Namizədlərin teledebatında YAP icra katibi Milli Şura namizədini “bu dediklərinə görə hüquq-mühafizə orqanları qarşısında cavab verəcəksən” dedi, Hafiz Hacıyev isə C.Həsənlini ölümlə təhdid etdi
Prezidentliyə namizədlərin İctimai Televiziyada debatı sentyabrın 26-da da davam edib. Çıxış edən prezidentliyə namizədlərin əksəriyyəti çıxışını həmişəki kimi Milli Şura üzvlərinin tənqidi və təhqiri üzərində qurub.

Püşkatmaya uyğun olaraq ilk çıxış edən namizəd Zahid Oruc müxalifəti liderlərini girova çevirməkdə ittiham edib: “Vaxtı ilə Əbülfəz Elçibəyi öz maraqlarının girovuna çevirənlər indi eyni ssenarini Cəmil Həsənliyə qarşı həyata keçirirlər”. O, müxalifəti siyasi ziddiyyətlər içərisində olmaqda da suçladı.

Yeni Azərbaycan Partiyasının namizədi, dövlət başçısı İlham Əliyevin səlahiyyətli nümayəndəsi Əli Əhmədov isə bildirdi ki, müxalifət əbəs yerə dəyişiklik həvəsindədir: “Artıq bu dəyişiklik baş verib. Azərbaycanın dəyişikliyə ehtiyacı yoxdur”. O, ölkənin iqtisadi qüdrətinin artdığını, ölkədə yoxsulluğun səviyyəsinin on ildə əlli faizdən üç faizə düşdüyünü, orta aylıq əmək haqqının beş dəfə, pensiyaların doqquz dəfə artdığını söyləyib. Ölkədə tikilən məktəb və xəstəxanalardan danışan Ə.Əhmədov, infrastruktur yenilənməsini təqdir edib.

Ümid Partiyasının sədri İqbal Ağazadə isə çıxışında ölkə səhiyyəsinin bərbad durumda olmasından söz açıb və platformasından danışıb. O, səhiyyə sistemindəki çatışmazlıqlardan, insanların həkimə müraciət etməməsinin səbəblərindən və vətəndaşların xarici ölkələrin həkimlərinə üz tutmasından danışıb: “Bu gün Azərbaycanda infaktın riski 95 faizdir. Vətəndaşın sosial-iqtisadi vəziyyəti onun həkimə müraciət etməsini çətinləşdirir və o, aylarla, illərlə, on illərlə, xəstələnib ağır vəziyyətə düşənə qədər səhiyyə ocaqlarına müraciət edə bilmir. Müraciət etdiyi səhiyyə ocaqlarında isə onları qeyri-peşəkarlıq, ya da imkansızlıq şəraiti ilə üz-üzə buraxırlar”. O, ailə həkimi institutunun yaradılmasının vacibliyindən danışıb, prezident seçiləcəyi halda, həkimin orta aylıq əmək haqqının artırılacağını, tibbi sığortanın həyata keçiriləcəyini vurğulayıb. Bir çox ciddi xəstəliyi olan vətəndaşların- vərəm, QİÇS, şəkər kimi xəstəliklərin dövlət hesabına pulsuz müalicə ediləcəyini, ildə iki dəfə vətəndaşların pulsuz müayinəsini də seçicilərə vəd edib.

Ədalət Partiyasının sədri İlyas İsmayılovun səlahiyyətli nümayəndəsi Mais Gülalıyev ölkə vətəndaşlarının dəyişiklik istədiyini vurğulayıb və ölkənin rüşvət, korrupsiya içində olduğunu qeyd edib. Onun sözlərinə görə, xalq hakimiyyətin qanunsuz əməllərinə müqavimət göstərə bilmir: “Çünki güclüdür. Azərbaycan hakimiyyətinin gücü xalqda deyil, maliyyədədir”.

Digər namizəd Hafiz Hacıyevin çıxışı isə demokratik düşərgənin təhqiri ilə müşayiət olunub.

Prezidentliyə namizəd Fərəc Quliyev isə çıxışında Dağlıq Qarabağ münaqişəsinin indiyədək həll olunmamasından danışıb və hökuməti hərəkətsizlikdə ittiham edib.

ADP sədri Sərdar Cəlaloğlu çıxışını bütünlüklə Milli Şuraya həsr edib və qurumun üzvlərinin vaxtı ilə hakimiyyətdə olduqları üçün qisasçı olduqlarını söyləyib. Onun sözlərinə görə, vaxtı ilə hakimiyyətdən uzaqlaşdırılan müxalifət yenidən hakimiyyəti geri almaq istəyir və bu səbəbdən hədsiz radikallıq nümayiş etdirir.

