Komandirlər əsgərləri şəxsi məqsədlərlə fəhləliyə vadar edir: buna “dur” deyiləcəkmi?

Məyusedici haldır ki, vətəndaşların güc nazirliklərinə inamı gündən – günə azalır. Son zamanlar Müdafiə Nazirliyində az da olsa təmizlənmə işləri aparıldı. Lakin tam təmizlənmənin olmasını demək mümkün deyil. Xalqı, dövləti qorumalı olan strukdurda hələ də ordumuza qənim olanlar var. Bir ölkənin ki Müdafiə Nazirliyindən giley – güzar oldu, deməli orada vəziyyət kifayət qədər ciddidir. Hələ bunu demək artıqdır ki, adı çəkilən nazirliyin birbaşa vəzifəsi düşmənlə mübarizədir. Ancaq çavuşundan, serjantından tutmuş, zabitlərinə, hətta, generallarınadək ordudaxili çəkişmələrə, sərvət və mal – dövlət mübrizəsinə sürüklənən Silahlı Qüvvələrin silahı hansı hədəfə tuşlayacağı olduqca naməlum və təhlükəlidir. Belə vəziyyətdə ordunun həvalə edildiyi yüksək hərbi rütbəyə malik, lakin korrupsioner və rüşvətxor şəxslər, hətta fərari əsgərdən də qorxuludur - əlbəttə, o, mənada ki, vətənin müdafiəsi ilə alver edirlər. Hərgah o yerdə ki, pul vətəndən üstün tutulur, həmin ölkənin ordusu düşmənə çəpər, yağıya sipər ola bilməz. Bəlkə, elə buna görədir ki, Qarabağı işğal etmiş erməniləri torpaqlarımızdan çıxarmaqda acizik?
Suala verəcəyimiz cavab nə qədər acı olsa da Azərbaycan reallığına əsaslanır. Lakin heç cür barışmaq mümkün olmayan reallıq isə odur ki, torpaqlarımızın bir qisminin düşmən əlinə keçməsində ordudan şəxsi məqsədlərlə bəhrələnmək istəyənlərin də “əməyi” az olmayıb.

Əsgərlərin və ailələrin istismarı

Bu gün hərbi hissələrdə nəzarətsizlik və özbaşınalığın olması heç kimə sirr deyil. Orduda xidmət edən əsgərlərin valideynləri komandirlərin əlindən zara gəlib. Onlar şikayətlənirlər ki, komandirlər əsgər ailələrinə istismar etməyin daha “müasir” yollarını “kəşf edilib”. Belə ki, tabeliyində olan əsgərlərin ailələrini istismar etmək üçün ordudakı vəzifəli şəxslər onların hesabına öz mobil telefonlarına kontur yüklətdirir. Hətta əsgər valideynlərindən əlavə pul da tələb edilir. Xidmət edən əsgərlərə komandirlər təhkimli şəxslər kimi baxır – lap orta əsrlərdə olduğu kimi. Əsgərlərin soyulması ilə yanaşı onlar qanunsuz olaraq səlahiyyətli şəxslərin “votçinalarında” fəhlə kimi işlədilir. Səlahiyyətlilərin malikanələrində təmənnasız işlədilən əsgər harda lazım olduğunu bilmir. Hətta o, istər – istəməz özünə belə bir sual da verə bilər: - əcəba fəhləliklə məşğul olmaq üçün əsgərliyəmi gəlmək lazımdır? Görünür, əsgəri döyüş ruhunda tərbiyə etmək əvəzinə döymək və işlətmək ruhunda “tərbiyələndirməyi” üstün tutan komandirlər və digər səlahiyyətlilər onları qula çevirmək istəyirlər. Fəqət komandirlərin qanunsuz işkəncələri və əsgərlərə istismarçı münasibəti onların sırasında spartakların meydana gələcəyini heç də istisna etmir. Qədim Roma cəmiyyətində olduğu kimi ordunun patrisi və pleybeylərə bölünməsi nəticə etibarilə qarşısıalınmaz üsyanın baş verəcəyini vəd edir. Hələliksə etiraz çıxışları övladları qəzəbli zabitlərin və komandirlərin gülləsindən həlak olmuş əsgər analarının timsalında özünü büruzə verir.

