Əli Mirəliyev həmkarlarının qarasınca yenə əsib-coşdu

Tikanlı danışığı, yaratdığı qalmaqallar, atmacaları və müğənniləri tənqid etməsi ilə gündəmdən düşməyən müğənni Əli Mirəliyev yenə coşdu. O, virtualaz.org-un müxbiri ilə söhbətində şou-biznesin bəzi adlı-sanlı nümayəndələrini, öz sözü ilə desək, “ağ yudu, amma qara sərmədi”.

Amma Əli Mirəliyevin hədəfi bu dəfə təkcə həmkarları deyildi. Müğənni bu dəfə öz qüsurlarından da danışdı. Özü sual verdi, özü də cavablandırdı:

- Şərti şumda kəsək. Məndən soruşmayın ki, necəsiniz. Siz soruşmamış deyim də, bomba kimiyəm. Hal-hazırda bağdayam. İt-pişiklə, mal-qara ilə məşğul olub başımı qatıram. Həm də təqaüdçü adam başqa nə işlə məşğul ola bilər ki? Sadəcə arada müsahibə verirəm. Jurnalistlər gəlib müsahibələr alırlar.

- Niyə belə hirslisiniz, davakarsınız?

- Kim hirslidir? Bir adam tap göstər ki, tənqidi mənim kimi üzə deyir. Hamısı üzə gülüb dalda danışırlar. Mənim heç kimdən qorxum yoxdur deyə sözümü açıq-aşkar deyirəm. Mən bu qırılmışa baxıb necə əsəbiləşməyim? Bizim camaat öz gözündə tiri görmür, başqasında cöp axtarır. Tənqid etmə, inciləri tökülər. Cəhənnəmə tökülsün. Dərs götürmürlər sözümdən.

- Əli bəy, bəlkə həddən artıq tənqid elədiniz, daha sözünüz keçmir...

- Məmuru tənqidi qəbul edir ki, müğənnisi də qəbul eləsin?! Başa sala bilmirəm ki, ay başıboş, bir şey qanmırsansa danışma. Deyirəm, tənqid edirəm ki, bəlkə nəticə çıxarıb adam kimi oxusunlar. Şou-biznesdəkilərin 80-90 faizi oxumaqdan xəbəri olmayanlardır. Vaxt var idi ki, Brilliant Dadaşovanı özümlə toylara aparırdım. O qıza hər dəfə deyirdim ki, “indeyski” oxuma, sən azərbaycanlısan, əgər oxumaq yolunu seçibsənsə, öz musiqini öyrən və oxu. Belə oxumaq olmaz axı. Gah hind olur, gah türk. Bax, Brilliant da tənqidimi nəzərə almadı. Nə olsun ki, əməkdar, xalq artisti oldu?! Amma müğənni ola bilmədi. Gedir başından böyük şəxslərin əsərlərindən yapışır ki, oxuyum. Başlayır Ələkbər Tağıyevin, Emin Sabitoğlunun bəstələrinə özündən boğazlar yapışdırır. Başa düşmürlər ki, artıq boğazlar vurmaqla savadsızlıqlarını üzə çıxarırlar. Bəyənmirəm Brilliantı.

- Bu qədər uzaqdan-uzağa deməkdənsə, bəlkə bir məktəb açasınız...

- Sözümü eşitməyənlər dərsimi oxuyarlar? Faiq kimisi olsa, çox deyərəm hə, xərc çəkim, açım bu məktəbi. Faiqə bir dəfə irad tutdum. Getdi şedevr əsər oxudu, savadını sübut elədi. Yoxsa İzzət Bağırov kimisi mənim dərsimə gələr? İzzət neçə ildir oxuyur, hələ bilmir Azərbaycan mahnısı oxuyur, yoxsa türk, ərəb. İzzət avara bir musiqi ilə xalqın zövqünü korlayır. Bizim müğənnilər hələ gedib birinci əlifbanı öyrənsinlər. Mən kişiyəm, hər zaman da öz səhvimi başa düşmüşəm. Öz qüsurumu da bilirəm ki, dilim ağzımda böyükdür. Oxumaq istəyim çox idi. Buna görə də evdə güzgünün qabağında saatlarla məşq edirdim ki, qüsurum bilinməsin. Anam da deyirdi ki, özünü öldürmə, ay Əli, səndən müğənni olmaz. Amma mən oldum. Çünki səhvimin üzərində çalışdım. Sənətim də göz qabağındadır.

Aysel Talıbqızı