Bu dəqiqələrdə Milli Şuranın növbəti sessiyası keçirilir. Sessiyada iştirak etmək üçün Milli Şuranın 131 üzvündən 64 nəfəri qeydiyyatdan keçib. Virtualaz.org saytının hazırda tədbiri izləyən müxbirinin verdiyi məlumata görə, iclasda iştirak etməyənlər arasında Milli Şura Aparatının rəhbəri, EL Hərəkatının sədri Eldar Namazov da var.

Maraqlıdır ki, EL-dən Zəfər Quliyev, Eldəniz Quliyev və Köçəri Nağıbəyli də sessiyada iştirak etmirlər. Açıq Cəmiyyət Partiyasından sədr Sülhəddin Əkbər sessiyada iştirak etsə də partiyanın digər üzvləri tədbirə qatılmayıb.

Xatırladaq ki, Milli Şuranın avqustun 23-də keçirilən sessiyasında birləşmiş müxalifətin ehtiyat vahid namizədi olaraq Cəmil Həsənli seçilmişdi. O zaman ACP üzvləri bu qərara etiraz etmişdilər. Hətta ACP Ali Məclisinin sədri Zəminə Dünyamalıyeva sessiyadakı çıxışında bu qərara etirazını sərt şəkildə bildirmişdi. Əslində EL də Milli Şuranın sədri və müxalifətin prezidentliyə vahid namizədi, Rusiya vətəndaşlığı ilə bağlı “pasport krizi” yaşayan, bu üzdən Bakıya gələ bilməyən Rüstəm İbrahimbəyova alternativ namizədin seçilməsi ideyasına qarşı çıxırdı. Bugünkü boykot qərarı da böyük ehtimalla bununla bağlıdır...

İlkin Muradov