Müsavat Partiyasının başqanı İsa Qəmbər ölkənin siyasi həyatında baş verənlər və özünün 2013-cü il strategiyası haqda fikirlərini “Azadlıq” radiosunun canlı efirində açıqlayıb. İsa Qəmbər əsasən oxucuların ona ünvanladığı suallara cavab verib.

Müsavat başqanı müxalifətin vahid namizədi məsələsi və bir sıra aparıcı müxalifət partiyalarının bir araya gəlməsi barədə verilən suala cavab olaraq deyib ki, o, vahid namizəd olmaq niyyətində deyil, hansı partiyalar vahid namizədlərini müəyyənləşdirmək istəyirlərsə, buyurub etsinlər. Bundan başqa, Müsavat başqanı bildirib ki, gələn il seçki kampaniyası ərəfəsində bir daha müxalifət partiyalarının liderləri ilə görüşlər keçiriləcək, məsləhətləşmələr aparılacaq.

Çıxışının sonunda İsa Qəmbər vahid namizəd məsələsi barədə səslənən suala cavab olaraq deyib ki, bu məsələ artıq Şaxta baba söhbətinə dönüb: “Hamı Şaxta babanı da sevir, vahid namizədi də. Ancaq hamı bilir ki, Şaxta baba real həyatda mövcud deyil. Eyni zamanda hamı bilməlidir ki, vahid namizəd məsələsinin alınması da mümkünsüz işdir”.

İsa Qəmbərin vahid namizədlə bağlı bu fikirlərinə AXCP-nin bir sıra üzvləri sərt formada münasibətlər bildiriblər. “Facebook”da Müsavat başqanına qarşı yeni hücum dalğası müşahidə olunmaqdadır. AXCP-nin sədr müavini Fuad Qərhəmanlı bildirib ki, vahid namizəd kimi ciddi bir məsələnin şaxta babaya bənzədilməsi ilə heç bir halda razılaşmaq olmaz: “Çünki biz vahid namizədi şaxta babanı sevdiyimizə görə deyil, rejimə qarşı cəmiyyətin bütün demokratik potensialını səfərbər etmək, saxtakarlığa qarşı ictimai müqavimət cəbhəsi yaratmaq və xalqın birlik istəklərini təmin edərək dəyişikliklər uğrunda vahid komanda kimi mübarizə aparmaq məqsədi ilə istəyirik. Əgər vahid namizəd olmayacaqsa, bu halda namizədlər şaxta baba vəziyyətinə düşəcəklər və saxtakar iqtidar bu halda onlardan nəticəsi əvvəlcədən bəlli “seçki yolkasını” bəzəmək üçün istifadə edəcək. Biz gerçəkdən dəyişiklik istəyiriksə ölkənin bütün demokratik qüvvələrini bir araya gətirmək istiqamətində çalışaraq konsensus və ya praymeriz yolu ilə onların arasından ən güclüsünü seçməyə çalışmalıyıq. Əks təqdirdə namizədliyini verən şəxslər bir partiya resursu ilə bu qədər harınlamış və zora söykənən bir hakimiyyətə necə qalib gələcəklərini,onların seçki saxtalaşdırmasının qarşısını necə alacaqlarını buyrub ortaya qoysunlar. Bu barədə heç nə deyə bilmirlər,çünki, özləri də bilir lər ki, indiki şərtlər daxilində bir partiyanın namizədi kimi seçidə iştirak etməklə heç bir nəticəyə nail olmaq mümkün deyil. Bəs onda bu halda nədən vahid namizəd ideyasın belə aqrresiv şəkildə inkar edirlər? Hər kəsə aydındır ki, saxtakarlığa qarşı bbütün qüvvələrin vahid namizəd formatında birgə müqavimət göstərməsi, ayrılıqda bir partiyanın təsirindən daha güclüdür. Avtoritarizmdən demokratiyaya keçid etmiş ölkələrdə real qüvvələr öz aralarından bir namizəd müəyyənləşdirməklə dəyişikliyə nail olurlar. Bütün dünyada sınaqdan çıxmış bu düsturun heç bir arqument gətirmədən inkar edilməsi narahatlıq yardır”.

