Yayın əvvəlində Jennifer Lopez və Ben Affleck 17 il sonra yenidən bir araya gəldilər. Sosial şəbəkələrdə çox sayda adam bununla bağlı nostalgiya dolu statuslar yazdı, məşhurların həyatı müzakirə edildi və hətta mədəniyyət sferasına aid müxtəlif növ analizlər ortaya çıxdı.

Lopez və Affleck Hollivudun ulduz cütlüklərindəndirlər, ona görə də tabloidlər və "Tvitter" bu xəbərə reaksiyasız qala bilməyib ciddi səviyyədə vəcdə gəldilər.

Amma, ola bilsin, insanların heyranlığının ən sadə səbəbi Jennifer Lopezlə Ben Affleck-in barışmasının "ulduz şaiyələri" kateqoriyasına aid olmamasıdır. Deyəsən, onlar yenə bir-birilərini sevirlər.

Köhnə sevgiyə qayıtmaq bir çoxları üçün münasibətlərin əsas hissəsini təşkil edir. Amma bu, mənfi nəticələrə gətirib çıxara (Belə uğursuz qayıdışlar barədə çoxbilmiş dostlarınız sizə xeyli tarixçə danışa bilər), hətta kabusa çevrilə bilər - keçmiş sevgiliniz sizi qarabaqara izləməyə başlayıb sizinlə barışmaq istəyini reallaşdırmağa çalışarsa.

Buna baxmayaraq əvvəlki münasibətləri bərpa etmək fikri çox cəlbedici görünə, bəziləri üçünsə həyatının məqsədinə çevrilə bilər - xüsusilə də qarşımızda xoşbəxt sonluqlu nağılları xatırladan birləşmə nümunələri varsa.

Təəccüb doğuran bir statistik göstəriciyə görə, gənclərin 50%-i sevgililərindən ayrılır və bir müddət sonra həmin münasibəti yenidən bərpa edirlər.

Pandemiya şəraitində yaşamaq bəziləri üçün bu prosesi daha da sürətləndirdi: pis xəbərlərin əhatəsində, qapanma dövrlərindəki təklikdə çoxları köhnə sevgini (ya da heç olmasa, marağı) alovlandırmaq həvəsinə düşüb ayrıldıqları sevgililərini axtardılar.

Ekspertlər hesab edirlər ki, münasibətlərin bərpasına hər iki tərəf maraq göstərdiyi təqdirdə bu canatımın nəticəsi müsbət ola bilər - bir şərtlə ki, tərəflər qərəzsiz, əvvəlki illərin təcrübəsini nəzərə alaraq və qarşılıqlı şəkildə anlaşaraq davranmağa hazır olsunlar.

Keçmiş sevgiliylə barışmağı cəlbedici edən nədir?

Əvvəlki birlikdəliyin bərpasında əsas üstünlüklərdən biri bu münasibətdə nəylə qarşılaşacağını bilməkdir.

"Yenidən uzunmüddətli münasibət qurmaq istədiyimiz insanı yaxşı tanımağımız böyük üstünlükdür " - Çikaqodakı Qottman İnstitutunun ailə məsələləri üzrə məsləhətçisi Maykl Maknalti belə deyir.

Onun sözlərinə görə, hər bir cütlüyün heç vaxt həll olunmayan fikir ayrılıqları - potensial konflikt nöqtələri (məsələn, birgə yaşayış, pul, seks, uşaqlar, dostlar, ailə və sairə) var.

Hətta xoşbəxt cütlüklərdə də nöqtələr mövcuddur, çünki münasibət fərqli xasiyyətləri və ətrafda baş verənlərə fərqli baxışları olan iki fərqli insan arasında qurulur.

Qottman İnstitutunun araşdırmasına görə, münasibətlərdəki problemlərin 69 faizi həmin "əbədi fikir ayrılıqlardan" qaynaqlanır. Birlikdə olmağı cəhənnəm əzabına döndərən əsas səbəb hansısa bir konflikt və ya ayrıca götülümüş bir hadisə yox, gah sönüb gah alovlanan problemlərdir.

"Bir çox halda münasibəti və ya nikahı bitirən səbəb od deyil, buz soyuqlğudur ", - deyə Maknalti vurğulayır.

