Milli Şuranın namizədi YAP təmsilçilərini və saxta namizədləri yerində oturtdu
Oktyabrın 6-da İctimai Televiziyanın efirində prezidentliyə namizədlərin sonuncu teledebatı keçirildi. Teledebatda İlham Əliyev istisna olmaqla prezidentliyə namizədlərin hamısı iştirak edirdi. YAP-ın namizədini -hazırkı ölkə başçısını isə deputat Əli Əhmədov təmsil edirdi.
Püşkatmaya əsasən çıxış üçün ilk yerdə olan prezidentliyə namizəd Zahid Oruc tamaşaçıları sabah keçiriləcək görüşünə dəvət etdi.



Əli Əhmədov isə seçicilərin müraciət edərək İ.Əliyevə səs verməyə çağırdı. Daha sonra hakimiyyətin vədlərini sadalayan Ə.Əhmədov iqtisadiyyatın iki dəfə güclənəcəyini, iş yerlərinin açılacağını, pensiyaların artırılacağını bildirdi.



Prezidentliyə namizəd İqbal Ağazadə seçiciləri ölkənin taleyinə laqeyd qalamamağa, səsvermədə iştirak etməyə çağırdı: “Hakimiyyət 20 ildə nə bacarıbsa edib, yaxşı-pis. Bundan yaxşı edə biləcəkləri bundan sonra olmayacaq. 20 ildə bu qədər dəyişə biliblərsə, deməli bundan sonra nəsə edə bilməyəcəklər. Nə korrupsiya, rüşvətxorluq dəyişməyəcək.Bütün bunları düşünərək, balalarımızın gələcəyini düşünərək biz hamımız bu seçkilərdə bu hakimiyyətə yox deməyi bacarmalıyıq. Barışa, dialoqa söykənən mübarizə vasitəsi yalnız seçkilərdir. Seçki məntəqələrinə getmək vaxt aparmayacaq, amma getmək lazımdır. Mən istəyirəm ki, Azərbaycan cəmiyyəti güvənli, sosial cəhətdən ədalətli, milli-mənəvi dəyərləri qoruyan, hər bizimizin üzündə sabahını gülüşə açan bir Azərbaycan qurulsun. Bunun üçün savaşmağa ehtiyac yoxdur, sadəcə bir gün vaxtımızı ayırıb, 20 dəqiqəmizi sərf edərək bu hakimiyyəti dəyişmək lazımdır”.



İlk dəfə debata qatılan prezidentliyə namizəd İlyas İsmayılov onun namizədliyini müdafiə edən partiyalara təşəkkür edərək, sabah keçiriləcək görüşə çağırdı. Daha sonra görəcəyi işlərdən danışan İ.İsmayılov Azərbaycanın əsas probleminin Qarabağ münaqişəsi, korrupsiya və qanunların işləməməsi olduğunu deyərək, seçilərsə bu sahədə ciddi işləyəcəyini bildirdi.



H.Hacıyev isə ənənəvi olaraq əvvəlcə platforması haqda danışacağını bildirsə də, müxalifətə hücum etdi. Mətbuatın onu təhdid etdiyini bildirdi.



Fərəc Quliyev çıxışında seçilərsə milli dəyərləri hakimiyyətə gətirəcəyini bildirdi. Daha sonra müxtəlif qrupları sadalayaraq onlardan dəstək gözləmədiyini, seçiləcəyi təqdirdə bu qruplara qarşı mübarizə aparacağını bildirdi.



Prezidentliyə namizəd Sərdar Cəlaloğlu (Məmmədov) seçicilərin şikayətlərini qeyd edərək ölkədə mülkiyyət toxunulmazlığının olmadığına diqqət yönəltdi.



Araz Əlizadə isə çıxışına “vətənin dayağıdır ana, müəllim və hərbçi” şüarını səsləndirməklə başlasa da, sonradan çıxışını müxalifəti tənqidə yönəltdı, Cəmil Həsənlinin teledebatlarda hakimiyyətin ünvanına səsləndirdiyi fikrilərin əsassız olduğunu dedi.



Qüdrət Həsənquliyev depatlarda bir qrup namizədin problemlərdən danışdığını deyərək, Azərbaycana problemlərdən danışan prezidentin lazım olmadığını bildirdi.



