Prezident komandasını yarıtmaz və korrupsionerlərdən təmizləmək istiqamətində son illərin ən qətiyyətli addımlarından birini atdı

İlham Əliyev üçüncü prezidentlik müddətinə komandasında kifayət qədər ciddi islahatlar həyata keçirməklə başladı. Bu gün prezident yeni hökumətin tərkibini elan etdi və məlum oldu ki, müdafiə naziri Səfər Əbiyev, əmək və əhalinin sosial müdafiəsi naziri Füzuli Ələkbərov, habelə Dövlət Xəzər dəniz Gəmçiliyinin rəisi Aydın Bəşirov yeni hökumətdə yer almır.



Habelə prezident iki yeni nazirlik yaratdı və baş nazirin iki yeni müavinini təyin etdi. Prezidentin kadr və struktur islahatlarının bir hissəsi kimi Xəzər Dəniz Gəmiçiliyi İdarəsi ləğv olundu, idarənin rəhbəri yeni kabinetdə yer almadı və Xəzər Dəniz Gəmiçiliyi İdarəsinin yerində yaradılan səhmdar cəmiyyətə yeni təyinat həyata keçirdi.

Xatırladaq ki, virtualaz.org saytı hələ bir gün əvvəl prezidentin hökumətdə həyata keçirəcəyi dəyişiklərə dair bəzi məlumatları yaymışdı. Xəbər vermişdik ki, prezident hökumətə rəhbərliyi yenidən Artur Rasizadəyə həvalə edəcək, nazirlərdən isə Füzuli Ələkbərovun yeni hökumətdə yer almayacağı artıq dəqiqləşib.



Şübhəsiz ki, İlham Əliyevin yeni hökumətdə həyata keçirdiyi kadr islahatlarından ən əhəmiyyətlisi müdafiə naziri Səfər Əbiyevin işdən azad edilməsidir. İlham Əliyev ötən 10 illik hakimiyyəti ərzində Azərbaycanın müdafiə xərclərini 23 dəfə artırıb, ölkənin hərbi sənayesini formalaşdırıb, xarici ölkələrdən böyük miqdarda ən müasir və böyük dağıdıcı gücə malik silahlar, hərbi texnika alınıb.

Lakin prezidentin müdafiə sahəsinə yönəltdiyi bu diqqət real nəticədə inikasını tam olaraq heç cür tapa bilmirdi və heç şübhəsiz ki, bunun əsas səbəbi Müdafiə Nazirliyi sistemindəki dəhşətli korrupsiya, nazirliyin idarə edilməsindəki ciddi qüsurlar idi. Məhz bu pis idarəçiliyin, hərbi intizamın yüksək səviyyədə olmamasının və bütün ordu sisteminə sirayət edən korrupsiyanın nəticəsində orduda qeyri-döyüş itkilərinin statistikasını heç cür azaltmaq mümkün olmurdu.

Hər il Azərbaycan ordusu qeyri-döyüş şəraitində ən azı bir bölük əsgərini itirirdi və ordudakı əsgər ölümləri bu ilin yazında Bakıda kifayət qədər ciddi, genişmiqyaslı və eyni zamanda təhlükəli etiraz dalğasının başlamasına səbəb olmuşdu. Müdafiə naziri birmənalı şəkildə əhalinin hakimiyyətdən narazılığının mənbələrindən birinə çevrilmişdi və 20 ildir bu postu tutan Əbiyevin əvəzlənməsinin vaxtı çoxdan gəlib çatmışdı.

Şübhə yoxdur ki, prezident Əbiyevin nəhayət işdən azad edilməsinin vacibliyi haqda çoxdan qərarını verib, ancaq bu qərarın həyata keçirilməsini seçkidən sonraya saxlayıb. Əbiyevin Daxili Qoşunların komandanı, general Zakir Həsənovla əvəzlənməsi də kifayət qədər düzgün seçim hesab edilə bilər. Çünki Daxili Qoşunlar silahlı qüvvələrin güclü nizam-intizam hökm sürdüyü, qeyri-döyüş itkilərinin ən az olduğu qoşun növlərindən biridir. Heç kimə sirr deyil ki, əsgərlərini orduya göndərən valideyinlər onun Müdafiə Nazirliyinə tabe olan hərbi hissələrdə deyil, Daxili Qoşunlarda xidmət etməsini arzu edir, yaxud buna can atır.



Digər ciddi dəyişiklik əmək və əhalinin sosial müdafiəsi naziri Füzuli Ələkbərovun hökumətdən uzaqlaşdırılmasıdır. Ələkbərovun nazirliyi korrupsiyanın və rüşvətin ən çox yayıldığı strukturlardan birinə çevrilmişdi. Bu fakt bir neçə dəfə Baş prokuror yanında Korrupsiyaya qarşı Mübarizə İdarəsinin açıqladığı statistikada öz əksini tapıb. Lakin Ələkbərovun vəzifədən uzaqlaşdırılması zərurəti daha çox bu ilin yanvarında İsmayıllıda baş verən hadisələrdən sonra meydana çıxdı.

