Norveçin Azərbaycandakı Səfirliyi ölkəmizə qarşı açıq hörmətsizliyə yol verib.

gundemxeber.az-in “Ölkə.Az”a istinadən məlumatına görə, 24-29 may 2018-ci il tarixində Helsinkidə “Finlandiya-Azərbaycan Elm və Təhsil Forumu” adlı elmi-təcrübə proqramını həyata keçirmək üçün Finlandiyaya səfər etmək istəyən və 39 nəfərdən ibarət Finlandiya-Azərbaycan Elm və Təhsil Forumunun Təşkilat Komitəsinin üzvləri və iştirakçıları viza almaq istəyən zaman Norveçin Azərbaycandakı Səfirliyinin kobud rəftarı ilə üzləşiblər.

Finlandiya-Azərbaycan Elm və Təhsil Forumu Təşkilat Komitəsinin və iştirakçılarının müraciətini olduğu kimi təqdim edirik:

“Avropanın və dünyanın təhsildə qabaqcıl ölkələrindən biri olan Finlandiyada elm və təhsil sahəsində təcrübəmizi artırmaq məqsədilə Azərbaycandan bir qrup təhsil işçiləri, məktəb direktorları və müəllim heyəti ilə birlikdə Finlandiyanın paytaxtı Helsinkiyə səfər etməyi planlaşdırırdıq. 24-29 may 2018-ci il tarixində Helsinkidə “Finlandiya-Azərbaycan Elm və Təhsil Forumu” adlı elmi-təcrübə proqramı həyata keçirməyi qərarlaşdırdıq. Bu səfərin əsas məqsədi dünyada elm və təhsildə keyfiyyət deyildiyində ilk ağıla gələn Avropa ölkələrindən birinin təcrübəsini öyrənməkdən, həmçinin Avropa ilə Azərbaycan arasında mədəni və elmi münasibətlərin inteqrasiyasına kömək etməkdən ibarət idi.

Biz heç bir zaman təsəvvür edə bilməzdik ki, dünya xalqlarına mədəniyyət aşılamağı özünə missiya kimi görən Avropa İttifaqı üzvü bir ölkə məhz multikultural dəyərlərdən, insan münasibətlərindən, qeyri-rəsmi informasiyaları doğru informasiya kimi təqdim etməkdən utanmayacaq. Norveç Krallığının Azərbaycanda yerləşən səfirliyi ümumbəşəri ali dəyərlərə hörmətsizcə yanaşaraq, cəmiyyətdə Avropaya qarşı olan inamı sarsıtdı və bunun ən dəhşətlisi isə Avropa İttifaqının ölkəmizə yaraşmayan ifadə və davranışlarını göstərdi. Belə ki, Finlandiyaya getmək üçün viza müraciəti etdiyimiz Norveç Krallığının Azərbaycandakı səfirliyi vizaya imtina üçün bizə bir neçə əsas səbəb göstərmişdir. Nəzərinizə çatdırmaq istəyirik ki, bu səbəblərin hər biri əsassız iddialardır. Səfirlik yazılı olaraq iddia edir ki, Finlandiyadan göndərilən dəvət məktublarını araşdırmaq üçün Finlandiya-Azərbaycan Assosasiyası ilə heç bir halda əlaqə (telefon və ya email) saxlamaq mümkün olmamış, Espo şəhərində yerləşən və səfər zamanı getməyi planlaşdırdığımız Juvanpuisto School adlı orta məktəbdən cavab verilməyib.
Norveç səfirliyi tərəfindən adiyyatı qurumlara heç bir sorğu göndərilməmiş, telefon, faks və ya e-mail göndərilməyib. Əsassız səbəblərdən 39 nəfərdən ibarət təhsil işçilərinin Avropa ölkəsinə səfərinə ciddi cəhdlə əngəl törədib. Xüsusilə imtina məktublarında yazılan bir neçə məqamda azərbaycanlıların hər zaman ölkəni tərk etmə istəyinin olduğunu, bizi bu ölkəyə bağlayan heç bir səbəbin olmadığını vurğulamaqla ölkəmizin təhsil işçiləri təhqir olunub. Hər zaman insan haqlarından danışan Norveç Krallığı imtina məktubunda Azərbaycanda ictimai, siyasi və maliyyə problemlərinin olduğunu və bu səbəbdən azərbaycanlıların öz ölkələrini tərk edib başqa ölkələrdə yerləşdiyini vurğulayıb. Həmçinin, məktubda bildirilir ki, azərbaycanlı təhsil işçilərinin Finlandiya Forumunda iştirakı və rolu vacib deyil. Qərəzli yanaşmalar sərgiləyən səfirlik adi diplomatik-etik qaydalarada əməl etməyib və öz missiyasını aşaraq ölkəmizin daxili işinə müdaxilə edib.

Ciddi əsas olmadan vizalar üçün imtina məktubuna qeyri-rəsmi iddialarını qeyd edən Norveç Krallığının Azərbaycanda yerləşən səfirliyini Avropa İnsan Haqları Məhkəməsinə şikayət edəcək, hüquqları pozulmuş müəllimlərin haqlarını müdafiə edəcəyik.

Bildirmək istəyirik ki, bu xoşagəlməz situasiyalar qarşılığında Avropanın qonşuluq, humanizm, təhsil sahəsində qarşılıqlı münasibətlərin inkişafı və mədəni əlaqələrin qurulmasına kölgə salınmışdır. Eyni zamanda, bu qeyri-qanunu davranış təşkilatçı qurumun haqqında mənfi rəy formalaşdırmış, neçə illər ərzində əldə etdiyi etibarına böyük mənəvi zərər vurmuşdur. Səfirlikdən cavab məktubunun gecikdirilməsi və təyyarə uçuşuna son 32 saatdan daha az bir vaxtda məlumatın verilməsi şirkətin zərərini artırıb.

Bütün bunların ən acınacaqlısı olan isə çox sayda azərbaycanlı təhsil işçilərinin, Avropa ölkələrinin və səfirliyin də məktubunda ifadə etdiyi kimi dünyaya insani münasibətləri, insan hüquqlarının təbliğatçısı kimi görünən Avropanın imicinə ciddi xələl gəlib. Burada 39 nəfər müəllim demək hər gün onlarla sinifə daxil olan, yüzlərlə şagirdə elmi-bəşəri dəyərləri təbliğ edən canlı insan faktoru deməkdir. Bu xoşagəlməz hadisə onların mənəvi hislərini olduqca sarsıtmış, qarşılaşdıqları bu hadisədən çox məyus olublar”.