Bəzi cütlüklər zamanla bir-birilə danışmağa və münasibətlərindəki əsas problemləri həll etməyə belə çətinlik çəkirlər. Onlar get-gedə bir-birindən uzaqlaşır və artıq sevgili və ya ər-arvad kimi yox, qonşu kimi bir yerdə yaşamağa başlayırlar.

Nəticə etibarilə ya bir başqasıyla yeni münasibətə başlamaq, ya da köhnə münasibəti təzələmək həvəsinə düşürlər. Maykl Maknalti belələrinə ehtiyatlı olmağı tövsiyə edir: "Biriylə münasibətiniz varsa və onu bitirmək istəyirsinizsə, mahiyyətcə 69%-lik "əbədi fikir ayrılığını" digər 69%-liyə dəyişməyə hazırlaşırsız".

Ancaq köhnə sevgilinizlə barışanda ən azı nəylə qarşılaşacağınızı və aranızdakı fikir ayrılıqlarının nələrdən ibarət olduğunu bilmiş olursuz. Bu baxımdan köhnə münasibətin bərpası çox da yaxşı tanımadığınız biriylə tanışlıqdan xeyli asan ola bilər.

"Birinci variantda nə vaxtsa bitirdiyiniz yerdən davam etməyə başlayırsız" - Nyu-Yorkdakı Kolumbiya Universitetinin Tiçers kollecinin ştatdankənar müəllimi, ailə məsələləri üzrə mütəxəssis və seksoloq Cudit Kuryanski belə deyir.

Bəziləri həqiqətən belə düşünürlər: haqqında nəsə bildiyinlə barışmaq heç tanımadığın başqasıyla yeni münasibətə başlamaqdan yaxşıdır.

Sevindirən dəyişikliklər

Köhnə münasibətin bərpasında daha bir müsbət məqam var: ayrıldığınız gündən bəri nələrin dəyişdiyini görə bilirsiz.

Yeni tanışınızla görüşməyə başlayanda isə belə şansınız olmur - siz onun zamanla necə dəyişdiyini və dəyişikliklərin müsbətə doğru olub-olmadığını görmürsüz.

Köhnə sevgilinizi isə "onda" və "indi" deyə müqayisə edə bilərsiz.

Kuryanski deyir ki, əvvəlki birlikdəliklərin bərpasına imkan verən ən önəmli səbəblərdən biri budur: hər iki tərəf böyüdüklərini, fərd olaraq daha yetkin hala gəldiklərini hiss edir.

Qadınlara kömək edən "FemCity" təşkilatının rəhbəri, Mayamidən olan Violett de Ayala 2019-cu ildə əvvəlki əriylə yenidən nikaha girdiyini deyir:

"Yenidən görüşməyə başlamağımız çox xoş oldu, çünki bir-birimizi tanıyırdıq. Amma həm də nələrsə dəyişmişdi - hər ikimiz ehtiyac duyduğumuz istiqamətlərdə özümüzü inkişaf etdirmişdik və beləliklə də bir-birimizin qarşısına yenilənmiş şəkildə çıxmışdıq".

"Şəxsiyyətimizin bəzi elementləri inkişaf etmişdi və bu, yenidən qovuşma prosesini gözəlləşdirirdi", - deyə o əlavə edir.

"Artıq o, birlikdə olmağımızı adi, təbii bir şey kimi qəbul etmir. Mənə dərin mənası olan hədiyyələr almağa başlayıb. Tez-tez məni çox sevdiyini və mənə dəyər verdiyini deyir. Əvvəl bunların heç biri yox idi".

Amma uzun illər sonra keçmiş partnyorunuzla barışıb heç nəyin dəyişmədiyini, münasibətinizdəki əvvəlki toksikliyin yox olmadığını görməniz belə əvvəlki problemlərdən yayınmaq baxımından sizə müəyyən üsütnlüklər qazandırır.

"İnsanlar digər münasibətlərdə həyat təcrübəsi toplayandan, müdrikləşəndən sonra düşünürlər ki, bir vaxtlar aşa bilmədikləri maneələri artıq dəf edə belərlər" - Maknalti belə deyir.

Eyni zamanda, o vurğulayır ki, keçmiş birlikdəlikdə hansı problemlərin olduğunu və hazırda nələrin dəyişdiyini analiz etmək çox vacibdir.

