Yeni nazir sələfinin «vurduqları»nı bir-bir vəzifəyə gətirir

Bu günlərdə əmək və əhalinin sosial müdafiəsi naziri Səlim Müslümov sələfi Füzuli Ələkbərovla aralarındakı münasibətlə bağlı açıqlama verdi.
Söhbət son zamanlar S. Müslümovun bütün addımlarıyla sələfinə qarşı mübarizə aparması haqda idi. Məhz nazir təyin edildikdən sonra Səlim Müslümov Füzuli Ələkbərovun bütün kadrlarını işdən çıxardı. Ardından isə bütün açıqlamalarında F.Ələkbərovun fəaliyyətini sərt tənqid edən açıqlamalar verdi. Bununla da yerli mediada yeni təəssüratlar bu şəkildə yansıdı – «Səlim Müslümov Füzuli Ələkbərovu «vurur»». Məhz indiki əmək naziri də sonuncu açıqlamasında bu «vurdu» sözündən danışaraq vəziyyəti yumşaltmağa çalışırdı.
Lakin bu informasiyalar təsadüfən ortaya çıxmamışdı. Məsələn sonuncu açıqlamasından cəmi 2 gün öncə nazir belə bir açıqlamaya müəlliflik etmişdi:
Azərbaycan Respublikası Dövlət Sosial Müdafiə Fondu (DSMF) “Işəgötürəninizlə əmək müqaviləsi imzalamısınızmı” sualı ilə sorğu keçirib. Sorğunun yekun nəticələrinə əsasən, respondentlərin 61,9 faizi suala “bəli”, 34,1 faizi isə “xeyr” cavabını veriblər. Sorğuya qatılanların 4 faizi isə ümumiyyətlə, bu haqda məlumatsız olduqlarını vurğulayıblar.
DSMF-in bu sorğusu, əslində, Azərbaycanda işəgötürmə zamanı kütləvi şəkildə qanun pozuntularına yol verildiyini, işəgötürənin vətəndaşların hüquqlarını pozduğunu ortaya qoyur. Bu sorğu həm də Dövlət Əmək Müfəttişliyinin fəaliyyətsizliyindən xəbər verir. Təsəvvür edin, sorğuda iştirak edənlərin 34,1 faizi işəgötürənlə əmək müqaviləsi imzalamadığını deyir. Bu, kifayət qədər böyük rəqəmdir.
Amma hansısa səbəbdənsə Dövlət Əmək Müfəttişliyini bu məsələ maraqlandırmayıb.
DSMF-in sədri Səlim Müslümov isə bu dəhşətli faktı ictimailəşdirməklə əmək və əhalinin sosial müdafiə naziri Füzuli Ələkbərovu pis vəziyyətdə qoyub».
Başqa bir açıqlaması ilə nazir sələfinin ünvanına sanki şantaj dolu bir təftiş xarakterli açıqlama ilə çıxış edirdi - əmək və əhalinin sosisal müdafiəsi naziri Səlim Müslümov təyin olunduğu ilk günlərdə keçirdiyi iclada əlilliyin təmin olunması və dərəcələrin verilməsi ilə məşğul olan tibbi sosial ekspert kommisyalarının (TSEK) rəhbərlərini cəzalandırdı. Nazir yol verdiyi nöqsanlara görə elə iclas zalındaca 14 zona komissiyasının rəhbərini tutduğu vəzifədən azad edib.
Nazir ilk növbədə tibbi sosial ekspert komissiyasının işinə diqqət yetməsinin təsadüfi olmadığını deyib: “Bu barədə mənə cənab prezident tapşırdı ki, ilk növbədə oranı təmizlə. Çünki TSEK çirkaba bulaşıb”.
Söhbət F.Ələkbərovun nazirliyi dönəmində yol verilən neqativliklərin aradan qaldırılmasından gedir və bu prossesin birbaşa olaraq dövlət başçısının tapşırığı ilə etdiyini deyirdi.
Və nəhayət Səlim Müslümov sələfi barədə yazılanlara çox maraqlı şəkildə cavab verir:
- Keçmiş həmkarınız Füzili Ələkbərovla hər hansı əlaqəniz varmı? Vəzifəni təhvil alandan sonra heç onunla görüşmüsüzmü? El dili ilə desək, ondan “halallıq” aldınızmı?
