Rəsul Quliyevin Kamaləddin Heydərova qarşı «mülk şantajı»

Özünü FHN rəhbərinin yaxını kimi təqdim edən iş adamı «Rəsul Quliyev kartı»ndan silah kimi istifadə edir

Azər Əsgərov Heydərovu fakt qarşısında qoyaraq ACP-yə icarə vermək istədiyi mülkü ona baha qiymətə satmaq istəyib

Eks-spiker Rəsul Quliyevin lideri olduğu Açıq Cəmiyyət Partiyasının (ACP) yerləşdiyi qərargahın ətrafında yaranmış siyasi qalmaqalla bağlı ötən gün əldə etdiyimiz informasiyalar prosesin üzərindəki «qara örtüyü» götürməkdədir. Həmin informasiyaları bir qədər sonra diqqətinizə çatdıracağıq, hələliksə baş verənlərin qısa özətini təqdim etmək oxucularda baş verənlərlə bağlı ümumi qənaətin yaranmasında yardımçı ola bilər.
Hər şey ondan başladı ki, özünü fövqəladə hallar naziri Kamaləddin Heydərovun yaxın adamı kimi təqdim edən Azər Əsgərov ona məxsus obyekti Rəsul Quliyevin lideri olduğu ACP-yə icarə verməyə razılaşdı. Bu isə haqlı olaraq, mediada ciddi müzakirələrə səbəb oldu, bir çoxları hətta bir qədər də irəli gedərək bunun arxasında FHN rəhbərinin dayandığını və Heydərovla Rəsul Quliyevin siyasi ittifaq yaratdıqlarını iddia etdilər. Və qeyd edək ki, bu elə ilk baxışdan da belə görünürdü.

Silah FHN şefinə tuşlanıb, məqsəd onu hakim düşərgədə çıxılmaz duruma soxmaqdır

Maraqlıdır, Rəsul Quliyevin ən yaxın adamlarının, qohumlarının belə ACP-yə qərargah üçün mülk icarəyə verməkdən çəkindikləri halda, Sülhəddin Əkbərin bu partiyaya sədr seçilməsindən az sonra partiyanın şəhərin mərkəzində iki mərtəbəli qərargahda yerləşməsi, əlbəttə ki, təəcüblü idi və siyasi çevrələrin, mətbuatın diqqətini çəkməyə bilməzdi. Bizim də diqqətimizi çəkmişdi. Nədən ki, cəmi iki həftə əvvəl bizə məlumat daxil olmuşdu ki, ACP Rəsul Quliyevə yaxın şəxslərdən birinin «Fəhlə» prospektində yerləşən 3 mərtəbəli mülkünə köçməyə hazırlaşır. Amma biz yazandan sonra mülkün sahibi ACP-yə yer verməkdən imtina etdi. Ola bilsin ki, iqtidardan hansısa xəbərdarlıqlar almışdı. Sual ortaya çıxırdı ki, Rəsul Quliyevin sadiq tərəfdarı öz mülkünü ACP-yə verməkdən çəkindiyi halda, o «ürəkli oğlan» kimdir görən Rəsul Quliyevin partiyasına şəhərin mərkəzində qərargah verib?!
Biz bu işin pərdəarxasını araşdırmağa başlamışdıq. Bununla bağlı azpolitika.info belə bir informasiya yayıb ki, onlara bir müddət öncə məlumatlar ötürüldü ki, ACP-yə mülk verən Azər Əsgərov adlı Naxçıvan sakini Kəmaləddin Heydərovla bir binada yaşayıb, onun qardaşları Abbas və Yavər Əsgərovlar hazırda FHN-də yüksək vəzifələrdə işləyirlər. Üstəlik, nazir müavini Orucəli Hacıyev Əsgərovların kürəkənidir. AHA!!! Axı deyirdilər ki, Rəsul Quliyevin partiyasına qərargah verən Kəmaləddin Heydərovun yaxın adamıdır! Araşdırdıq, məlumatlar öz təsdiqini tapdı. Məlum oldu ki, mülk sahibi Azər Ələsgərov həqiqətən də FHN başçısının müavini Orucəli Hacıyevin qaynı olub. Amma bu qohumluq çox qısa çəkib - illər əvvəl cəmi bir il. Hacıyevin ilk həyat yoldaşı uşaq dünyaya gətirərkən vəfat edib. Azər Əsgərovun qardaşları Yavər və Abbas Əsgərovlar isə həqiqətən də FHN-də işləyirlər və K.Heydərovla məhəllə uşağı olublar.

