Fuad Poladov: “Bu haqda qəti fikir söyləmək çətindir”; Mehriban Xanlarova: “Mən belə şeyləri normal qəbul edirəm”; Həmidə Ömərova: “Mənə belə bir təklif gəlsə, qəbul etməzdim”; Ayaz Salayev: “Bir çox məsələləri kişi ilə qadın intim münasibətdə olmaqla həll etməlidirlər”
Əməkdar artist Vəfa Zeynalovanın “İlahi məxluq” filmində oynadığı açıq-saçıq səhnələrdən sonra azərbaycanlı aktrisaların erotik filmlərə çəkilib-çəkilməməsi cəmiyyətdə müzakirə edilən mövzulardan biridir. Bir qrup hesab edir ki, Azərbaycan qadınının belə bir açıq-saçıq səhnələri canlandırması həm milli-mənəvi, həm də islami dəyərlərimizə ziddir. Buna əks mövqedən yanaşanlar isə hesab edirlər ki, əsl sənətkar, əsl aktrisa üçün qapalı mövzular, qaranlıq qalan kadrlar olmamalıdır. Bəs görəsən, kino mütəxəssisləri, aktyorlar bu haqda nə düşünürlər?
Xalq artisti Fuad Poladov: “Əvvəla, ssenarini əvvəlcədən təsdiq edən Bədii Şura, Mədəniyyət Nazirliyi həmin səhnələri lazım bilmirlərsə onu ssenaridən çıxarırlar. Əgər Bədii Şura həmin epizodları ssenaridən çıxarmırsa, deməli, bunu rejissor çəkməlidir. Digər tərəfdən də həmin səhnə filmin süjet xəttinə uyğundursa və estetik baxımdan, sənət baxımından baxımlıdırsa, o zaman mən burda pis bir şey görmürəm. Ancaq ümumilikdə, mən bu suala birmənalı şəkildə cavab verə bilmərəm. Çünki azadlıq elə bir məfhumdur ki, bunu hər kəs öz bildiyi kimi başa düşür. Mən bu gün desəm ki, pis baxıram, o zaman həmin insanların azadlıqlarını əlindən almış oluram. Ona görə də bu haqda qəti fikir söyləmək çətindir. Ancaq ümumilikdə, həmin epizodlar filmin süjet xəttinə uyğundursa, bunu normal qəbul etmək olar”.
Xalq artisti Həmidə Ömərova: “Rejissor Bernardo Bertoluççinin ”Sonuncu imperator" filminə nəzər salsaq görərik ki, orda açıq-saçıq bir səhnə var, ancaq o səhnə elə çəkilib ki, orda heç nə başa düşülmür, amma eyni zamanda operatorluq və incəsənət nöqteyi-nəzərindən çox böyük zövqlə çəkilmiş bir əsərdir. Bu elə göstərilib ki, orada pornoqrafiyadan əsər-əlamət yoxdur. Ona görə də filmin məzmunu, süjeti naminə bunu eləmək olar. Məsələn, belə bir süjet qoyaq ki, vaxtilə bir uşağın ailəsinə təcavüz ediblər. Bunu uşağın gözü ilə göstərmək olar. Ancaq o səhnənin özünü yox, onu dolayısı ilə tamaşaçıya çatdırmaq lazımdır. Mən onun çılpaq şəkildə göstərilməsinin tərəfdarı deyiləm. O ki qaldı Azərbaycanlı bir aktrisanın açıq-saçıq səhnələrə çəkilməsinə, mən bunu istəməzdim. Çünki bu bizim mentalitetimizə uyğun deyil. Məsələn, mənə belə bir təklif gəlsə, bunu qəbul etməzdim".
Rejissor Ayaz Salayev: “Rejissor Yavər Rzayevin ”İlahi məxluq, filmindən sonra bu məsələ gündəmə gəlib. Buna görə Vəfa Zeynalovanın başına oyun açırlar. Mən də bu haqda öz mövqeyimi bildirmişəm, aktrisanı müdafiə etmişəm. Vəfa Zeynalova adıçəkilən filmdə öz peşəkarlığını göstərib. Əgər hər hansısa bir aktyor və ya aktrisa belə səhnələrdən imtina edirsə, bu onun qeyri peşəkarlığının göstəricisidir.