- Yox, əlbəttə burda heç bir problem görmürəm. Neçə dəfələrlə telefonla danışmışıq. İşdi, insandı, neçə ildi işləyir, işi bacardığı nöqtəyə qoyur. Nə qədər bacarırsa, o qədər reallaşdırır. Hansısa səhvlər də ola bilər, müvəffəqiyyətlər də. Bizim Füzuli müəllimlə hər hansı incikliyimiz olmayıb. Bir yerdə işləmişik, bir yerdə oturub durmuşuq. Telefonla da danışmışam, müəyyən məsələləri də müzakirə eləmişik. Heç bir problemimiz olmayıb. Mətbuatda oxuyuram, boş-boş şeylər yazırlar ki, guya kompromat toplayır. Belə şeylərə ehtiyac yoxdu, onları yığışdırmaq lazımdır. Bizim ictimaiyyətlə əlaqələr şöbəsi mediada bu mövzuda çıxan yazıların xülasəsini mənə verir, oxuyuram. Özüm də axşamlar çox yorğun olmayanda mətbuatı izləyirəm, saytlara, qəzetlərə baxıram. Bir neçə gün öncə görürəm yazıblar ki, Səlim Müslümova təzyiq olur. Amma bunlar yanlışdır, kim yayır, bilmirəm.
Lakin nazir bu açıqlamasında o qədər səmimi görünmür. Bu gün redaksiyamıza daxil olan çox ilginc bir xəbər var. Xəbər İmişli rayonundandır. Rayonda ƏƏSMN-nin şöbəsinə rəis təyinatından bəhs edilir. Məlumata əsasən İmişli ƏƏSMN-nin direktor əvəzi Könül Cavadova idarədə özü bildiyi kimi işləyir. Belə ki əslən Saatlı rayonundan olan inispektor Xəqani Əliyevlə əlbir olaraq öz maddi marağı naminə ehtiyacı olan insanlara deyil etiyacı olmayanlara sənədləşdirərək ünvanlı sosial yardım düzəldirlər.
Bu barədə vətəndaşlar nazir Səlim Müslümova icra başçısı Vilyam Hacıyevə müraciət etsələr də heç bir nəticəsi yoxdur.Xatırladaq ki Könül Cavadova 2011-ci ildə korrupsiya yoxlamaları işdən azad olunanlardan biridir.Dayısı oğlu DSMF Şuşa səhəri şöbəsinin müdiri Səlim Müslümovun tələbə yoldaşı Şakir Nuriyevin himayədarlığı ilə yenidəv vəzifəyə gətirildi. Göründüyü kimi informasiyanın sonuncu cümləsində şöbə müdirinin işinə bərpa olunması faktı kifayət qədər diqqəti çəkəndir.
Daha bir fakt isə Sabirabad rayonundandır. Sabirabad rayon Dövlət Sosial Müdafiə Fondunun Sosial Təminat Şöbəsinin müdiri Əlqəmə Quliyev öz oğlunu rayonda məlum şöbədən nazirliyə yolalyıb. Aldığımız məlumatlara əsasən Ə.Quliyevin oğlu ƏƏSMN-inə yüksək vəzifəyə gətirilib. Lakin Ə.Quliyev keçmiş rəhbərinə maraqlı faktlarla bağlıdır. Nazirlə rayon şöbəsinin müdirinin dostluğu əslində Ə.Quliyevin qaynı Füzuli adlı şəxsin, (oğru aləmində «Fili» kimi tanınan) Səlim Müslümovla həbsxanadan başlayıb. Həbsdə olduğu dövrlərdə Səlim Müslümov «Fili» ilə tanış olub. Daha sonra isə bu dostluğu Əlqəmə Quliyev davam etdirib.
Hər halda bu fakt da onu göstərir ki, əslində Səlim Müslümov sələfi Füzuli Ələkbərovun kadrlarını sıradan çıxarmaqla heç də sağlam olmayan bir kadr islahatı həyata keçirir.
Məlumatlara əsasən yeni nazirin təyinatları ilə bağlı olaraq ortaya kifayət qədər maraqlı faktlar da çıxıb.
ƏƏSMN-nin yerli şöbəsində rəhbər vəzifə uğrunda mübarizə Cəlilabadda özünü daha açıq şəkildə biruzə verir. Məlumatda bildirilir ki, Əmək və Əhalinin Sosial Müdafiə naziri Səlim Müslümov vəzifə başına keçdikdən sonra xeyli sayda işçini vəzifəsindən azad edib. Həmin proses fonunda TSEK müdirləri ilə yanaşı, həm də Sosial Müdafiə Mərkəzlərindən də bir çoxu postlarını itiriblər. Bu rayonlardan biri də Cəlilabad olub.
Cəlilabad rayon Sosial Müdafiə Mərkəzinin direktoru Mirsüleyman Mirxaslı işdən çıxarıldıqdan sonra artıq bir aydır ki, postu boş qalıb. Onun yerinə təyinat almaq istəyənlərin sayı isə 10 nəfəri keçib. Elə bu səbəbdən də SMM rəhbəri olmaq istəyənlər arasında açıq «savaş» gedir.