Bu rayon Ələkbərovun kurasiyasında idi və İsmayıllıya nazirin qardaşı Nizami Ələkbərov başçılıq edirdi. Və yerli əhalini üsyana məcbur edən hadisəni törədən-rayon əhalisini təhqir edən də nazirin oğlu, onun biznesini idarə edən adamlar olmuşdu. F.Ələkbərovun vəzifədən azad olunacağı haqda məlumatlar çoxdan yayılsa da göründüyü kimi prezident gözdən düşmüş məmurların komandadan uzaqlaşdırılmasını seçkilərdən sonraya saxlayıb.

F.Ələkbərovun yerinə keçmiş sovet respublikaları arasında Avropa standartlarına uyğun pensiya islahatlarının uğurla həyata keçirilməsinə başçılıq etmiş Səlim Müslümov təyin edilib. Gözləmək olar ki, Müslümov Ələkbərovun nazirliyində sistemi islahatlar həyata keçirə biləcək və korrupsiyanı azaldacaq.



Nəhayət artıq ləğv edilmiş və səhmdar cəmiyyətə çevrilmiş Xəzər Dəniz Gəmiçiliyi idarəsinin rəhbəri Aydın Bəşirovun vəzifədən azad edilməsi də prezidentin korrupsioner, gözdən düşmüş məmurları komandasından uzaqlaşdırmaq istiqamətində atdığı vacib addımlardan biridir. Belə ki, ötən 10 ildə dəniz nəqliyyatına irihəcmli investisiyaların yatırılmasına baxmayaraq bu sistemdə göstəricilər yaxşılaşmayıb.

Üstəlik Xəzər Dəniz Gəmiçiliyinə məxsus “Naftalan” tankeri bu ilin yayında Xəzərdə qaçaq neft daşıyarkən Rusiyanın Federal Təhlükəsizlik Xidməti tərəfindən saxlanılmışdı. Gəmi hələ də azad edilməyib və neft qaçaqmalçılığı işi araşdırılmaqdadır. Bu insident Aydın Bəşirovun idarəsində baş verən qaranlıq işlərin miqyasının nə dərəcədə böyük olmasından xəbər verirdi.

Prezidentin yeni kadr təyinatları arasında baş nazirin müavinlərindən birinin ilk dəfə hakim Yeni Azərbaycan Partiyasının rəhbərliyindən təyin olunmasıdır. Partiyanın İcra Aparatının rəhbəri və prezidentin seçki qərargahına rəhbərlik edən Əli Əhmədov Artur Rasizadənin müavinlərindən biri oldu. Ə.Həsənovun hakimiyyət olimpində irəliləməsi YAP-ın son qurultayından başlamışdı və göründüyü kimi onun partiya rəhbərliyində mövqelərinin möhkəmləndirilməsi baş nazirin müavini təyinatı ilə davam etdirildi.



Nəhayət hökumətin ən çox tənqid olunan üzvlərindən biri, kənd təsərrüfatı naziri İsmət Abbasov da artıq nazir deyil. Lakin F.Ələkbərovdan, S.Əbiyevdən və A.Bəşirovdan fərqli olaraq İ.Abbasov komandadan birdəfəlik uzaqlaşdırılmayıb və baş nazirin müavini vəzifəsinə irəli çəkilib. Ancaq bu irəli çəkilmə formal xarakter daşıyır, çünki İ.Abbasov nazir kimi daha geniş imkanlara malik idi.

Prezidentin həyata keçirdiyi struktur islahatları da ciddi əhəmiyyətə malikdir. Belə ki, Sənaye və Energetika Nazirliyinin “sənaye” hissəsi ləğv edilib. İqtisadi İnkişaf Nazirliyi də ləğv olunub və onun yerində İqtisadiyyat və Sənaye Nazirliyi yaradılıb.

Bu struktur islahatlarının əhəmiyyəti nədədir? Məsələ ondadır ki, Azərbaycanda son illər güclü qeyri-neft sənayesi formalaşıb. Qeyri-neft sənayesi sürətlə iqtisadiyyatın aparıcı sahələrindən birinə çevrilməkdədir. Digər tərəfdən Azərbaycan iqtisadi inkişaf göstəricilərini dəfələrlə yaxşılaşdırıb və prezident İlham Əliyev növbəti beş ildə ölkə iqtisadiyyatının göstəricilərini inkişaf etmiş ölkələrin göstəricilərinə yaxınlaşdırmaq vəzifəsini müəyyən edib.

Deməli güclü iqtisadiyyatı və sürətlə inkişaf etməkdə olan sənayeni idarə etmək üçün yeni nazirliyin yaradılması, kifayət qədər güclənmiş sənayeni iqtisadiyyatın digər güclü sektorundan-energetikadan ayırılması optimal addımdır.

Virtualaz.org