Namizədlərdən Araz Əlizadə özünə qarşı hücumların olduğunu bildirib və ölkə mətbuatını ittiham edib. O, çıxışında “Yeni Müsavat” qəzetini tənqir və təhqir edib, müxalifəti isə çətin dönəmlərdə, təzyiqlər zamanı xarici təşkilatlara üz tutmaqda ittiham edib. BAXCP sədri Qüdrət Həsənquliyev isə platformasından danışacağını bildirsə də, Milli Şuranın üzvlərini təhqir etdi.

Milli Şuranın prezidentliyə namizədi Cəmil Həsənli isə çıxışına seçicilərlə sentyabrın 28-də keçiriləcək görüşün anonsunu verməklə başladı: “Uca millətim, şərəfli xalq! Bu gün sizinlə yeni görüşə gəlmişik. Sözümün əvvəlində sizi növbəti mitinqə- seçicilərlə görüşə dəvət edirəm. Belə bir görüş sentyabr ayının 28-də, saat dörddə, İnşaatçılar metrosunun yanındakı stadionda, keçmiş Qələbə kinoteatrının arxasında baş verəcək. Gəlin Qələbəyə və birlikdə gedək qələbəyə”. O, həmçinin deyib: “Burada prezidentliyə namizəd mənəm, Əli Kərimli, İsa Qəmbər deyil. Nə sözünüz var, mənə deyin. Burada olmayan adamlar haqqında niyə bu qədər həqarətli danışırsınız? Özünüzü prezidentliyə namizəd kimi yox, vəkil kimi aparırsınız. Beş-altı nəfər İlham Əliyevin vəkili kimi çıxış edir. Vəkil idinizsə, buraya niyə gəlirdiniz?”. Onun dediklərinə Z.Oruc dərhal cavab verib: “İlham Əliyevin vəkili olmaq çox şərəfli iş sayılar”. H.Hacıyev isə təkrar təhqirlərə başlayıb və müxalifəti xalqı hərraca çıxarmaqda ittiham edib. O, həmçinin C.Həsənlini ölümlə hədələyib.

Cəmil Həsənli isə çıxışının davamında bir il əvvəl sentyabrın 26-da deputat Gülər Əhmədovanın mandat alveri barədə faktın açıqlanmasından danışdı: ““Gülərqeyt” işi açıldı, diqqət yetirin, rüşvəti alan da Yeni Azərbaycan Partiyasının üzvüdür, verən də. Əgər bir partiya və bir partiyanın sədri mandat alveri ilə məşğul olursa, onun nə mənəvi haqqı var ki, bu gün prezidentliyə iddiaçılar rolunda çıxış etsin? Mandat alveri dövləti cinayətdir. Çünki burada siyasi postların satılmasından söhbət gedir. Konstitusiyaya görə, ən ağır cinayətdir. Siyasi postları satmaqdan ibarətdir. Açıldı ki, İham Əliyev parlament yerlərini siyahı ilə ya peşkəs edir, ya satır”.

Əli Əhmədov isə Cəmil Həsənlini həbslə hədələyib: “Bu sözlərinizə, dediklərinizə, tamam əsassız fikirlərinizə, iddialarınıza görə hüquq-mühafizə orqanlarına cavab verəcəksiniz”.

C.Həsənli daha sonra ölkədəki monopoliyadan danışıb: “Bütün vətəndaşların əziyyət çəkdiyi, bütün vətəndaşların həyatına təsir edən monopoliya barədə danışmaq istəyirəm. Azərbaycan bir neçə nəfər tərəfindən icarəyə götürülmüş bir əraziyə bənzəyir. Monopoliya bu millətin belini qırıb, yaşayışını qırıb, onun təminatına çox ciddi zərbələr vurub. Bəzən deyirlər ki, monopolist bu, nazirdir o biri nazirdir, Prezident Aparatında kimdir. Bu ölkədə bir monopolist var, bir baş monopolist var, o da İlham Əliyevdir. İlham Əliyev bu respublikanı bir holdinq kimi idarə edir. Ayr-ayrı nazirlərə icarəyə verib. Bu, necə hakimiyyətdir?”. Sonda yenə H.Hacıyev təhqirlər yağdırmağa başlayb və debat elə onun təhqiri ilə də başa çatıb.
[center][/center]