«Qarğa məndə qoz» var və ya özünü qəsdən şübhəli aparmaq taktikası

Azərbaycan reallığında belə bir şəxsin Rəsul Quliyevin partiyasına mülk icarəyə verməsi həqiqətən də sensasiya idi və işin alt qatında belə bir sensasiya sayəsində bəzi özəl maraqların təmin olunması taktikası həyata keçirilibmiş. Bütün bunlar ona hesablanmışdı ki, ACP-nin qərargahla təmin olunmasını FHN başçısı Kəmaləddin Heydərov şübhələrə hədəf olsun və sonra bu oyunu quranlar şantaj yolu ilə çoxlu pul əldə etsinlər. Eyni zamanda məsələnin təkcə pul qoparmaq deyil, siyasi yönünün olduğunu da iddia etmək olmaz. Gəlin, mülk sahibinin bir müddət əvvəl verdiyi açıqlamalara nəzər yetirək və şübhələrin əsassız olmadığına əmin olaq.
Mülk sahibi iddia edir ki, Kəmaləddin Heydərov, atası Fəttah Heydərov və Orucəli Hacıyevlə «münasibət və əlaqələri» olub və var! Yəni hələlik bir qədər dolayısı ilə demək istəyir ki, ACP-ni qərargahla məhz onların tapşırığı ilə təmin edib. Bu inandırıcıdırmı və ən əsası, Kəmaləddin Heydərov və atası ilə, eyni zamanda nazir müavini Orucəli Hacıyevlə «münasibət və əlaqələrinin» olduğunu iddia edən Azər Əsgərov indi niyə onları ifşa etməyə, satmağa çalışır?...
Bəri başdan deyək ki, Kəmaləddin Heydərov ən çox tənqid etdiyimiz, hətta hədəfdə saxladığımız məmurlardandır. Bundan sonra da belə olacaq!
Amma tam dəqiqləşdirmişik ki, Azər Əsgərovun öz mülkünü ACP-yə icarəyə verməsi tam təsadüfi olub. Belə ki, əvvəllər buranı retoran kimi işlədən şəxslər, obyekt işlək yerdə olmadığına görə, buranı tərk edəndən sonra Azər Əsgərov xeyli vaxt icarədar axtarıb. Eyni zamanda mülkün satışı barədə də elan verib. Bizdə olan məlumata görə, ACP-dən əvvəl o bu mülkünü 500 min dollara satışa qoyub. Lakin mülk şəhərin mərkəzi hissəsində yerləşsə də, yaxşı xeyir vermədiyindən, («necə deyərlər, «xodovoy» yerdə olmadığından) dəyərli hesab olunmayıb və sahibkarlar onu 500 min dollara almağa maraq göstərməyiblər. Bizdə dəqiq məlumat var ki, bu ərəfələrdə AXCP bu mülkü icarəyə götürmək üçün müraciət edib. Azər Əsgərov verməyə razılaşıb, amma aylıq 5 min dollar icarə haqqı tələb etdiyindən AXCP ilə sövdələşmə baş tutmayıb.

