Əli İnsanov haqda qərara etirazlar gəldi
“Əli İnsanovla bağlı qərar olduqca ədalətsizdir. Avropa Məhkəməsinin çıxardığı hökmə hörmətsizlikdir. İnsan haqlarına qarşı sayğısızlıqdır”. Qərbi Azərbaycan Deportasiya Qurbanları Mərkəzinin sədri Köçəri Nağıbəyli açıqlamasında belə deyib.

O, həbsdə olan keçmiş səhiyyə naziri Əli İnsanovla bağlı Ali Məhkəmə Plenumunun çıxardığı hökmə münasibət bildirərkən qeyd edib ki, məhkəmə qərəzlidir: “Bu onu göstərdi ki, məhkəmələr qərəzlidir, sifariş yerinə yetirir. Ali Məhkəmə Plenumu Avropa Məhkəməsinin verdiyi qərara belə qarşı çıxır”.

Qocaman YAP nümayəndələrindən də qərara etirazlar gəlib.

YAP-ın qurucularından olmuş Əli Əlirzayev “Azadlıq”a deyib ki, İnsanovun YAP-ın yaranmasında böyük xidmətləri olub və bu xidmətləri danmaq insafsızlıqdır: “Hesab edirəm ki, Əli İnsanovun məhkəmə prosesinə ədalətlə baxılmalıdır, şikayəti təmin olunmalıdır. O mənim deputat həmkarım olub və onun həbsi zamanı da fikirlərimi bildirmişəm. İnsanovun ətrafında olan insanları qınayıram. Çünki o adamlar ki, onun ətrafında idilər, sonradan onu satdılar və onun haqqında bəzi fikirlər birtərəfli deyildi. Onun hüquqlarını boğmaq düzgün deyil. Əli İnsanovla birgə partiyanın yaradılmasında iştirak etmişik və bir-birimizə hörmətlə yanaşmışıq. Əgər ona qarşı haqsızlıq olduğunu deyirsə, hüquqları uğrunda sona qədər mübarizə aparmalıdır”.

YAP-ın qurucularından olmuş Maksim Musayev də sabiq nazirin Heydər Əliyevə sədaqətli olduğunu və partiya quruculuğunda əvəzsiz xidmətlər göstərdiyini bildirib: “Mən Əli İnsanovun həbsi zamanı Bakıda olmamışam və məhkəmə proseslərindən də detallı xəbərim yoxdur. Ancaq biz deputat yoldaşı olmuşuq, isti münasibətlərimiz olub.
Əli İnsanov hər zaman öz fikrini deyə bilən, cəsarətli çıxışlar edən deputat idi. YAP-ın yaradılmasında və Heydər Əliyevin hakimiyyətə gəlməsində böyük rolu olub. Hətta deyə bilərəm ki, Əli İnsanov Heydər Əliyev üçün canını qurban verməyə hazır idi. Heydər Əliyevin hansısa orqanında problem olsaydı, öz orqanlarını çıxarıb ona verərdi.
Heydər Əliyevə onun qədər sədaqətli insan yox idi. Ancaq bu gün YAP-ın qurucuları kənarda qalıb, diqqət göstərilmir. Belə bir adamın dövlət çevrilişində ittiham olunması inandırıcı görünmür. Heydər Əliyevə sonsuz sədaqəti olan adam dövlət çevrilişi edə bilməzdi. Belə bir şəxsin dövlət çevrilişi etməsi gülüncdür”.

Bu arada isə Ə.İnsanov Ali Məhkəmənin sədri Ramiz Rzayevə müraciət edəcək. Aznews.az-a vəkili Toğrul Babayev deyib ki, müraciət Ali Məhkəmənin çıxardığı qərarla bağlıdır: “Biz qərarı hələ ala bilməmişik. Buna görə də Əli İnsanov özü şəxsən Ramiz Rzayevə müraciət edəcək ki, qərar bizə təqdim olunsun. Çünki müdafiə tərəfi olaraq bizim sonrakı fəaliyyətimiz qərarın bizə nə zaman verilməsindən asılıdır”.

Plenumun qərarına əsasən, Ə.İnsanov barəsində Apelyasiya Məhkəməsinin və Ali Məhkəmənin qərarları ləğv edilib. Birinci məhkəmə instansiyanın qərarı isə dəyişdirilməyib, İnsanov həbsdə qalıb.