2021-ci ilin yanvar-sentyabr aylarında 8628 kommersiya qurumu dövlət qeydiyyatından keçib ki, bu da ötən ilin müvafiq dövrü ilə müqayisədə 24,7 faiz çoxdur.

Bu haqda Dövlət Vergi Xidməti məlumat yayıb.

Bildirilib ki, həmin qurumların 82,9 faizi elektron qaydada, 17,1 faizi isə kağız daşıyıcılarında müraciətləri əsasında qeydiyyata alınıb.

Qısa zamanda bu qədər kommersiya qurumu rəsmi qeydiyyata düşməsi müəyyən suallar yaradır. Bu, biznesin leqallaşması ilə bağlıdır? Yoxsa sahibkarların rəsmi fəaliyyət göstərməsinə maraq yaradan başqa səbəblər var?

Maliyyə məsələləri üzrə ekspert, hüquqşünas Əkrəm Həsənov Cebhe.info-ya açıqlamasında deyib ki, bunun leqallaşdırılma ilə əlaqəli olduğuna inanmır:

“Ola bilər ki, əksinə, vergini az ödəsinlər deyə, bir şirkəti bir neçə yerə bölürlər. Çünki Vergi Məcəlləsinə görə, müəyyən güzəştlər var. Məsələn, mikro sahibkarlıq subyektləri üçün illik dövriyyə 200 min manatdır. Onlar nəzərdə tutulan mənfəət, gəlir vergisini 20 deyil, 5 faiz ödəyirlər. İstisna etmirəm ki, bu qədər kommersiya qurumunun qeydiyyatdan keçməsinin səbəbi məhz bu, bir neçə şirkət yaradaraq verginin bölüşdürülməsidir.

Onsuz da sahibkarlıq subyektlərinin çoxunun onsuz da şirkəti var idi. Sadəcə olaraq fəaliyyətlərinin bir hissəsini qeyri-rəsmi edirdilər. Bu baxımdan rəsmi rəqəmlərə birmənalı qiymət vermək mümkün deyil.Düşünürəm ki, hər bir halda bu vergidən yayınmaq , xərcləri azaltmağa hesablanmış addımdır. Amma vergi orqanlarının əlində kifayət qədər ali mexanizmlər var ki, bu halları müəyyən etsin və müvafiq tədbirlər görsün”.
 

GUNDEMXEBER.AZ