General Nəciməddin Sadıqovun mülkü

Deyilənə görə general Nəciməddin Sadıqovun qəsri beşmərtəbəlidir, onun iki mərtəbəsi zirzəmidən ibarətdir. Zirzəmi hissəsində hamam, sauna, bilyard salonu və s. yerlər yerləşir. Bu beşmərtəbəli mülk qırx otaqdan ibarətdir – lap nağıllardakı kimi. Bu mülkün ilk daşından son mismarının vurulmasına qədər inşasında deyilənə görə əsgərlər iştirak edib. Həmin imarətin içərisində olmuş şəxslərin sözlərinə görə, hər biri yüksək səviyyədə təmir olunub. Qeyd olunur ki, bu qəsr möhkəm özüllər əsasında qurulub. Görəsən, Azərbaycan əsgərləri də havadan hücum zamanı məhz belə möhkəm “blindajlar” da olacaqlarmı?
Bu gün Azərbaycan əsgəri aylıq haqq verib, komandirindən bir aylıq, iki aylıq, hətta bir xidmət boyu belə azad dolana bilər. Yaxud da torpağı tapdaq altında olan Azərbaycan əsgəri hərbin incəliklərinə yiyələnmək əvəzinə, veyllənmək imkanı əldə edir. Lap elə ən yaxşı halda Azərbaycan əsgəri generallımızın evlərinin tikintisində fəhlə kimi iştirak edirlər. Qoy analar, atalar narahat olmasın. Oğlanları nə silahla təlimlər keçir, nə də döyüş bölgəsində səngərdə Vətəni qoruyurlar. Qoy Vətən narahat olsun. Çünki əsgəri onun sərhədlərində düşmənlə üz – üzə olan mövqelərdə səngər qazmaq əvəzinə, Azərbaycan generalı üçün yerin altına doğru ikimərtəbəli zirzəmi eşir. Əsgər neyləsin. O, əmrə tabedir. Desələr səngər qaz – qazacaq, düşmən üzərinə hücuma keç – irəli cumacaq, general üçün ev tik – tikəcək, komandirinin oğul – uşağının əyləncə obyektinə çevril – çevriləcək. Lap sovetlər dövründə əsgərlər barədə söylənilən fikrə daha çox yaxınlaşır - əsgər yatır, xidmətsə gedir.
Azərbaycan əsgəri nəinki tabeçiliyində olduğu əsgərin, zabitin, hətta Müdafiə Nazirliyinin şəxsi məqsədləri üçün istifadə oluna bilməz. Şəkildə sizlər bu imarətin tikintisi zamanı görkəmini görürsünüz. İndi artıq həmin qəsr hazırdır və ora quş quşluğu ilə uça bilməz. Şəkildə hərbi hissəyə məxsus maşının da ərazidə dayandığı aydın görünür. Həmin maşınla deyilənə görə əsgərlər işləməyə gətirilirdilər. Onlar burada işlədilir, istismar olunurdular.

“Salyan kazarması”nın faş olan sirləri

“Salyan” kazarması kimi tanınan hərbi hissə çoxlarına bəlli bir ünvanda yerləşir. Əvvəllər bu yer olduqca qapalı yer təəssüratı yaradırdı. Qəribədir, sonradan hərbi hissənin nəzdnində hündürmərtəbəli binalar tikildi. Burada iki və üç mərtəbəli binalar da inşa edildi. Görəsən bu binalar kimə məxsusdur? Bu mülklərdə Mehman Hacıəliyevin izlərinin görünməsi də heç kimə sirr deyil. Həmin binaların da əsgərlər tərəfindən tikilməsi iddiası irəli sürülür. Vaxtilə M.Hacıəliyevin rəhbərliyi altında xidmət keçmiş əsgərlərdən biri jurnalist həmkarlarından birinə bildirib ki, həmin evlərin tikintisində onun da əməyi az olmayıb. Bir neçə evin inşasında iştirak edib.

Maraqlıdır, torpaqları işğal edilmiş generallar özünü bu qəsrlərdə, əsgərləri qul kimi işlədib istismar edəndə necə hiss edirlər? Biz zəbt olunmuş torpaqlarımızı belə qul təfəkkürlü əsgərlər və onları istismar edən generallarlamı alacayıq?!
Çinarə Vüqar