Sabiq nazirlə bağlı son qərar günü bəlli oldu; Ali Məhkəmə oktyabrın 28-də sabiq nazirlə bağlı plenum çağırdı; Vəkili əminliklə onun azadlığa buraxılacağını deyir; Avropa Məhkəməsinin qərarının icra edilməməsi hakimiyyətə ciddi başağrısı yaradıb
Keçmiş səhiyyə naziri Əli İnsanovla bağlı Avropa Məhkəməsinin qərarına Ali Məhkəmə oktyabrın 28-də baxacaq və sabiq nazir azadlığa buraxılacaq. Bu sensasion məlumatı Ə.İnsanovun vəkili Toğrul Babayev “mediaforum” saytının müsahibəsində deyib. Vəkil bildirib ki, keçmiş nazir Azərbaycanın Avropa İnsan Haqları Məhkəməsi yanında səlahiyyətli nümayəndəsi Çingiz Əsgərovu və Ali Məhkəmənin sədri Ramiz Rzayevi məhkəmə verib və bu iddia ərizəsinə oktyabrın 17-də baxılmalı idi.
Amma vəkil oktyabrın 17-də Ali Məhkəmə ilə əlaqə saxlayarkən məlum olub ki, sözügedən məhkəmə prosesləri təxirə salınıb. Vəkilə deyilib ki, oktyabrın 28-də Ali Məhkəmənin plenumu keçiriləcək və Əli İnsanovun məsələsinə baxılacaq: “Ali Məhkəmədən bildirdilər ki, sizə Əli İnsanovun məsələsinin plenuma çıxarılacağı ilə bağlı rəsmi məktub göndərmişik. Amma hələ məktub bizə gəlib çatmayıb”.
“Plenumdan nə qərar gözləyirsiniz” sualına Toğrul Babayev belə cavab verib: “Əli İnsanov oktyabrın 28-də azadlığa çıxmalıdır. Çünki bununla bağlı Avropa Məhkəməsinin qərarı var və həmin qərar yerinə yetirilməlidir”.
Qeyd edək ki, Avropa İnsan Haqları Məhkəməsinin keçmiş səhiyyə naziri Əli İnsanovla bağlı bu ilin martında verdiyi qərar artıq qüvvəyə minib. Prosedura uyğun olaraq, Azərbaycan hökuməti qərardan Yuxarı Palataya şikayət verməzsə, Avropa Məhkəməsinin qərarı qüvvəyə minir. Biz qərardan isə Azərbaycan hökuməti şikayət verməyib. Ali Məhkəmənin plenumu 3 ay müddətində Ə.İnsanov barədə işə baxaraq yerli məhkəmələrin hökm və qərarlarını ləğv etməli idi. 14 iyun 2013-cü il tarixində qüvvəyə minmiş qərarı icra etmədiyinə görə sabiq nazir həm Ali Məhkəmənin sədri Ramiz Rzayevi, həm də Azərbaycanın Avropa Məhkəməsindəki səlahiyyətli nümayəndəsi Çingiz Əsgərovu məhkəməyə vermişdi. Avropa Məhkəməsinin qərarını bu vaxtadək icra etməmək hakimiyyətin israrına baxmayaraq, Azərbaycanın nüfuzuna ciddi zərbə vurub. Məlumatlara görə, sabiq nazirlə bağlı Avropa Məhkəməsinin qərarının icra olunması hakimiyyətə ciddi başağrısı yaradıb. Üstəlik, 2005-ci ildə eyni gündə onunla həbs edilən Fərhad Əliyev artıq əfv olunub. Şübhə yoxdur ki, məhz bu səbəblərdən hakimiyyət Ali Məhkəmənin plenumunu oktyabrın 28-nə təyin etməyə məcbur olub.
Hələ bir müddət əvvəl 9 oktyabr prezident seçkisindən sonra dövlət başçısının keçmiş iqtisadi inkişaf naziri Fərhad Əliyevi və qardaşı Rafiq Əliyevi buraxacağı xəbəri yayılmışdı və oktyabrın 14-də onlar əfv edildi. Məlumatlar vardı ki, sabiq səhiyyə nazirinə də əfv ərizəsi yazmaq təklif olunubmuş. Amma nə Əli İnsanov özü, nə də onun ailə üzvlərindən kimsə prezidentə heç bir bağışlanma məktubu yazmadı.
Eks-nazir vəkili vasitəsilə dəfələrlə bildirib ki, belə bir addım onun saxta ittihamı təsdiqləməsi olardı.
Yeri gəlmişkən, Əli İnsanovun prezident seçkilərinə münasibəti də keçmiş nazir həmkarından fərqli oldu. O, F.Əliyevdən fərqli olaraq seçkiöncəsi Milli Şuranın namizədini dəstəklədiyini bildirdi.
Ən ağır “zon”lardan sayılan 13 saylı həbsxanada faktiki olaraq əlilə çevrilmiş sabiq səhiyyə nazirinin ağciyərlərində ciddi problemlər var. Sabiq nazir, üstəlik, onurğa sütunundakı yırtıq səbəbindən uzun müddətdir ki, əsa ilə yeriyir. Onun adı siyasi dustaqlarla yanaşı ən ağır xəstə olan məhbuslar siyahısında da var.
Yeri gəlmişkən, bir müddət əvvəl Ə. İnsanovun müəyyən şərtlərlə azadlığa buraxılacağı barədə xəbərlər yayılmışdı. Həmin xəbərlərdə deyilirdi ki, Ə.İnsanovun həbsdən buraxıldıqdan sonra mülklərini məhkəmə yolu ilə geri almaq niyyəti iqtidarda narahatlıq yaradıb. Ona görə də həbsdən buraxıldıqdan sonra onun məcburi mühacirətə göndəriləcəyi deyilirdi.
Xatırladaq ki, Əli İnsanov 2005-ci ildən həbsdədir. O, korrupsiya ittihamı ilə 11 il müddətinə azadlıqdan məhrum edilib. 2013-cü il martın 14-də Əli İnsanovla bağlı qərarını açıqlayan Avropa İnsan Hüquqları Məhkəməsi sabiq nazirin işgəncə və ədalətli məhkəmə hüququ üzrə iddialarını təmin edib. Qərara əsasən, Azərbaycan hökuməti Əli İnsanova 10 min avro kompensasiya da ödəməlidir.