Mülkün «bəxti necə açıldı» və ya ACP ofis axtarışında

Bu ərəfədə isə Sülhəddin Əkbər artıq ACP-nin sədri seçilmişdi və partiya ciddi-cəhdlə icarəyə qərargah axtarırdı. Bu axtarışa təbii ki, ACP fəalları da cəlb olunmuşdu. Onlardan biri - əvvəllər Azər Əsgərovun tələbəsi olmuş Yalçın Mehdiyev öz mülkünü xeyli vaxtdır icarəyə verə bilməyən Azər Əsgərova deyib ki, bizim partiya bina axtarır, qorxmursunuzsa deyim gəlsinlər danışın. Azər razılıq verib, Sülhəddin Əkbər binaya baxaraq bəyənib, tərəflər aylıq 3 min dollar olmaqla, 2 illik icarə müqaviləsi bağlayıblar. ACP rəhbərliyinə daxil olan şəxslərdən biri deyir ki, sövdələşmə zamanı Azər Əsgərovun qardaşlarının FHN-də işlədiyini, Kəmaləddin Heydərovla bir binada yaşadıqlarını bilməyiblər. Qarşı tərəf də heç bir tərəddüd keçirmədən ACP-yə üzv olub, deyib ki, mən xaricdə yaşayıram, mənə təzyiq edə bilməzlər.
Buna baxmayaraq, məcbur olub binanı ACP-yə versə də, aylıq 3 min manat Azər Əsgərovu təmin edən rəqəm olmayıb. Çünki onun əsas məqsədi binanı satmaq və qarşılığında Türkiyədən daha gəlirli mülk almaq olub.
Bir müddət sonra mətbuatda ACP-nin qərargahının sahibinin Kəmaləddin Heydərovla bağlılığı olduğu haqda məlumatlar çıxanda (Çox böyük ehtimalla ilkin olaraq bu məlumatları K.Heydərovun əleyhdarları yayıblar), qardaşların narahatlığı haqda xəbərlər çatanda Azər Əsgərov yaxşı bir oyun oynamaq qərarına gəlib. Biləndən sonra ki, vəzifəli qardaşlar bu işin zərbəsinin sonda onlara dəyəcəyindən ciddi narahatdırlar, Azər Əsgərov özünün real dəyəri 200-250 min manatdan yuxarı olmayan mülkünü elə öz qardaşlarına və ya zərbə ala biləcək başqa bir şəxsə - Orucəli Hacıyevə (Hansı ki, əvvəllər Azər Əsgərovun bu binanı almaq və ya satışına kömək etmək xahişindən imtina etmişdilər), hətta Kəmaləddin Heydərovun özünə dəfələrlə baha qiymətə satmaq haqda planlar cızır. Qiyməti birdən-birə 4 dəfə qaldırır və mülkün 2 milyon dollara satışa çıxarıldığı barədə elan verir. Qardaşı Yavər Əsgərov bu oyundan onu çəkindirmək üçün Antalyaya xahiş-minnətə gedəndən sonra qiyməti 3 milyona, qardaşlar işdən çıxarılandan sonra isə 4 milyona qaldırır!
Paralel olaraq Azərbaycan saytlarına müxtəlif dezinformasiyalar buraxır. Çoxsaylı belə yalan və vəziyyəti daha da dramatikləşdirməyə xidmət edən belə xəbərlərdən birində deyilirdi ki, bəs Yavər Əsgərovu Antalyada qardaşı Azərlə mehribancasına gəzərkən görmüşük. Bu isə ona dəlalət edir ki, onlar əlbirdilər... Başqa bir məlumatda deyilirdi ki, Yavər Əsgərov Türkiyədə hansısa otelin restoranında Rəsul Quliyevlə görüşdü, kənardan müşahidə edirdik. Bir qədər sonra isə «məlumat» verilirdi ki, Orucəli Hacıyev Amerikada Rəsul Quliyevlə görüşüb və bundan sonrakı planları müzakirə edib və sairə. Bütün bu məktublar isə eyni dəsti-xətt və üslübda yazılırdı. Məqsəd də gün kimi aydın idi:

Suyu bulandırandan sonra «balıq tutmaq»

Vəziyyəti daha da dramatikləşdirib, qarşı tərəfi sövdələşməyə məcbur etmək və mülkü 10-15 dəfə baha qiymətə satmaq üçün plan işə salınır. Aya stabil olaraq heç 3 min manat gəlir verməyən mülkün qarşılığında əldə olanacaq 3-4 milyonla Türkiyədə nələr almaq və etmək olmaz ki?...
Lakin bütün bu gedişlər işə yaramayanda Azər Əsgərov daha bir gediş etdi: Mövzu barədə ən çox yazan media quruluşlarına «Basın və Yayın danışmanı» adından məktub göndərərək müsahibə vermək istədiyini bildirdi. Amma çox müəmmalı belə bir şərti var idi: «Noyabrın 23-nə qədər elan verməlisiniz ki, Azər Əsgərov bizə müsahibə verəcək və qərargahla bağlı məsələlərə aydınlıq gətirəcək. Əks halda sizə müsahibə verilməyəcək...»
Məqsəd aydın idi, Azər Əsgərov adlarını çəkdiyimiz adamlara mesaj verirdi ki, çıxıb nələrsə deyə bilərəm, 3-4 milyon sizin üçün heç nədir, gəlin bu qərargahı alın, hər şey bitsin. Lakin məqsədə yenə də nail olunmayanda azpolitika.info-ya qısa müsahibə verdi. Yenə şərti var idi: «Yazdıqlarımı olduğu kimi dərc etsəniz daha sensasiyalı açıqlamalarım olacaq». Bu qısa müsahibədə isə Azər Əsgərov açıq şəkildə eyham vururdu ki, mülkünü ACP-yə icarəyə verməsinə görə «xeyir-dua», razılıq alıb, Kəmaləddin Heydərovla «əlaqəsi» var, atası Fəttah Heydərovla indi də zəngləşir və sairə.

Mətbuatı alət etmək cəhdləri və iflas!

Azər Əsgərovun bu qısa, amma böyük məzmunlu müsahibəsindən dərhal sonra qardaşı Yavər Əsgərov mətbuata açıqlama verdi və onu yalan danışmaqda və şantajda ittiham etdi. Artıq Azər Əsgərovun da reaksiyası bizə daxil olub, hansı ki, orda qardaşını ciddi şəkildə təhdid edir. Heç bir şübhə yoxdur ki, yenə də məqsədinə nail olmasa Azər Əsgərov açıq şəkildə iddia edəcək ki, qərargahı Kəmaləddin Heydərovun, Orucəli Hacıyevin və qardaşlarının tapşırığı ilə Rəsul Quliyevin partiyasına verib, bilir ki, onların əlaqələri var və sairə.
Sadəcə bir sual çıxır ortaya: Azər Əsgərov Orucəli Hacıyevlə, Kəmaləddin Heydərovla yaxındırsa, nə baş verib ki, onları açıq şəkildə şantaj edir? Axı məntiqlə, A.Əsgərov müsahibəni bu istiqamətdə verməli idi ki, ACP-yə qərargahı öz təşəbbüsü ilə verib, bunun heç kimə aidiyyatı yoxdur. Amma açıq şantajla danışır və ümumilikdə müstəqil medianı özünə alət eləməyə çalışır...
İşin əsli isə budur ki, bütün bu qalmaqalın kökündə Azər Əsgərovun öz mülkünü real dəyərindən təxminən 10-15 dəfə baha qiymətə satmaq niyyəti durur. Bu məqsədə çatmaq üçün o, «Rəsul Quliyev kartından» məharətlə yaralanmağa çalışır. Hətta ola bilsin ki, hansısa dairələr tərəfindən idarə də olunur.
Amma artıq bütün kartlar açılıb və necə deyərlər, müəmmalı oyun başa çatmaq üzrədir...