İsa Qəmbərin ünvanına səslənən fikirlərə Müsavat funksionerləri cavabı gecikdirməyiblər. Müsavat Partiyası başqanının müavini Gülağa Aslanlı cavabında bildirib ki, Fuad Qəhrəmanlının fikirlərindən onun hələ müxalifətin vahid namizədi ilə əsas namizədi arasındakı fərqin nədən ibarət olduğunu ayırd edə bilmədiyi məlum olub: “Əgər onun Azərbaycanda özünü müxalifət hesab edən partiyaların, birliklərin, ictimai təşkilatların, ziyalıların arasından vahid namizəd seçmək, müəyyənləşdirmək və ya razılaşdırmaq kimi xüsusi bir bacarığı varsa, buyursun. İsa Qəmbər 2003-cü ildə xeyli enerji sərf etsə də, sonda bunun alınmadığının canlı şahididir. Fuad Qəhrəmanlı isə seçkilərdə iştirak haqqında qərar vermədən seçki mühitünün yaxşılaşdırıla bilməsi kimi absurd ideyanı təbliğ etməklə məşğuldur. Əgər İsa Qəmbərin söylədiklərini lazımı səviyyədə qəbul edə bilməyibsə, müttəfiq kimi bunu sosial şəbəkələrdə yaymaq yox, gəlib bir daha bizdən soruşmalı idi. İsa bəyin sözlərindən söz oyunu düzəltməyin tənbehini Fuadın Əli bəydən alacağına şübhəm yoxdur. Müttəfiqlik cətin işdir. Şərtləri yerinə yetirmək hər kəsin boynunun borcudur. Bunu heç kim unutmasa yaxşı olar”.

AXCP sədri Əli Kərimli isə “BBC Azərbaycanca”ya müsahibəsində bildirib ki, əsas strateji vəzifə demokratik seçki mühitinin yaranmasına nail olmaqdır. O deyib ki, namizədlik məsələsinə prosesin sonuncu mərhələsində baxılmalıdır: “Şəxsi mövqeyim bundan ibarətdir ki, əgər demokratik qüvvələrin böyük bir koalisiyası yaransa, cəmiyyətdə ciddi bir konsolidasiya getsə, bu prosesin nəticəsində bizim içimizdən vahid namizəd olsa və o prosesdə mənə etimad göstərilsə, mən bu məsuliyyəti üzərimə götürə bilərəm. Amma onu da açıq bildirirəm ki, mən öz namizədliyimdə israr etmək və bu məsələni digər məsələlərdən daha vacib saymaq fikrində deyiləm. Namizədlər seçki mühitinin formalaşması üçün bütün qüvvələri səfərbər etməlidirlər. Namizədlik məsələsinə isə bu prosesin sonuncu mərhələsində baxılmalıdır”.

“Bəs onda sonuncu mərhələdə həll olunacaq məsələ niyə hazırda aparılan qızğın mübahisələrə səbəb olur?” sualına Əli Kərimli belə cavab verib: “Bu, mənim təşəbbüsüm deyil. Mən neçə müddətdir ki, bu mövzuda danışıram. Ancaq bu, tək bizdən asılı deyil ki! Siyasətdə müxtəlif subyektlər var və onların öz yanaşması var”.
“Seçki mühitinin demokratikləşməsi üçün şərtlər yerinə yetirilməsə boykot gündəmə gətirilə bilərmi?” sualına cavabında isə AXCP sədri bildirib ki, onlar hazırda bu mövzuda danışmamağa üstünlük verirlər: “Qarşıda xeyli müddət var. Biz bu müddət ərzində bütün səyləri göstərəcəyik ki, demokratik seçki mühiti yaransın. Sonra bir də düşünəcəyik. Bu şərait seçkilərdə iştirak etməyə müəyyən inam, ümid yaradırmı? Doğrudan da xalqın səsini reallaşdırmaq imkanı varmı?”

Əli Kərimli bu suallara cavabdan asılı olaraq sonrakı qərarı verəcəklərini vurğulayıb.