanla Rusiya arasında yaranan soyuq münasibətə necə təsir göstərəcək? Həmçinin seçki ərəfəsində Vladimir Putinin ölkəmizə səfərinin məqsədi və məramı nədir? Bundan başqa, Rusiya Azərbaycanın Avropaya intiqrasiya etməsinə siyasi baxımdan necə yanaşır?

Politoloq Fikrət Sadıqov açıqlamasında səfərin iki dövlət arasıda həm siyasi, həm də iqtisadi sahədəəlaqələrin inşafına müsbət zəmin yaradacağını deyib: “Azərbaycan ilə Rusiya arasında müxtəlif sahələrdə ziddiyyətlər və fikir ayrılıqları var, bu bir reallıqdır. Hazırda iki dövlət arasında mövcud münasibət sırf strateji partnyorluq münasibətidir. Azərbaycan bu münasibətlərə xələl gətirə biləcək heç bir addım atmamalıdır. Unutmayaq ki, Rusiyada kifayət qədər soydaşımız işləyir, biz onların işləməsinə normal şərait yaratmalıyıq ki, onlar da təzyiqlərə məruz qalmasınlar. Rusiya güclü, eyni zamanda Azərbaycanla qonşu bir dövlətdir. Əgər Rusiya prezidentinin ölkəmizə səfəri baş tutsa, bu, iki dövlət arasıda həm siyasi, həm də iqtisadi sahədəəlaqələrin inşafına müsbət zəmin yaradacaq”.
V. Putinin Azərbaycana səfəri məhz prezidet seçkisi ərəfəsinə təsadüf etməsinə F. Sadıqov aydınlıq gətirərək əlavə edib ki, hazırda Rusiya indiki iqtidarın legitimliyini tanıyır və onu dəstəkləyir. Səfəri Azərbaycan prezidenti İlham Əliyevə dəstək kimi də qiymətləndirmək olar. F. Sadıqovun sözlərinə görə, Rusiya prezidenti V. Putinin Azərbaycana səfər etməsi bir növ həm Qərbə, həm də indiki iqtidara bir mesajıdır: “Bu gün Azərbaycan Qərb ölkələri ilə müxtəlif sahələrdəəməkdaşlıq etsə də, hər zaman bölgədə Rusiya amili mövcud olub və bundan sonra da mövcud olacaq”.

Politoloq Tofiq Abbasov Qəbələ RLS və Xəzərlə bağlı məsələnin Azərbaycan və Rusiyanın ikitərəfli münasibətlərində müəyyən anlaşılmazlıqlar yaratdığını deyib: “Bu anlaşılmazlıqları ortadan qaldırmaq üçün vaxtaşırı görüşlərə və məsləhətləşmərə ehtiyac var. Bu məsələlərin həllində hər iki dövlətin ortaq məxrəcə gəlmələri şərtdir”- deyə, politoloq bildirib.

Rusiyanın Azərbaycanda keçiriləcək prezident seçkiləri prosesinə biganə qala bilmədiyini deyən T. Abbasov Rusiyanın Azərbaycanda öz maraqları olduğunu qeyd edib: “Rusiya Azərbaycanda sabitliyin qorunub saxlanılmasında maraqlıdır və bu, Rusiyanı qane edir. Bu baxımdan da Rusiya sabitliyi qoruyub saxlamaq üçün Azərbaycan prezidenti İlham Əliyevə dəstək olacaq”.

T. Abbasov vurğulayıb ki, Rusiya Azərbaycanın Avropaya inteqrasiyasında da maraqlıdır: “Bu gün Azərbaycan həm Rusiya üçün, həm də Avropa üçün əhəmiyyətli bir ölkədir. Hazırda Rusiyanın Azərbaycanda həm iqtisadi, həm də siyasi maraqları var. Unutmayaq ki, Rusiya Azərbaycanda iqtisadi sahədə böyük paya sahibdir. Bu amil mütləq nəzərə alınmalıdır”.

Politoloq Rasim Ağayevin fikirincə, Rusiya ilə Azərbaycan arasında soyuqluq Qəbələ RLS ilə bağlı məsələdə razılıq əldə olunmaması səbəbindən başlayıb: “Bu soyuq münasibətin nə hərbi, nə iqtisadi, nə də siyasi əlaqələrlə bir bağlılığı var. Bu yalnız iki dövlət arasıda yaranan anlaşılmazlıqdır. Bu da görüş zamanı ortadan qaldırılacaq.

Ölkəmizdə keçiriləcək prezident seçkiləri ilə bağlı məsələyə birmənalı şəkildə cavab vermək olmur. Rusiya prezidenti Vladimir Putinin səfərindən sonra bütün məsələlərə aydınlıq gələcək”.