Ukrayna hüquq mühavizə orqanları azərbaycanlı siyasi qaçqınları "satıb"?

"Biz siyasi mühacirət alsaq da burada da bizə yaşamağa imkan vermirlər". Bunu son açıqlamasında "Silahlı Qüvvələrə Nəzarət Mərkəzi " İctimai Birliyinin sədri Ələkbər Məmmədov deyib. Qeyd edək ki, Ələkbər Məmmədov bir neçə ay öncə, əsgər ölümləri və əsgər daxili orqanlarının satılması ilə bağlı araşdırmalarına görə, hədələndiyini bildirərək, ölkəni gizlin şəkildə tərk etmişdi. Həmin zaman hüquq müdafiəçisinin qızının boğazına bıçaq dirəyib qorxutmaları haqda da məlumatlar yayılmışdı. Ələkbər Məmmədovun bildirdiyinə görə, onun və bir vaxtlar mətbuatda adı mütəmadi olaraq çəkilən keçmiş polis moyoru Emin Əhmədbəyovun ailəsi Ukraynada yerləşsələr də bəzi qüvvələr yenə də onlardan əl çəkmirlər. " Bir neçə ildir ki, Azərbaycan mətbuatında polis mayoru Emin Əhmədbəyovun tamamilə haqsız və qanunsuz olaraq həbsə atılması haqda materiallar səngimirdi. Onun həyat yoldaşı, polis zabiti Nigar Əhmədbəyova gözlənildiyinin əksinə olaraq, həbsə atılmış ərinin hüquqları uğrunda, sözün həqiqi mənasında müharibə aparırdı.
Nəhayət, mayor Emin Əhmədbəyov azad edildi, amma ona qarşı təqiblər səngimədi. O, ailəsini də götürüb bizimlə bərabər ölkədən qaçmağa məcbur oldu... Hər iki ailə müvəqqəti olaraq Ukraynada yerləşib və bu ölkədəki BMT nümayəndəliyinə sığınaraq üçüncü ölkəyə getmək üçün qeydə alınmışıq. Indi biz rəsmən qaçqın statusundayıq. Amma Azərbaycanın hüquq-mühafizə orqanları Ukraynada olan həmkarlarına qeyri-rəsmi sorğu göndərərək, bizim orada yerləşdiyimiz ünvan məlumatlarını əldə ediblər. Əlbəttə, Ukrayna da o ölkələrdəndir ki, orada rəsmi qurumlarla qeyri-rəsmi ilişgilər qurmaqla istənilən əməliyyatı həyata keçirmək mümkündür. Hətta bir sıra Qərbi Avropa ölkələrində belə, “kürü diplomatiyası” işə yarayırsa, Ukraynada kürüyə ehtiyac qalmır və məsələni daha rahat həll etmək mümkündür. Buna görədir ki, məsələn, Emin Əhmədbəyovun, hətta əlaqə telefonlarını belə, əldə edərək, ona ciddi hədə-qorxu gəlməyə başlayıblar". Ələkbər Məmmədov bildirib ki, təzyiq və təhdidlər qarşısında duruş gətirə bilməyərək ölkədən qaçmağa məcbur olduqları halda onlar haqqında bu qədər müfəssəl məlumat hüquq-mühafizə orqanlarına nə üçün gərəkdir - bu, aydın deyil. "Aydın olan budur ki, naməlum telefon zənglərini də işə əlavə etsək, prosesin kökündə qətiyyən sağlam epizod dayanmır. Həm də, rəsmi qurumlar bu bilgiləri qeyri-rəsmi yollarla əldə etməyə üstünlük verirlərsə, deməli, bu ailələrin taleyi tamamilə tükdən asılıdır"