Yeni səfərbərlik xidməti baş verən faciələri araşdırmaqda maraqlı görünmür

gundemxeber.az Azərbaycan Ordusunda intiharların və əsgərlərin xəstəlikdən dünyasını dəyişməsi halları çoxalıb. Təkcə son bir ay ərzində bir neçə gənc əsgərimiz müxtəlif xəstəliklərdən dünyasını dəyişib. Maraqlıdır ki, həyatını itirənlərin əksəriyyəti bir ayın əsgərləridir. Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) yerli şöbələrində yoxlamadan keçən xəstə gənclər sağlam adı altında orduya göndərilir və bir müddətdən sonra hərbi hissədə həyatla vidalaşmalı olurlar.
Bir neçə gün əvvəl Müdafiə Nazirliyinin (MN) Sumqayıtda yerləşən "N" saylı hərbi hissəsində əsgər ölümü qeydə alındı. Bir ay əvvəl SHXÇDX-nın Yevlax rayon şöbəsindən həqiqi hərbi xidmətə çağırılan əsgər İbrahimov Bəylər Elman oğlu xəstəlikdən dünyasını dəyişib. Bundan qabaq isə MN-in "N" saylı hərbi hissəsinin əsgəri, 2012-ci ilin iyul ayında SHXÇDX-nın Şəmkir rayon şöbəsindən həqiqi hərbi xidmətə çağırılan, 1994-cü il təvəllüdlü Novruzov Elşən Nəriman oğlu avqustun 29-da Silahlı Qüvvələrin Baş Klinik Hospitalında vəfat etmişdi. 1990-cı il təvəllüdlü Rəşad Mirzəliyev də xəstəlikdən dünyasını dəyişib. Göründüyü kimi, hərbi xidmətə getdiyi heç bir ay olmayan gənclər hansısa xəstəliklərə görə həyatlarını itirməli olurlar. Onların ölümünü araşdıranda isə məlum olur ki, SHXÇDX-nın yerli şöbələri vaxtında həmin gəncləri lazımi qaydada tibbi müayinədən keçirməyiblər. Buna görə də əsgər ölümlərinin sayında son illərlə müqayisədə artım baş verib.
Hərbi hissələrdə baş verən bu cür halları daha çox həkimlərin səhlənkarlığı ilə əlaqələndirən hərbi ekspertlər hesab edir ki, orduda belə hadisələr əlbirlik, işbirliyi nəticəsində baş verir. Belə ki, həkimlərin işlərinə səhlənkar yanaşmaları burda öz sözünü deyir.
"Hərbi xidmətə çağırış artıq Müdafiə Nazirliyinin tabeliyindən çıxıb. Bir müddətdir ki, sözügedən vəzifəni Səfərbərlik və Hərbi Xidmətə Çağırış üzrə Dövlət Xidməti həyata keçirir. Artıq bu müstəqil qurumdur. Təbii ki, bundan sonra belə hallar baş verəndə yeni qurum günahlandırılacaq. Çağırışçılar hərbi xidmətə getməzdən öncə bir neçə dəfə həkim nəzarətindən keçirlər. Gənc əsgərlər istər ali, istərsə də orta məktəblərdə və ən sonda komissarlıqda tibbi müayinədən keçirlər". Ekspertlər deyir ki, bütün bu müayinələrə baxmayaraq, hərbi xidmət müddətində həmin əsgərlərin səhhətində əvvəlcədən olan xəstəliklər üzə çıxır. Təbii ki, həkimlərin vəzifələrinə soyuq yanaşmaları nəticəsində çağırışçılar tam yoxlanılmırlar. Həkimlər sanki planı yerinə yetirmək üçün müəyyən xəstəliklərə göz yumurlar. Həmin səhv nəticəsində əsgərlikdə belə hallar baş verir. Belə olan halda əsas vəzifə prokurorluq və məhkəmə orqanlarının üzərinə düşür. Yəni həmin qurumlar araşdırma aparmalı, günahkarlar müəyyən olunmalı və məhkəməyə verməlidir".
Ekspertlər bu məsələdə həm də SHXÇDX rəhbəri Arzu Rəhimovu təqsirli sayırlar. Onların sözlərinə görə, xidmətin yerli şöbələrində vəziyyət dözülməz həddə çatıb. Hərbi xidmətə çağırılan gənclər həkimlər tərəfindən istənilən səviyyədə yoxlanılmır. Və bəzən xəstə gənclərə "sağlamdır" arayışı verərək onları xidmətə göndərirlər: "Bu işlərə Arzu Rəhimovun nəzarəti demək olar ki, yoxa bərabərdir. Xidmətin yerlərdəki şöbələrində bəzi vəzifəli şəxslər rüşvətə, korrupsiyaya yol verirlər. Bir ayın əsgərləri məhz belə insanların səhvi ucbatından həyatını itirir".
Hərbi komissarlıqlar ləğv olunanda düşünürdük ki, artıq bu sahədə olan nöqsanlar aradan qaldırılacaq. Lakin Arzu Rəhimovun rəhbəri olduğu SHXDÇX-da daha böyük qanunsuzluqlar mövcuddur. İnanmaq istərdik ki, əsgər ölümləri ilə bağlı məsələ yuxarı dairələrdə müzakirə olunacaq və səhvi olan şəxslər layiqli cəzasını alacaqlar.

Fuad Nəzərli