Mərdanov getsə də, «koska»sı hələ də fəaliyyətdədir!

Hörmətli oxucularım xatırlayar ki, mən hələ bir neçə ay bundan əvvəl təhsil naziri cənab Misir Mərdanova «əlvida» demişdim (bir sıra elektron KİV-də dərc olunmuş «Misir ağa, davay do svidaniya» şerini xatırlayın).O zaman şerə şərh yazan bir xanım mənə irad tutmuşdu. Yazmışdı ki, ay Mirzə, sən Mərdanova «do svidaniya» deyirsən, amma o, getmək fikrində deyil axı - hələ çox işlər görmək əzmindədir. Mən də yazdım ki, bilirəm xanım, özü getməyəcək, onu aparacaqlar! Təəssüf ki, sonradan yanıldığımı anladım - Mərdanovu «aparmadılar», əksinə, Azərbaycanın acığına, onu Riyaziyyat İnstitutuna direktor qoyub, hələ bir elmi şuraya sədr də seçdirdilər. İndi fürsət düşmüşkən, bu «yanlış»ıma görə hörmətli oxucularımdan və həmin xanımdan üzr istəyirəm! Görünür ki, Mərdanov tez-tez «naziri prezident təyin və azad edir» fikrini təkrarlamaqla, demək istəyirmiş ki, mən tək deyiləm -məndən qüdrətli «şərik»lərim var...
«Əlvida» deyərkən, heç də düşünmürdüm ki, M.Mərdanov gedən kimi təhsil sistemində hər şey qısa müddətdə düzələcək - bu, sadəlövhlük olardı. Çünki Mərdanov ünvanlı nazir ölkənin təhsil sistemində çox çevik-mobil bir «koska» yaratmışdı(mafiyanın jarqon sözüdür - müəyyən məkanda bir neçə mafiya «ailə»sini birləşdirir). Sistem üzrə cari vəziyyəti pozitivə doğru dəyişmək üçün gərək idi ki, həmin «koska»nın fəaliyyətinə birdəfəlik xitam verilsin. Ümudliyəm ki, bu, belə də olacaq, çünki atalar demiş «qaradan artıq qara olmaz».
Bununla belə, böyük təəssüf hissi ilə qeyd etmək istəyirəm ki, Mərdanov «koska»sı hələ də öz dağıdıcı fəaliyyətini böyük müvəffəqiyyətlə davam etdirməkdədir. Bu da başa düşüləndir - görünür, bu «şayka» artıq son günlərini yaşadığını anlayır. Fəqət, onların fəaliyyətdə olduğu hər bir gün Azərbaycanın təhsil sisteminə öldürücü zərbə vurur, sahə üzrə proqresi onillərlə geriyə atır! Bunun fərqində olmaq gərəkdir!
Bu günlərdə Təhsil Problemləri İnstitutunun (TPİ) rəbərliyi ilə müstəqil ekspert Əlövsət Osmanlı arasında yaşanan biabırçı olay yazdıqlarıma parlaq misal ola bilər. Ə.Osmanlı riyaziyyat üzrə kurikulum («kukarekulum» yox ha!) deyilən «naməlum»un müzakirəyə çıxarılmasını tələb edərkən, açıq şəkildə, «burada mindən çox səhv var» deyərək, hər cür keyfiyyətdən uzaq bu zay məhsula barmaq tuşlayır, TPİ-nun rəhbərliyi (şəxsən Abdulla Mehrabov) isə diqqəti müzakirədən, deməli «min səhv»dən yayındırmaq istiqamətində hər cür məzhəkəyə baş vurur, həm də bundan heç utanıb-çəkinmir! Amma əksinə olmalı idi - TPİ və ümumilikdə, Təhsil Nazirliyi Əlövsət Osmanlıya təşəkkür etməli idi ki, kişi öz qiymətli vaxtını sərf edib, onların ortaya qoyduğu «zay»ı müzakirə etmək istəyir. Bu, bircə şərtlə olardı - TPİ və Təhsil Nazirliyinin məsul işçiləri həmin «zay»ın ərsəyə gəlməsində və bu zaman baş vermiş kriminal çalışmada iştirakçı olmayaydı! Təəssüf ki, cərəyan edənlər bunun əksini ortaya qoyur...
M.Mərdanova «əlvida» deyərkən, anlayırdım ki, təkcə onun getməsilə heç nə dəyişməyəcək. Amma bu, bir başlanğıc ola bilərdi və ola bilər. Bilirdim ki, Mərdanov gedəndən sonra da Təhsil Nazirliyi adlanan bu struktur gündə üç dəfə suya girib, qüsl etsə də, onun kabinet və dəhlizlərini sarmış «bataqlıq üfunəti» çəkilib gedəsi deyil. Gərəkdir ki, bu üfunətin mənbələri sözügedən məkandan uzaqlaşdırılsın...
Nadir İsrafilov bir neçə gün öncə dərc olunan yazısında bildirir: «Məktəblərdə baş verən bu cör olaylarda valideynləri suclayan, həmişə təhsilimizdə hər şeyin əliyül-əla olduğunu deyən, yetənə yetib, yetməyənə daş atan Bayram Hüseynzadə hələ də öz yerindədir. Özü də Təhsil Nazirliyi sistemində iki məsul vəzifə daşıyır».
Yuxarıdakı abzasda barmaq tuşladığım ünvanlardan biri, hətta ən «görkəmlisi» elə həmin Bayram Hüseynzadədir! Onun naqis fəaliyyəti barədə ən müxtəlif səviyyələrdə, qədərindən də artıq deyilib, yazılıb. Bu şəxs Təhsil Nazirliyindən və qəzet redaktorluğundan tamamilə uzaqlaşdırılmayınca, geniş ictimaiyyətə, ayrı-ayrı görkəmli şəxslərin ünvanına hədyanlar «püskürmək»dən əl götürməyəcək! Nədən ki, «xəmiri belə yoğrulub»...
İnanıram ki, hörmətli M.Cabbarov bütün bunların fərqində olacaq - Təhsil Nazirliyi ilə Azərbaycan cəmiyyəti arasında sağlam-konstruktiv, qarşılıqlı hörmətə söykənən əməkdaşlığın əsasını qoymaq yolunda ilk növbədə, Bayram Hüseynzadəni «yola salacaq».

Mirzə AĞ