Bu gün Azərbaycan cəmiyyəti rejissorları xarici aktyorlarla işləməkdə ittiham edir. Azərbaycanlı bir aktrisa isə belə rollara çəkiləndə cəmiyyət bunu qəbul etmək istəmir. Niyə xarici bir aktrisa belə rollara çəkiləndə susuruq, özümüzdən kimsə çəkiləndə bunu qəbul etmək istəmirik? Bu təbii ki, natamamlıq kompleksindən yaranan bir etirazdır. Bu həmin etirazdır ki, qadın maşın sürəndə ona pis baxırlar, əyri baxırlar. Ancaq mən hesab edirəm ki, artıq ailələrdə ənənəvi münasibətlər sistemi dəyişib. Bu gün qadınlar iqtisadi cəhətdən daha çox müstəqillik əldə ediblər. İqtisadi müstəqilliyin artması da ənənəvi münasibətlərin dəyişməsinə gətirib çıxarır.
Mənim yadımdadır, 90-cı illərin əvvəllərində Şahmar Ələkbərovun “Sonsuz gecə” filmindən sonra qadın cəmiyyəti yığışıb piket keçirdilər. Çünki həmin filmdə qadın qəhrəman fahişədir. Onlar iddia edirdilər ki, bu filmdə qadınlar təhqir olunub. Ancaq zaman onların bu etirazının yanlış olduğunu göstərdi. Təbiətin özündə öz-özünü davam etmək qanunu var. Qadın-kişi münasibətləri də bu qanundan irəli gəlir, bu qanunun göstəricisidir. Cinsi münasibətləri, şəhvani hisləri cəmiyyət çox ləzzətlə qəbul edir. Bu da həyatın özü deməkdir. Həyatın özünü göstərməyə çalışan rejissor da təbii ki, orada qadın-kişi münasibətlərini, insanlar arasındakı şəhvani hissləri göstərməlidir. İnsanlar arasındakı ən mühüm münasibətlərdən biri də şəhvani, cinsi münasibətlərdi. Bir çox məsələləri kişi ilə qadın kafedə çay içə-içə yox, bir yastığa baş qoyaraq intim münasibətdə olmaqla həll etməlidirlər. Bu, normal bir şeydir. Ona görə də azərbaycanlı aktrisa da açıq-saçıq, erotik səhnələrə nəinki çəkilə bilər, hətta çəkilməlidir də. Və cəmiyyət də, insanlar da bunu normal qəbul etməlidir. Çünki sənət qadağaları sevmir, qadağalarla yaşamağa məhkum deyil".
Əməkdar artist Mehriban Xanlarova: “Mən bu sual qarşısında aciz qalıram. Çünki bu haqda danışan kimi, mətbuatda, sosial şəbəkələrdə mənə qarşı hücumlar olur. O dəqiqə facebook da başlayırlar ki, 65 yaşında qadın erotik səhnələrdən danışır. Əvvəla, mənim 65 yaşım yoxdur, 45 yaşım var, ikinci bir tərəfdən də bunun yaşa nə dəxli var? Ona görə də bu haqda danışmaqdan çəkinirəm. Ancaq bizim kişilərimiz öz arvad-uşaqları ilə oturub xarici filmlərdə belə açıq-saçıq səhnələrə baxırlar, hər şey yaxşıdır, əladır deyirlər. Azərbaycanlı bir aktrisa isə belə açıq-saçıq səhnələrə çəkilən kimi daş-qalaq edirlər, aləm dəyir bir-birinə. Ona görə də azərbaycanlı aktrisalar belə açıq-saçıq epizodlara çəkilməkdən qorxur. Bax bizim əsas bədbəxtçiliyimiz də bundadır. Xaricilər çəkəndə hər şeyin əla olduğunu deyirik, özümüz çəkiləndə tənqidə, təhqirə məruz qalırıq. Bu gün biz yaxşı film istəyirik, yaxşı aktrisa istəyirik. Ancaq o yaxşı aktrisa qaragüruhçuların tənqid-təhqirlərindən çəkindiyi üçün belə filmlərə getmir. Bizim bildiyimiz bir şey var bu bizim milli mentalitetimizə yaraşmır. Başqa bildiyimiz bir şey yoxdur. Bu da cəmiyyətimizin buna hazır olmadığının göstəricisidir. Mən belə şeyləri normal qəbul edirəm, aktrisa üçün qapalı mövzu, qaranlıq qalan kadrlar olmamalıdır. Əgər xarici filmlərdə belə səhnələrə baxırıqsa, niyə öz aktrisalarımız çəkilməsin?"