“Onun əxlaqı, ləyaqəti imkan vermir ki hər hansı toplumun adından danışsın”; Bəxtiyar Hacıyev isə öz əmioğlusunun namizədliyinin ləğvi ilə bağlı çağırış edib
“Təklif edirəm ki, bu gündən və sabahdan MSK-ya müraciət edək, imza toplayaq və Hafiz Hacıyevin namizədliyinin ləğv olunmasına nail olaq. Bunun üçün kifayət qədər hüquqi əsaslar var. Heç olmasa, milyonlarla insanın evində baxdığı debatlarda bu səviyyəsizliklərin şahidi olmarıq. Nə deyirsiniz, sabahdan iş yerlərində, universitetlərdə, həyətlərdə imza toplayaq?”

Bu, “Müsbət Dəyişiklik” Gənclər Təşkilatının sədri Bəxtiyar Hacıyevin yaxın qohumu olan Hafiz Hacıyev haqqında ötən gün öz facebook səhifəsində yazdığı statusudur. Göründüyü kimi, söhbət sentyabrın 19-da İctimai Televiziyanın efirində 9 oktyabr prezident seçkilərində namizədliyi qeydə alan şəxslərin debatında baş verənlərdən gedir.

Bəxtiyar Hacıyevin bu çağırışına facebookda yüzlərlə müsbət reaksiya gəlib, canlı efirdə müxalifət liderlərinin ünvanına təhqir işlətdiyinə görə xeyli insan onun namizədliyinin ləğv edilməsi tələbi ilə çıxış edib. Bu arada bir məqamı da vurğulayaq ki, Bəxtiyar Hacıyev Hafiz Hacıyevin qohumudur. B.Hacıyevin atası ilə H.Hacıyev doğma əmioğludurlar.

Hafiz Hacıyevin sentyabrın 19-da İTV-də prezidentliyə namizədlərin debatındakı çıxışı təkcə müxalifətin ünvanına səsləndirdiyi təhqirlə və buna görə zaldan sürüdülərək çıxarılması ilə yadda qalmayıb. Hafiz Hacıyev çıxışı zamanı bir neçə dəfə Qərbi azərbaycanlılar adından danışdığını deyib.

Əslən Qərbi Azərbaycandan olan publisist Şahin Nəcəfov bildirib ki, Hafiz Hacıyev nəinki bölgəyə, bütün Azərbaycana ləkədir: “O, kimdir ki, Qərbi Azərbaycanın adından danışsın? Abbasqulu Ağa Şadlinskidi, Kərbəlayi İsmayıldı? Belə bir varlığın Qərbi Azərbaycan kimi böyük bir regionun adından danşması bütün ölkəyə təhqirdir. İrəvan Xanlığı tarix yazmış xanlıqdır. Bu el-obadan nə qədər dəyərli ziyalılar, şəxsiyyətli insanlar çıxıb. Mən heç onun adını çəkmək istəmirəm. Bu cür adamların seçki dönəmlərində gəlib regional faktordan yararlanmaq cəhdinin özü yolverilməzdir. Prezident seçkiləri ölkə miqyaslı siyasi hadisədir, onu regional müstəviyə çəkməyə kimin haqqı var?”

Ş.Nəcəfov hakimiyyətin Hafiz Hacıyevi növbəti dəfə seçki prosesinə qoşmasından da təəssüfləndiyini deyib: “Bu gün Azərbaycanda prezident, millət vəkili olmaq istəyən bəzi adamların səviyyəsi insanı dəhşətə gətirir. Son 20 ildə ölkədə elə bir mənəvi deqradasiya gedib ki, ayaqlar baş olub. Adam belə bir ölkənin vətəndaşı olduğundan da utanır”.

Qərbi Azərbaycan bölgəsinin təmsilçilərindən Paşa Mərdanov da Hafiz Hacıyevi öz miqyasını böyütməkdə ittiham edib: “Heç kimin bütünlüklə Qərbi azərbaycanlıların adından danışmağa ixtiyarı yoxdur. Harada görünüb ki fərd toplumun adından danışsın? Üstəlik Hafiz Haciyev kimi bir adam. Bu məsələyə Qərbi Azərbaycandan olan xeyli insan təpki verib. Məncə, bu məsələ sadəcə reaksiyalarla bitməyəcək. Hafiz Hacıyevə Qərbi Azərbaycanın adından danışmağı birdəfəlik qadağan etmək lazımdır”.

Hafiz Hacıyevin region adından danışmasına ən kəskin reaksiyalardan biri də Ukraynadan gəlib. Kiyevdə yaşayan əslən Qərbi Azərbaycandan olan Yalçın Qəhrəmanoğlu bəyanatla çıxış edib: “Hafiz Hacıyevin Qərbi azərbaycanlıların adından danışması bizi xeyli hiddətləndirdi. Onun kimi insanlar nəinki Qərbi azərbaycanlılara, nəinki azərbaycanlılara, bütövlükdə insanlıq üçün üzqarasıdır. Onun əxlaqı, ləyaqəti imkan vermir ki hər hansı toplumun adından danışsın. Bu adamın heç ailəsi arxasında durmaz. Qərbi azərbaycanlılar bütün xalqımız kimi demokratik, azad ölkədə yaşamaq istəyirlər. Onlar da qanunsuzluqdan, korrupsiyadan, ədalətsizlikdən əziyyət çəkirlər. Buna görə də heç şübhə etmirəm ki Milli Şuranın namizədinə səs verəcəklər”.

AMİP lideri Etibar Məmmədov da mediaya açıqlamasında İTV efirində baş verənləri biabırçılıq adlandırıb. Onun sözlərinə görə, seçki marafonuna qoşulmasa da prosesi izləyir.