Cəmil Həsənli ona qarşı səsləndirilən ittihamlara da cavab verib
Bu gün Milli Şuranın prezidentliyə vahid namizədi Cəmil Həsənli RATİ-də mətbuat konfransı keçirib. Öncə Cəmil Həsənlinin mətbuat katibi konfransın məqsədi barədə məlumat verib. Debatda Cəmil Həsənliyə qarşı olan hadisə ilə bağlı Cəmil müəllimin mövqeyinin ifadə olunacağını dedi. Sonra təşviqat materiallarının və saytın təqdimatı nəzərdə tutulub.
Sonra Cəmil Həsənli danışıb. Prezidentliyə namizəd deyib ki, əslində debatda baş verənləri şərh etməyə ehtiyac yoxdur: "Çünki hər şey xalqın gözü qarşısında baş verdi. Bu cür hadisənin baş verəcəyini gözləyirdik. Azərbaycan hakimiyyəti elə vəziyyətdədir ki, onun 6 dəqiqəlik çıxışa dözümü yoxdur. Buna debat da deməyə adamın dili gəlmir. Totalitar qaydada debat təşkil edilib. Mənim birinci çıxışımdan sonra bilirsiniz ki, nələr baş verdi. Hakimiyyətin seçki texnologiyasının yararsızlığı üzə çıxdı. Məlum oldu ki, milyonlarla vəsait sərf olunan strategiyanı 6 dəqiqəlik çıxışla məhv etmək olar. Artıq birinci debat zamanı mənə YAP-a yaxın dairələrdən məlumat gəlmişdi ki, Əli Əhmədov sənə qarşı bir sənəd çıxaracaq. Mənim həyatım həmişə şəffaf olub. Mən heç bir qanun pozuntusuna yol verməmişəm. Mən hələ 1987-ci ildə Moskvada gözümdən əməliyyat olunmuşdum. Süni büllur təbəqəsi qoyulmuşdu. 10 il müddətinə nəzərdə tutulmuşdu. Sonralar məndə şəkər xəstəliyi əlamətləri meydana çıxdı. Ona görə yenidən əməliyyat olunmadı. Şükürlər olsun ki, mənim sağ gözüm tamamilə sağlamdır. 2011-ci ildə Zərifə Əliyeva adına Oftamologiya Xəstəxanasında sol gözüm yoxlandı və mənə məlum sənəd verildi. Bu, üçüncü dərəcəli əllilikdir. Üçüncü dərəcəli əlillik isə seçkidə iştirakı qadağan etmir".
Daha sonra Cəmil Həsənli İlqar Məmmədovun sənədlərinin saxta çıxarılması məsələsinə toxundu: "Hafizin sənədlərinin guya düzgün çıxması Azərbaycandakı vəziyyəti ortaya çıxarır. Hafiz Hacıyevin sənədləri Prezident Administrasiyasında ikili münasibət yaratmışdı.
Biz Milli Şuranın namizədindən xalqın namizədi olmaq taktikasından çıxış etdik və buna nail olduq. Hakimiyətin seçki strategiyasını darmadağın edə bildim. Ona görə ikinci debatda təxribat təşkil olundu ki, xalqa yönələn sözlərimin qarşısı alınsın.
Bunlar elə bilir ki, Hafizlə məni qarşı-qarşəya qoymaq istəyirlər. Bəyan edirəm ki, istər Hafiz, istər başqaları tərəfindən mənə yönələn fikirlərə cavabı birbaşa İlham Əliyevə verəcəyəm. Hafiz Hacıyev kimisini qeydiyyata almaq xalq tüpürməkdir. Dövlətimizin imici çox qiymətlidir. Bizim sözümüz İlham Əliyevə ünvanlanacaq. Çünki bu vəziyyəti ortaya gətirən odur. Bu çürük, mənəviyyatsız rejimdir. Azərbaycan xalqı ayağa qalxmalıdır və bunlara yox deməlidir".

Sonra tanınmış vəkil Aslan İsmayılov çıxış etdi. O dedi ki, debatda baş verən hadisılərdən sonra Milli Şuraya və Cəmil Həsənliyə bütün gücü ilə dəstək olacaq. Aslan İsmayılov dedi ki, Cəmil Həsənli Azərbaycan xalqının hüquqlarını müdafiə edən kişi, dövlət adamı olduğunu ortalığa qoydu: "Hafiz Hacıyevə isə heç kim baş qoşmasın. O xəstə, əxlaqsız adamdır. Onu debatda Əli Əhmədov idarə ediridi. Bütün varlığımla Cəmil Həsənlini müdafiə edəcəyəm. Millətini, özünü, ailəsini, dövlətini sevən hər bir kəsi Cəmil Həsənliyə dəstək olmağa çağırıram".

Sonra prezidentliyə namizədə suallar verildi. “YAP sizin cəzalandırılmağınızı bəyan edib. Necə hesab edirsiniz sizə qarşı hansı addımlar atıla bilərmi” sualına cavab olaraq C.Həsənli dedi ki, YAP qurama partiyadır: "Onun nə deyib-deməməsi mənim üçün maraqlı deyil. Mənim üçün maraqlı odur ki, bu milli mübarizədir, xeyir və şərin mübarizəsidir. Bu mübarizə davam edəcək. Sizi əmin edirəm ki, günü qara edilən millətin ziyalısının ağ kəfəndə dəfn olunmağa haqqı yoxdur. Bu mübarizədə mən xalqın önündə olacağam. Xalq da mənimlədir”.

Debatla bağlı suala cavabında C.Həsənli dedi ki, 6 dəqiqəlik vaxtını ayrıca çıxış etmək istədiyini lazımi müvafiq qurumlara bildirib.
22 sentyabr mitinqi ilə bağlı suala cavabında deyib ki, mitinq kütləvi olacaq. Çoxminli olacaq, özünüz görəcəksiniz ki, cəmiyyət necə hərəkətə gələcək.

“Sizə sui-qəsd təşkil edilə bilərmi, hər ehtimala qarşı hüqu-mühafizə orqznlarına, səfirliklərə müraciət etmək fikriniz varmı” sualına C.Həsənli “mən Ziya Bünyadovdan artıq deyiləm. Bir az pafoslu çıxsa da deyim ki, əgər bu millətin azadlğı mənim ölmümdən keçirsə, canımdan keçməyə hazıram...”.