Prezident sərəncamlarının icra olunmaması
açıq-aşkar korrupsiyanın mövcudluğundan xəbər verir

Bir necə gün əvvəl Prezident İlham Əliyev Bakı, Gəncə və Sumqayıt şəhərlərində çoxmənzilli binaların lift təsərrüfatının maddi-texniki bazasının möhkəmləndirilməsi məqsədi ilə Azərbaycan Respublikasının 2013-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan ilkin olaraq 7,0 (yeddi) milyon manat, o cümlədən Bakı Şəhər İcra Hakimiyyətinə 5,0 (beş) milyon manat, Gəncə və Sumqayıt Şəhər İcra Hakimiyyətlərinin hər birinə 1,0 (bir) milyon manat ayrılması haqqında sərəncam verdi.
Anoloji olaraq 2008-ci il dekabrın 23-də prezident İlham Əliyev “Şəhər və rayon mərkəzlərində olan binalarda lift təsərrüfatının maddi-texniki bazasının möhkəmləndirilməsi haqqında“ sərəncam imzalayıb. Sərəncamın icrası üçün Prezidentin Ehtiyat Fondundan Bakı şəhər İcra Hakimiyyətinə (BŞİH) 10 milyon manat məbləğində və həmin ildə Mənzil-kommunal təsərrüfatının maddi-texniki təchizatının yaxşılaşdırılması ilə əlaqədar əlavə tədbirlər haqqında sərəncam imzalamışdı. Sərəncamda göstərilən vəzifələrin yerinə yetirilməsi üçün şəhər və rayon icra hakimiyyətlərinə xüsusi təyinatlı kommunal texnikasının mərkəzləşdirilmiş qaydada alınması məqsədilə 2008-ci il dövlət büdcəsində nəzərdə tutulmuş Prezidentin Ehtiyat Fondundan Bakı şəhər İcra Hakimiyyətinə 14 (on dörd) milyon manat məbləğində vəsait ayırmışdı. Ümumilikdə, lift təsərüffatının maddi-texniki bazasının möhkəmləndirilməsi üçün Bakı Şəhər İcra Hakimiyyətinə 2005-ci ildə 600 min manat vəsait ayrılmışdısa, 2008-ci ildə bu rəqəm 10 milyon manat, bu il isə 7 milyon manat olmuşdur.
Bu gün hamiya bəllidir ki, xalqın küllü miqdarda vəsaiti ayrı-ayrı qurumlara ayrılsa da işlər deyildiyi kimi tam və keyfiyyətlə yerinə yetirilmir. Elə Mənzil Kommunal Təsərüffat birliklərinin gördükləri işləri təhlil etsək görərik ki, yaşayış binalarının istər dam örtüklərinin yenilənməsi, istərsə də binaların giriş hissələrinin, lift təsərüffatının təmiri əhalinin şəxsi vəsaitləri hesabına həyata keçirilir. Baxmayaraq ki, hər mənzilin sahəsinə və hər mənzildə qeydiyyatda olan vətəndaşların hər birinə görə mənzil kommunal birliklərinin hesabında müvafiq aylıq ödənişlər edilir.
Sərəncamlar isə natamam və keyfiyyətsiz icra olunur. Sanki bütün bu vəsaitlər xalqın rifahına, rahatlığına xərclənir. Təkçə paytaxtda yüzlərlə binada dam örtüyü və lift sistemi yenilənməli və əsaslı təmir olunmalı, istlik təchizatı sistemi qurulmalıdır. Ayrılan vəsaitlərə hətta binaları yeni liftlərlə təmin etmək mümkündür. İstilik sistemləri müasir texnologiya ilə qurula bilər. Amma bu, baş verərsə yeyinti mənbəyi qalacaqmı?
Prezident sərəncamlarının icra olunmaması açıq-aşkar korrupsiyanın mövcudluğundan xəbər verir. Lakin bununla bağlı heç bir səlahiyyətli qurum nəzarət funksiyasını ədalətli yerinə yetirərək, baş vermiş korrupsiya faktını üzə çıxartmır. Xalqın pulunu dolayı yollarla mənimsəyən məmurlar cəzalandırılmır.
Bir sual yaranır ki, Prezidentin Ehtiyat Fondu hansı pulların hesabına formalaşır? Əlbəttə, xalqa məxsus sərvətlərin hesabına. Əgər xalqa məxsus pullar regionların sosial iqtisadi inkişafına və xalqın rifah halının yaxşılaşdırılması üçün ayrı-ayrı icra orqanlarına ayrıldığı halda, nəyə görə KİV vasitəsi ilə görülmüş işlərin rəsmi hesabatları xalqa təqdim edilmir? Əgər şəffaflıq varsa, niyə bü günə qədər də ictimai nəzarət komissiyaları yaradılmayıb? Xalın pulları necə xərclənir? Bütün bu suallar illərdir ki, cavabsız qalıb. Unutmaq lazim deyil ki, hakimiyyət xalqın pullarını qənaətlə xərcləməli, xərclərin hesabatını xalqa verməyə borcludur.

İsmayıl Məmmədov