Kelli Klarkson sadə toy mərasimi ilə Brendon Blekstokla evlənib

Dünya Məşhur amerikalı pop-rok ifaçısı Kelli Klarkson ailə qurub. 31 yaşlı müğənni ötən həftənin bazar günü 35 yaşlı sevgilisi Brendon Blekstokla evlənib. Toy mərasimi Tennesi ştatının Neşville şəhəri yaxınlığında, mənzərəli bir oteldə keçirilib.

Dünən isə Kelli Klarkson bu barədə pərəstişkarlarına xəbər verib. Kelli Klarkson öz "Twitter" səhifəsində belə yazıb: "Mən rəsmi olaraq xanım Blekstokam. Biz Bləkberi Farmsda, dünyanın ən gözəl yerində evləndik." - sitatın sonu. Müğənni toy mərasimindən fotoşəkilləri də sosial şəbəkədə pərəstişkarları ilə paylaşıb. Gəlinin əynində dizayner Elis Temperlinin əl işi olan gəlinlik olub.

Kelli Klarkson öz həyat yoldaşı ilə 2006-cı ildə "American Country Music Awards" mükafatının təqdimetmə mərasimində tanış olub, lakin sevgili kimi son 2 ildə birlikdə olublar.