Sentyabrın 22-dən oktyabrın 1-dək davam edən və İndoneziyanın Palembanq şəhərində keçirilən III İslam Həmrəyliyi Oyunlarına artıq yekun vurulub. Ölkəmizi bu mötəbər turnirdə 9 növdə 53 idmançı təmsil edib. Azərbaycan idmançıları bu yarışı 22 medalla (6 qızıl, 8 gümüş, 8 bürünc) başa vurub.

Amma Azərbaycanın bu mötəbər tutnirdə iştirakının əsas nəticəsi bu da deyil. Ortaya daha acı nəticə çıxıb. Bu da bəzi məmurların özlərinin, yaxud da rəhbərlik etdikləri qurumların maraqlarını Azərbaycanın maraqlarından üstün tutmasıdır...



Virtualaz.org bununla bağlı maraqlı məlumatlar əldə edib. Həmin informasiyalara görə, Azərbaycan idmançılarının İndoneziyaya səfəri heç də asan başa gəlməyib. Məsələ burasındadır ki, AZAL idmançılarımıza birbaşa çarter reysi ayırmaq, onların bu uzaq Cənub-Şərqi Asiya ölkəsinə rahat və problemsiz çatmasını təmin etmək əvəzinə başqa yol seçib. Hava yolları şirkəti bunun üçün komandanın səfərinin təşkilatçısı olan Gənclər və İdman Nazirliyinə böyük məbləğdə qiymət “oxuyub” (qeyd edək ki, “Futbol+” qəzeti də bu barədə bilgi yayıb).

Məlumatda bildirilir ki, AZAL-ın prezidenti Cahangir Əsgərov çarter reysinə görə gənclər və idman naziri Azad Rəhimovdan 300 min manat istəyib. Belə böyük məbləğlə razılaşmayan Gənclər və İdman Nazirliyi isə başqa şirkətin xidmətlərindən və digər reysdən yararlanmaq məcburiyyətində qalıb. Nəticədə 6-7 saatlıq yol 26 saatlıq uzun və üzücü uçuşla əvəzlənib.



Bu isə komandaya öz neqativ təsirini göstərib. Belə ki, tez-tez iqlim dəyişən idmançılardan bir neçəsi yoldaca xəstələnib. Bu, habelə uzun uçuşdan yaranan yorğunluq da bəzi idmançıların həmin yarışlarda zəif nəticə göstərməsinə gətirib çıxarıb.

Görünür, məmurların pula hərisliyi o həddə çatıb ki, onlar hətta Azərbaycanın mənafeyi uğrunda addım atmaq tələb olunan məsələlərdə də güzəştə getmək istəmirlər.