Onlar Tarif Şurasının qapısını "döyməyə" hazırlaşırlar
Azərbaycanın bir çox ali məktəblərinin rəhbərliyi təhsil haqlarının artırılmasını istəyir. Onların bununla bağlı Tarif Şurasına (TŞ) müraciət etməsi gözlənilir. Məlumatı redaksiyamıza etibarlı mənbə verib. Mənbənin deməsinə görə, bəzi rektorlar hələ ilin əvvəlindən avdıçəkilən quruma təhsil tarifləri ilə bağlı müraciət etmək niyyətində imişlər. Amma bu ilin seçki ili olduğu və vətəndaşlarda narazılıq yaradacağı nəzərə alınaraq belə bir niyyətdən imtina olunub. Bununla belə, ilin sonundan haqqında danışılan müraciətlərin TŞ-yə ünvanlanacağı gözlənilir.
Qaynaq bildirib ki, hələ iki il əvvəl Dövlət Dillər Universitetinin rektoru Səməd Seyidov sözügedən ali məktəbdə təhsil haqlarının artırılması üçün Tarif Şurasına müraciət etmişdi. Onun ardınca daha bir universitet rektorunun da eyni addımı atdığını xatırladan mənbəmiz onların bunu rəhbərlik etdikləri ali təhsil müəssisələrinin xərclərini tam ödəyə bilməmələri ilə izah etdiyini söyləyib. Amma Şura həmin vaxt universitetlərin təkliflərinə cavab vermədi.
Qeyd edək ki, 2011-ci ildə Nazirlər Kabineti (NK) tərəfindən təhsil ödənişlərinin birdənbirə 2 dəfəyədək artırılması ictimaiyyətdə kəskin narazılıqla qarşılanmışdı. O zaman, NK bu addımı ali məktəb rəhbərliklərinin müraciəti əsasında atdığını açıqlamışdı. Halbuki, qanunvericiliyə görə, təhsil tariflərinin müəyyənləşməsi İqtisadi İnkişaf Nazirliyi yanında Tarif Şurasının səlahiyyətindədir. Qurum isə Təhsil Nazirliyinin (TN) təklifləri əsasında qərar çıxara bilər. Çünki ölkənin təhsil siyasətini TN müəyyən edir. Mənbəmizin sözlərinə görə, Təhsil Nazirliyinin nəzdində akreditasiya şöbəsi fəaliyyət göstərir. Həmin şöbə ali məktəblərdə tədrisin keyfiyyətini qiymətləndirir. Əgər hər hansı bir ali təhsil müəssisəsində müəyyən istiqamət üzrə ixtisaslarda qiymət artımına zərurət yaranarsa, bununla bağlı Tarif Şurasına universitet deyil, Təhsil Nazirliyi müraciət edə bilər. Lakin indiyədək bununla bağlı paradoksal vəziyyət hökm sürüb: rektorlar nazirliyin başı üzərindən bir neçə dəfə təhsil haqlarının artırılması yönündə cəhdlərdə bulunublar.
Mənbəmiz bildirib ki, yeni təhsil naziri təyinatından sonra rektorlar növbəti dəfə təhsil haqlarının artırılması məsələsini gündəmə gətirmək fikrinə düşüblər. Bu barədə bir neçə rektorun öz aralarında razılığa gəldiyini deyən mənbəmiz onların yeni təhsil naziri ilə də məsələni müzakirə etdiklərini bildirib. Müsbət cavab alan rektorlara seçkidən sonrakı dövrü gözləmək məsləhət görülüb. Seçki dövründə ali təhsil məktəblərinin rəhbərlərinin üzərinə ciddi iş düşəcək. Onlar iqtidarın payızdakı seçkidə qələbəsinin təmin olunmasında, öz tələbələrinin hakimiyyət əleyhinə proseslərə qoşulmasını önləməkdə həlledici rollardan birini oynayacaqlar. Bu mənada bəzi rektorların, məhz "təhsil haqlarının artırılması" ilə bağlı qərar çıxararaq mükafatlandırılması ehtimalı da yetərincə yüksəkdir.
Ülviyyə Qasımlı