Dünən ATƏT-in tədbirində baş verən qarşıdurma ilə bağlı “İki sahil” qəzetinin baş redaktoru Vüqar Rəhimzadə "Qafqazinfo"ya müsahibəsində günahkar kimi müxalifətçilərin adını çəkmişdi.


O, bildirib ki, qalmaqalın səbəbkarları İsa Qəmbərin oğlu İlkin Qəmbərin başına yığıb mətbuat konfransına gətirdiyi uşaqlardır:

"Mən sizin sualınıza sualla cavab verirəm. Deyin görək İsa Qəmbərin oğlu İlkin Qəmbər hansı qəzetin və ya hansı televiziyanın əməkdaşıdır? Jurnalist olmaya-olmaya onun mətbuat konfransında nə işi var? Bu qaragüruhçular- mətbuat işçisi olmaya-olmaya mətbuat konfransına müdaxilə edir, səs-küy salaraq- hətta fit çalmaqla sual vermək istəyən jurnalistlərə mane olurdular.

Eyni zamanda, mətbuat konfransı keçirən missiya üzvləri sanki onların bu hərəkətlərini görməzliyə vururdular. Biz, bax belə tərbiyəsizliyə və qeyri-jurnalistlərin mətbuat konfransındakı ədəbsiz hərəkətlərinə etiraz edirdik. Əgər dünənki mətbuat konfransını dəqiq izləsəniz görərsiniz ki, burada sual vermək üçün daha çox qeyri-jurnalistlərə və dağıdıcı müxalifət qəzetlərinin əməkdaşlarına, xarici KİV-lərə şərait yaradılırdı. Bu isə digər - orada olan yüzlərlə jurnalistin hüquqlarını pozmaq demək idi".

Musavat.com isə bildirir ki, Vüqar Rəhimzadə jurnalist termini ilə desək, "faylları qarışdırır". Gözünü qırpmadan insanları ittiham edən baş redaktor fərqində də deyil ki, onun təşkilatçı kimi ittiham etdiyi İlkin Qəmbər həmin gün o zalda ümumiyyətlə olmayıb. O, rəhbərlik etdiyi rusdilli minval.az saytında gündəlik işi ilə məşğul olarkən, ATƏT-in tədbirində baş verən qalmaqaldan da xəbər və video görüntü yayınlayıb.

Göründüyü kimi, Vüqar Rəhimzadənin ittihamındakı hər iki iddia yalandır: 1. İlkin Qəmbər ATƏT-in tədbirində olmayıb; 2. İlkin Qəmbər jurnalist fəaliyyəti ilə məşğul olur və online rejimdə işləyən və gündəlik İP girişi 17 min olan minval.az saytının baş redaktorudur.

Buna görə də, hömətli V. Rəhimzadə mütləq kiminsə üstünə yıxmaq istəyirsə, başqa bir adam tapmalıdır.