Məlumatlarda deyilir ki, işin ustası olan Mirxaslının yerinə elə onun kimi işbilən birinin gətirilməsi nəzərdə tutulub. Düzdür, keçmiş direktorun əli dirsəyinə qədər çirkaba batmışdı. Onun da digər rayonlarda olduğu kimi, 50/50-yə prinsipi ilə işlədiyi deyilirdi. Amma bütün bunlara baxmayaraq, işinin də ustası kimi tanınırdı. Edilən xəbərdarlıqdan sonra məsələdən hali olanların bəziləri iddialarından geri çəkilsələr də, hələ də post uğrunda mübarizə davam edir.
Qeyd olunur ki, əsas namizədlər sırasında Cəlilabaddakı banklardan birinin rəhbəri, rabitə, təhsil və səhiyyə sahələrində çalışan imkanlı adamlar da var. Hətta icra başçısının müavinlərindən birinin də bu posta göz dikdiyi deyilir.
Lakin bütün bunlara rəğmən, ən şanslı namizəd kimi Beylənxalq Bankın Cəlilabad rayon filialının rəhbəri Natiq Abbasov göstərilir. Deyilənlərə görə, Abbasovun arxasında nazir postuna bərabər bir imkana sahib bacısıoğlu dayanır. Elə yeni nazir Səlim Müslümovdan onun xahişini edən də məhz bu şəxsdir. Məlumatlarda o da iddia olunur ki, Natiq Abbasov savad və işibilmə qabiliyyəti baxımından Mirxaslı ilə müqayisə olunmayacaq biridir. Qeyd olunur ki, bank filialının rəhbəri bu sahədə keçmiş direktordan çoxçox geri qalır. Hətta o da vurğulanır ki, Beynəlxalq Bankın rəhbərliyi işində yol verdiyi nöqsanlara görə, bir neçə dəfə ona xəbərdarlıq da edib.
Bütün bu məlumatlar bir daha onu göstərir ki, əslində Səlim Müslümovun sələfinin kadrlarını işdən çıxarması prossesi yeni iş yerləri yaratmaq taktikasından başqa heç bir mütərəqqi qərar kimi qiymətləndirilmir. Eyni zamanda nazirliyin ictimayyətlə əlaqələr bölümündən də müvafiq suallarla bağlı olaraq heç bir dolğun informasiyalar əldə etmək mümkün deyil. Bu informasiyalar adətən birtərəfli qaydada yayımlanır və rəsmi reaksiyalar adətən nazirin öz dilindən xeyli müddət keçəndən sonra olur. Faktların çoxluğu, işlərini itirmiş sabiq nazirlik əməkdaşları ilə bağlı da ortaya kifayət qədər ilginc faktlar çıxır. Hətta bu günlərdə informasiyalar yayılmışdı ki, nazir məlum kollegiya iclasında qovduğu TSEK rəhbərləri öz işlərinin başındadır. Bu xəbər yayılandan 5 gün sonra hökumətə yaxın bir informasiya portalında təkzib eşidildi. Lakin rayonlardan bu səpkidə gələn informasiyalar kifayət qədər çox idi. Bundan başqa əgər sabiq nazir Füzuli Ələkbərovun dövründə nazirliyin strukturları daha çevik və tədbirlər baxımından sıx qrafiklə işləyirdilərsə, artıq bu tipli xəbərlərə çox az rast gəlinir.
Rayonlarda isə nazirliyin müvafiq şöbələrinə rəhbər təyin olunmaq istəyən və olunanlarla bağlı məlumatlar heç də ürəkaçan deyil. Nəhayət sonda bir replika yerinə düşür. Tutaq ki, Füzuli Ələkbərovun nazir olduğu dönəmlərdə korrupsiyaya görə işdən çıxarılan şəxsləri yenidən vəzifəyə bərpa etmək ədalətlidir. Lakin nəzərə alaq ki, işdən korrupsiyaya görə qovulanların çoxu 2011-ci ilə təsadüf edir. Məhz bu dönəmdə Azərbaycanda dövlət başçısının iradəsi ilə sərt şəkildə antikorrupsiya tədbirlərinə start verilmişdi. Məhz həmin dönəmdə ƏƏSMN-nin yüzlərlə işçisi rüşvət və korrupsiya faktlarına görə işini itirdi. Xeylisinə isə cinayət işi açılıb məsuliyyətə cəlb olundu. O dönəm də birbaşa olaraq hansısa nazirin iradəsindən kənar baş verən prosseslərdə cəzalandırılan insanları 2 ildən sonra yenidən işinə gətirmək nə qədər doğrudur. Axı bir zamanlar dövlət başçısının iradəsi ilə başladılan anti-korrupsiya prosseslərində cəza alan rəhbərləri yerli camaat yaxşı tanıyır.

Azər