Kreml Rusiyameylli müxalifət formalaşdırmaqla həm demokratik qüvvələri zəiflətmək, həm də öz maraqlarına xidmət edəcək adamları hakimiyyətə gətirmək niyyətindədir

gundemxeber.az Son vaxtlar Moskvada yaşayan azərbaycanlı oliqarxların Rusiya Azərbaycan Təşkilatları İttifaqı (RATİ) yaratması ölkə mətbuatının gündəmindən düşməyən əsas müzakirə mövzularından biridir. Hər bir mətbu orqan bu prosesin arxasında Rusiyanın maraqlarının olub-olmamasını və yaxud da «Milyarderlər ittifaqı»nın bir araya gəlməsinin səbəblərini araşdırmağa çalışır. Təbii olaraq bu zaman da ortaya çoxsaylı versiyalar çıxarılmaqdadır. Lakin bu günə qədər hələ də o sualın cavabı açıq qalıb ki, Putin nə üçün İlham Əliyevi hədəfə alıb? Moskva həqiqətənmi Azərbaycanda hakimiyyət dəyişikliyinin baş verməsində maraqlıdır?
Əlbəttə, bir çox ekspertlər də istisna etmirlər ki, RATİ-nin yaradılması məhz Rusiya prezidentinin maraqları çərçivəsində baş verib. Əks halda «Rusiyadakı azərbaycanlıların problemlərinin həll olunması məqsədilə birləşən» oliqarxların İlham Əliyev hakimiyyətinə qarşı çox sərt mövqe nümayiş etdirməsi nəyə lazım idi? Bu baxımdan görünən odur ki, azərbaycanlı oliqarxlar birbaşa Vladimir Putinin cızdığı ssenari əsasında hərəkət edir və hədəf həqiqətən də Azərbaycan hakimiyyətidir. Doğrudur, zaman-zaman «Milyarderlər ittifaqı»nın hakimiyyətdəki hansısa klana qarşı yaradıldığı ilə bağlı da mətbuat səhifələrində fikirlər səslənməkdədir. Lakin proseslərin gedişi onu göstərir ki, Rusiya Azərbaycanda bu və ya digər klanları əvəzləmək niyyətində deyil, Putinin hədəfi tamamilə fərqlidir.
Son illər regionda baş verən siyasi proseslər, xüsusən də ərəb inqilablarının yaşanması heç şübhəsiz, Rusiyanın maraqlarına xidmət etmir. Əksinə, inqilablar zəncirinin gec-tez Moskvanı da öz nəzarətinə alacağı şübhə doğurmur. Təbii ki, bütün bunlar Rusiya rəhbərliyi tərəfindən də çox gözəl dərk edilir. Odur ki, Putin hakimiyyəti onu gözləyən təhlükələrdən minimum zərərlə çıxmaq üçün öz siyasətində müəyyən dəyişikliklər etmək məcburiyyətində qalıb. Belə ki, Vladimir Putin Rusiyanın Cənubi Qafqazda öz mövqelərini gücləndirmək hədəfləri çərçivəsində Gürcüstandan sonra Azərbaycanla munasibətləri yaxşılaşdırmağı qarşıya məqsəd qoyub. Bəllidir ki, Gürcüstanda Bidzina İvanişvilinin hakimiyyətə gəlməsi Moskvanın maraqlarını qismən təmin etsə də, Azərbaycandakı proseslər heç də Rusiyanın istəkləri çərçivəsində inkişaf etmir. Kremldə bunu anlayırlar ki, İlham Əliyev iqtidarının gələcəyi yoxdur və Azərbaycanda 2013-cü ildə demokratik hakimiyyətin formalaşması ehtimalı kifayət qədər yüksəkdir. Şübhəsiz ki, bu da Rusiyanı narahat edən başlıca faktorlardan biridir. Ən azı, Gürcüstanda demokratik bir hakimiyyətin formalaşması təcrübəsi və Mixail Saakaşvilinin son 2 dönəmlik prezidentliyi illərində yürütdüyü siyasət göz önündədir. Bunun üçün Moskva Azərbaycanda da ikinci bir «Saakaşvili» problemi ilə qarşılaşmaqda maraqlı deyil. Məh bu səbəbdən Vladimir Putin «Milyarderlər ittifaqı»nın dəstəyi ilə Azərbaycanda Rusiyaya loyal münasibətdə olan yeni bir hakimiyyətin formalaşmasına çalışır. Çox güman ki, məlum «WikiLeaks» qalmaqalından sonra İlham Əliyevlə Vladimir Putinin şəxsi münasibətlərinin kifayət qədər gərginləşməsi də bu məsələdə az rol oynamayıb. Çünki belə olmasaydı, Rusiya da bir sıra Qərb ölkələri kimi Azərbaycanda sadəcə hakimiyyətdə olan klanları dəyişməklə İlham Əliyevin növbəti dönəm üçün prezident postunda oturmasına «yaşıl işıq» yandırardı. Lakin proseslər onu göstərir ki, Moskva Azərbaycanda köklü hakimiyyət dəyişikliyinin baş verməsində maraqlıdır və bu məsələdə Qərbə meylli demokratik müxalif qüvvələrdənsə Rusiyanın maraqlarına daha yaxın siyasi qrupun hakimiyyətə gəlməsinə çalışır.
Yuxarıda sadalananlardan belə qənaətə gəlmək olar ki, dolayısı ilə «Milyarderlər ittifaqı» həm də Azərbaycandakı müxalif qüvvələri parçalamaq üçün gündəmə gətirilib. Yəni Kreml azərbaycanlı oliqarxların pulu ilə ölkədə Rusiyameylli müxalifət formalaşdırmaqla həm demokratik qüvvələri zəiflətmək, həm də öz maraqlarına xidmət edəcək adamları hakimiyyətə gətirmək niyyətindədir…

Turqut