Mətbuatda Əmlak Məsələləri Dövlət Komitəsinin ( ƏMDK ) sədri Kərəm Həsənovun karyerasını bitirə biləcək bir olay barədə xeyli yazılıb.

Biz bu barədə geniş yazmaq istəmirik. Çünki bəhs edəcəyimiz “möhtəşəm maxınasiya” haqqında müxtəli mətbuat vasitələri bəhs edib. Bizi bu məsələdə konkret personajlar maraqlandırır. Ancaq oxuculara aydın olsun deyə qısa xatırlatma verək.

Yazılanlardan məlum olur ki, dəyəri 7 milyon dollar olan layihəni tenderdə udmaq üçün Türkiyənin “Kutlubey Harita İnşaat Mühendislik Sanayi Ticaret A.Ş” şirkəti ƏMDK sədri başqa olmaqla komitənin vəzifəli şəxslərinə böyük miqdarda rüşvət verib.

Ancaq tenderi udan şirkətin əsl sahibi Altan Çətinqaya olsa da prosesin uğurla başa çatması üçün xeyli pul xərcləyən və vasitəçilik edən şəxslər, belə demək mümkündürsə “gizli ortaqlar” olub. Əsas mübahisə odur ki, tender uğurla başa çatandan sonra “gizli ortaqları” kənarda saxlamaq istəyiblər.

Türkiyə tərəfdən “gizli ortaq” Türkmən Çayır adlı şəxsdir. Və bu şəxs anonim-gizli şəkildə deyil, açıq şəkildə mətbuat vasitəsilə öz davasını aparır.

Bizdə olan məlumata görə, uzun çəkişmələrdən sonra tərəflər razılığa gələrək Türkmən Çayırın “zəhmət haqqını” ( məbləğ bizə məlumdur ) ödəyiblər.

Ancaq ”gizli ortaqlar”dan digəri hələ də ona çatası məbləği ala bilmir. Bu şəxs Vüqar Hacıyevdir. Onun barəsində mətbuatda yazılanların siyasi tərəfi bizi maraqlandırmır. Məsələ belədir ki, əslində 7 milyon dəyəri olan bu tender-maxinasiyasında ən vacib şəxs Vüqar Hacıyevdir. Çünki şirkəti tapan da, Türkmən Çayırı bu prosesə qoşan da, onu Kadastr Xidmətinin rəisi Ramiz Quliyevlə tanış edən də və s. Vüqar Hacıyev olub. Hətta bəzi məlumata görə komitə sədri Kərəm Həsənovla birbaşa danışan da Vüqar Hacıyev olub. Yəni bu möhtəşəm maxinasiyanın arxitektoru Vüqar Hacıyevdir. Ancaq sonda bu şəxsi kənarda saxlayıblar. Yuxarıda qeyd etdiyimiz kimi Türkmən Çayır “öz payını” alaraq geri çəkilib. Amma Vüqar Hacıyevlə bağlı məsələ hələ də bitməyib.

Bizdə olan məlumata görə Vüqar Hacıyev dəfələrlə komitə rəhbərliyi səviyyəsində görüşüb və öz haqqını tələb edib. Ona söz veriblər ki, bir müddət sakit dayan… mətbuatdan uzaq ol və …sənin “summan” ( məbləğ bizə məıumdur ) yaxın vaxtlarda veriləcək. Ancaq bu günədək Vüqar Hacıyevə çatmalı olan məbləğ ödənilməyib.

İndi isə məsələnin digər ən biabırçı səhifəsinə nəzər salaq.

Qısaca bildirək ki, açıq tenderi “udmaq” üçün iştirakçı şirkətlərin sənədləri Türkiyə şirkətinə ötürülüb. Və bunu komitə sədri Kərəm Həsənovun göstərişi ilə Kadastr Xidmətinin rəisi Ramiz Quliyev icra edib.

Məlumat üçün onu da bildirək ki, Dünya Bankı Azərbaycanda daşınmaz əmlakın xəritəsini hazırlamaq üçün 70 milyon dollar vəsait ayırıb. Və bu layihədə iştirak etmək üçün xeyli əcnəbi şirkət tenderə qoşulub. Ancaq Komitənin rəhbərliyinə daxil olan şəxslər Dünya Bankının vəsaitindən imtina edərək 76 milyon manat vəsaiti dövlətdən alıblar. Nə üçün ?

Çünki Dünya Bankı tenderin şəffaf keçirilməsini tələb edirdi. Bu tenderdə xeyli sayda əcnəbi şirkət iştirak etməli idi və s. Kərəm Həsənovu isə şəffaf tender deyil, ayrılmış milyonlardan ona çatacaq “otkat” maraqlandırırdı. Ona görə də tenderi saxtalaşdıraraq yuxarıda adı çəkilən türk şirkətini qalib elan edir.

Yəqin ki, nə vaxtsa bu məsələ ölkə rəhbərliyinin də diqqətini cəlb edəcək və günahkarlar haqlı cəzalarını alacaqlar.

P.S. Yazı çapa gedərkən bizə məlum oldu ki, Vüqar Hacıyev komitə rəhbərliyi səviyyəsində yenidən görüşə çağrılıb.

Görüşün nəticəsi barədə növbəti yazıda məlumat verəcəyik.

Qafqaz Xəbər Agentliyi