Milli Şuranın namizədi Cəmil Həsənli 6 dəqiqəlik debatların yalnız görüntü məqsədi ilə olduğunu, ölkə başçısının teledebatlara qatılmadığını xatırlatdı. Debatda iştirak edən bəzi namizədlərin onun fikrilərini təhrif etməyə çalışdığını qeyd edən C.Həsənli bank kreditləri ilə bağlı amnistiyanın xərclərinin dövlət hesabına ödəniləcəyini bir daha təkrar etdi: “Dövlətimiz zəngindir. 5 min manata qədər kreditlər dövlət hesabına ödəniləcək. 5 mindən 10 min manata qədər olan kreditlərin 50 faizi dövlət vəsaiti hesabına ödəniləcək. Daha yuxarı kreditlər barədə əlavə tədbirlər görüləcək”.



Sonrakı vaxtda çıxış edən Z.Oruc məcburi köçkünlərə, qaçqınlara, müəllimlərə və digər sosial qruplara müraciət edərək H.Əliyev kursuna səs verməyə çağırdı. Ə.Əhmədov çıxış edərək Cəmil Həsənlini intellektsizlikdə günahlandırdı. Onun ardınca qısa atmacalarla çıxış edən H.Hacıyev növbəti dəfə müxalifət liderlərini, C.Həsənlini təhdid etməyə çalışdı.



Vaxtının qalan hissəsini çıxış edən Sərdar Cəlaloğlu ölkədə vətəndaş sülhü yaradacağını, seçiləcəyi təqdirdə 30 faiz hakimiyyətdən, 30 faiz müxalifətdən olmaqla koalisiya hökuməti quracağını vəd etdi.



Q.Həsənquliyev isə C.Həsənlinin çıxışları zamanı yalnız jurnalist Xədicə İsmayılovanın məqalələrini oxuduğunu, onun özünü namizəd göstərməli olduğunu dedi.



Onun bu ittihamına cavab olaraq C.Həsənli X.İsmayılovanın debatda iştirak edənlərdən daha mənəviyyatlı saydığını dedi:" Mən bura Milli Şuranın qərarı, millətimin iradəsi ilə gəlmişəm və bundan sonra da millətimin azadlığı uğurunda mübarizəsində həmişə öndə dayanacağam. “Qızıl amnistiya” elan olunacaq. Nahaq tutulanların hamısı evlərinə qayıdacaq, İlham Əliyevin yaratdığı repressiya rejiminə son qoyulacaq. Həzrət Əli əleyhissalam deyir ki, zalıma yardım etməyin, Allah zalımı ona yardım edənlərə qənim kəsər”.



Cəmil Həsənli onu ermənilərlə qohumluqda yenidən ittiham edən H.Hacıyevin 1996-cı ildə o zaman dövlət başçısı haqda analoji ittihamları səsləndirdiyini bildirdi. C.Həsənli hazırkı hökumətin qazı 5 manata istehsal edib 100 manata xalqa satdığını bildirərək seçiləcəyi təqdirdə işıq, qaz, su pullarını iki dəfə azaldacağını bildirdi. Eyni zamanda müəllimlərin, həkimlərin, mədəniyyət işçilərinin, məmurların maaşlarını 2-3 dəfə artıracağını bildirdi. Bundan başqa Gürcüstanda yaşayan azərbaycanlılar üçün Azərbaycana gəlib-getmək üçün şərtləri yaxşılaşdıracağını deyən Milli Şura namizədi hazırda onların bu sahədə ciddi əziyyət çəkdiyini bildirdi. Eyni zamanda xüsusi mülkiyyətin toxunulmaz elan ediləcəyini, vəzifə təyinatında ailə, tayfa münasibətlərinin ön plana çıxarılmayacağını, vəzifə təyinatının şəxslərin intellekt və bacarığına görə həyata keçiriləcəyini vəd etdi.



Qeyd edək ki, bütün bu vədlər bir cümlə və ya ayrıca vədlər olaraq səsləndirilir və vaxtlarını saxlayan digər namizədlər Əli Əhmədov, Zahid Oruc və Hafiz Hacıyevin replika və təhqirləri ilə müşayiət olundu. C.Həsənli vədlərini davam etdirərək pensiyaları artıracağını, eyni zamanda gənclərin daha asan ev almaları üçün ipoteka fondunu 20 dəfə artıracağını vəd etdi. Yekunda seçicilərə səsverməyə gedib, səslərinə sahib çıxmağa çağırdı: “Nə qədər ki, vətəndaşlar öz ölkəsinin sahibi deyil, bu oğrular və quldurlar həmişə millətin malın talan edəcəklər. Sahibsiz olan məmləkətin batması haqdır, biz sahib olarıqsa, bu vətən batmayacaqdır. Öz səsinizlə, öz iradənizi ortaya qoymaqla, oktyabrın 9-da seçki məntəqələrinə gəlin və iradənizi ortaya qoyun. Səs verin, haqqınıza qovuşun, səsinizlə tarix yazın”.