"Apokalipsis fonunda sevgi və seks"

Bu dəfə hər şeyin başqa cür olacağına ümid edərək keçmiş birlikdəliyin burulğanına atılmazdan əvvəl özünüzdən bunu nə üçün etdiyinizi soruşun. Çünki işlər düşündüyünüz kimi getməyə bilər.

Əlbəttə, çoxdan tanıdığımız insan həyatımızı mənalandıra bilər, amma təsəlli tapmaq ümidimizin boşa çıxması ehtimalı da var - xüsusilə də indiki pandemiya xaosunda.

Ötən ilin may ayında - ölkələr bir-birinin ardınca qapadılanda İndiana Universitetinin araşdırması belə bir fakt aşkar edib: rəyi soruşulanların hər 5 nəfərindən biri izolyasiya dövründə keçmiş sevgilisiylə mesajlaşıb.

"Mən bunu apokalipsis fonunda sevgi və seks adlandırıram" - böhran dövrlərində (təbii fəlakətlər və terror aktları zamanı) insanlar arasında sevgi münasibətlərini araşdıran Kuryanski belə deyir.

Ekspert qeyd edir ki, bu, geniş yayılmış tendensiyadır - artıq gələcəyin olmayacağı fikri köhnə sevgiliylə əlaqələri bərpa etməyə sövq edir.

Hazırda Əfqanıstanda baş verənlər, təbii fəlakətlər və pandemiya fonunda insanlara elə gəlir ki, yaxınlaşmaqda olan Armagedon dövründə yaşayırlar. Buna görə də vaxtilə sevdikləri, yanlarında özlərini təhlükəsizlikdə hiss etdikləri şəxslə əlaqəni bərpa etmək istəyirlər.

Beləliklə, bu suala mümkün qədər səmimi cavab verməyə çalışın: köhnə sevgilinizlə nə üçün barışmaq istəyirsiz?

Onunla birlikdəliyiniz üçün darıxırsız və münasibətinizi bərpa etmək üçün maksimum səy göstərməyi düşünürsüz? Yoxsa qorxulu xəbər başlıqlarının sizdə yaratdığı narahatlıq və həyəcan hissini yatırmağa can atırsız? İkincisidirsə, bunu təhlükə barədə xəbərdarlıq siqnalı kimi qəbul edin.

Kuryanski məsləhət görür ki, köhnə birlikdəliyinizi bərpa etmək üçün hərəkətə keçməzdən əvvəl dostlarınızın və qohumlarınızın buna münasibətini öyrənin.

Yəqin ki, çoxunun reaksiyası mənfi olacaq, xüsusilə də sevgilinizdən qalmaqallı şəkildə ayrılmışdınızsa.

Ancaq sizin əsas məqsədiniz ətrafdakıların fikirlərini öyrənmək deyil. Onların reaksiyası sizi göydən endirə və keçmiş birlikdəliyinizin nə dərəcədə problemli olduğunu xatırlada bilər.

"Başqalarının fikirlərini eşitməyə hazır olun. "Nə?! Siz yenə birlikdə olacaqsız? Niyə? Zarafat olar!" - çoxu belə deyəcək".

"Onlar köhnə xatirələri yadınıza salacaqlar" - Kuryanski belə deyir.

Siz bu xatirələrə münasibətinizi müəyyənləşdirməlisiz. Ən çətini isə onları yaxınlarınızla yox, keçmiş sevgilinizlə müzakirə etmək olacaq.

"Bu, dəf etməli olduğumuz ən çətin məqam idi - keçmişi keçmişdə qoymaq. Münasibətlərdə sizi geriyə çəkən o qədər çox tarixçə var ki. Ancaq siz razılığa gəlməlisiz ki, bir-birinizi bağışlayaraq, ünsiyyətdə olaraq və hər şeyin yenidən - təmiz vərəqdən başladığını hiss edərək irəliləyəcəksiz".

Yəqin bəzən çoxumuza elə gəlir ki, keçmiş sevgimizin həsrətini çəkirik. Əgər bu hissə reallıq şərçivəsində və ağılla yanaşsaq, bəlkə də hansısa müsbət nəticə əldə etmək olar. Amma yalnız o halda ki, hər iki tərəf eyni düşüncədə olsun, münasibəti bərpa etmək üçün nə tələb olunduğunu hər ikisi yaxşı bilsin./bbc.com/