Azərbaycan müğənniləri daha çox Türkiyə və Rusiyada məşhurlaşmağa, tanınmağa can atırlar. Onlar bu istəklərini gerçəkləşdirə bilirlərmi? Müğənnilərimiz Avropada niyə tanınmırlar? Bununla bağlı Lent.az bir neçə sənətçi arasında sorğu keçirib. Həmin sorğunu təqdim edirik.



Yalçın Rzazadə: “Bir müğənnin digər ölkədə tanınması üçün ilk növbədə istedad, sonra pul lazımdır. Amma maddi tərəf məncə ikinci dərəcəlidir. Dünyanın 52 ölkəsində olmuşam. Azərbaycan musiqisini təbliğ etmişəm. Puluma görə yox, səsim olduğu üçün o ölkələrə getmişəm. Amma xaricdə tanınmaq istəyim olmayıb. ”.


Mübariz Tağıyev: “İlk növbədə Azərbaycan şou-biznesini qaydaya salmaq, sonra başqa ölkədə tanınmaq barədə fikirləşmək lazımdır. Çünki hazırda şou-biznes toya xidmət edir. İfaçılarımız ölkədən kənarda tanına bilmirlər. İstedadlı gənclərin ölkədən kənarda tanınması üçün ona kömək edən adamlar olmalıdır. Yalnız “Eurovision” yarışmasında iştirak edən müğənniləri tanıyırlar. Amma müsabiqə xaricində yalnız 1-2 sənətçimiz var ki, onlar da Türkiyədə tanınmaq istəyirlər. Amma onları da Türkiyədə müəyyən dairələrdə tanıyırlar. Misal üçün, Aygün, Röya, Brilliant... Amma sənətçilərimizin bütün Türkiyədə tanınması çətin məsələdir. Təkcə İstanbulda 26 milyon əhali var. Orda hər tindən bir müğənni çıxır ”.


Səidə Dadaşova: “Bizdə birlik yoxdur. Bakıya türk müğənnisi gələn kimi fanatları onu səs-küylə qarşılayırlar. Öz sənətçilərimizin konsertinə 100 manat vermirlər. Amma xarici müğənninin konsertinə 300-400 manat verib qaça – qaça gedirlər. İnsan gərək özünü dəyərləndirsin ki, ona da dəyər versinlər. Bundan sonra xaricdə tanınmaq olar”.


Prodüser Tolik (Tarix Əliyev): “Bizim müğənnilər xaricində tanınırlar. İlhamə Qasımovanı, Röyanı, Aygün Kazımovanı, Brilliantı bir də “Eurovision” təmsilçilərimizi tanıyanlar var. Siz elə bilirsiniz ki, dünya ölkələrinin hamısında Tarkanı, İbrahim Tatlısəsi tanıyırlar? Əlbəttə yox. Türkiyədə musiqi albomları satılan mağazada Röyanın diskini istədim. Dedilər var, tanıyırıq. Məgər bizim müğənniləri bütün dünya tanımalıdır?


Bilal Əliyev: “Məni bir çox ölkələrdə tanıyırlar. Tanımasalar, dəvət etməzlər. Demək olar ki, dünyanın hər bir ölkəsində olmuşam. 75 dəfə Almaniyada... Hər dəfə ora gedəndə konsert vermişəm. Bundan əlavə, Fransada, Belçikada, Avstriyada, İspaniyada və digər ölkələrdə konsertlərim olub. Həmin ölkələrin qəzetlərində barəmdə yazılar çıxıb. Rəşid Behbudovu, Aygün Kazımova və Röyanı da xaricdə tanıyırlar. Amma nə qədər tanıyırlar onu deyə bilmərəm. Mən xaricdə olanda onlar barədə məndən soruşublar. Bir ifaçının Avropada tanınması üçün gözəl səsi olmalıdır. Görünüşün də böyük əhəmiyyəti var”.


Bəstəkar Nailə Mirmmədli: “Azərbaycanda şou-biznes düzgün qurulmayıb. İfaçının savadlı olmalıdır ki, at oynada bilsin. Avropada tanınmaq üçün bir sistem olmalıdır. Əvvəllər Rəşid Behbudov, Müslim Maqomayev, Zeynəb Xanlarovanı tanıyırdılar. İndi isə tanınan yoxdur. Röya da təzəlikcə Türkiyə şou-biznesinə qatılıb. O, orada tanınacaq. Çünki Röya oxuyanda hər bir sözü dinləyiciyə çatdıra bilir. Beş dəqiqəlik mahnıda tamaşaçını öz tərəfinə çəkə bilir. Aygün də, Brilliant da istəsə tanına bilərlər”.

Elnarə Abdullayeva: “Müğənnilərin Avropada tanınması üçün küllü miqdarda pulu olmalıdır, bir də fərqli səsi. Bizdə fərqli səsi olan sənətçilərimiz yoxdur. Varsa, göstərin. Mən elə bir ifaçı tanımıram. Xaricdə tanınmaq istəyən estrada müğənnilərimiz boş-boşuna əziyyət çəkirlər. Burdakıların başını aldadırlar. Mən də gedim, bu dəqiqə Türkiyədə və ya digər ölkədə ev alım, sonra deyim ki, Azərbaycanı tərk eləmişəm. Nə olsun? Adama deməzlər ki, bu millətə nə “fason” verirsən? Millət sənə bundan artıq nə verməlidir ki? Fəxri ad da almısan. Sevin ki, səni toylara dəvət edirlər. Toylar sayəsində də pulunu qazanıb, bu millətin çörəyini yeyirsən.”

Rəşad İlyasov: “Avropada tanınmaq üçün yaxşı prodüser, vaxt, istedad və milyonlarla pul gərəkdir. Ölkədən kənarda yalnız “Eurovision” təmsilçilərimizi müəyyən qədər tanıyırlar. Bir də köhnə müğənnilərimizi. İndikilərdən tanınanı yoxdur.

Müğənni Nüşabə Ələsgərli: “Mənim fikrimcə, müğənnilərimizin Avropada tanınmaları üçün ilk növbədə çoxlu pul lazımdır. Azərbaycan deyil ki, 15-20 minlə nəsə layihə edəsən. Türkiyədə tanınmaq üçün 1-2 klip çəkdirib, mahnı oxumaq yetərli deyil”.