“Oğlan məni zorladı, ailəm yaxın durmadı, fahişə oldum”.
ANS TV-yə istinadən fahişəliklə məşğul olan qadınlardan hazırlanan reportajı sizə təqdim edirik:

14 yaşım var idi. Naxıra özüm gedirdim. Həmişə də naxıra gedəndə bir oğlan məni izləyirdi. Bir dəfə hücum çəkdi üstümə və məni zorladı. Ondan sonra kənddə hər kəs məni təhqir edirdi. Və bu hal, təcavüz mütəmadi baş verirdi. Dözmədim gəldim şəhərə, burda da elə şeylər baş veridi ki, kənd onun yanında şükürlü idi.

Reportajın qəhrəmanını şərti olaraq Elnarə adlandırıram. Bu adı seçməyim isə heç də təsadüfü deyil. Bu xanım 30-50 manata bədənini kişilərə satdığını deyir. Onu bu vəziyyətə salan isə özünün də deməsinə görə cəmiyyətin ona başqa gözlə baxa bilməməsidir. Yəni, o nə qədər normal həyat yaşamaq istəsə də, hər kəs ona bir fahişə kimi yanaşır və onun normal həyata qayıtması artıq mümkün deyil.

Belə bir misal var: hər bir fahişənin özünün qəmgin bir əhvalatı var. Kimisi pulsuzluğu, kimisi Elnarə kimi zorlandığını, kimisi isə əri tərəfindən atıldığını əsas gətirib özünü satır. Sosial şəbəkələrin həyatımıza geniş sirayət etməsi insan alverinin və fahişəliyinin buraya da gəlib çıxmasına rəvac verib. İndi tanışlıq saytlarında onlayn rejimdə özünü satan qadınlara və fahişə axtaran insanlara rast gəlmək olar.

Psixoloqlar isə hesab edirlər ki, bu qadınların hər birini zamanında pis yoldan saxlaya bilən mexanizmlər işləməyib.

Psixoloq Elnur Rüstəmov:

“Mən burda ailələri də günahlandırıram. Çünki qadınla söhbət edirsən, qadın deyir ki, mən ailəmdən ayrıldım, atam-anam məni qəbul eləmədi atdı çölə. Mən də getdim bu yola düşdüm. Əgər ailə vaxtında həyan dursaydı, bax bu baş verməzdi”.

Amma istisnalar da var. Daxili İşlər Nazirliyi qadınların zorla fahişəliyi cəlb olunmasına dair onlarla fakt aşkarlayıb.

İnsan Alverinə Qarşı Mübarizə Baş İdarəsinin şöbə müdiri İlkin Qurbanov:

“Ötən 9 ay müddətində 72 insan alveri müəyyən edilmişdir. Bu 72 faktın böyük əksəriyyəti də cinsi istismardır. Təyinat ölkələri əsasən Rusiya, Türkiyə, Ərəb Əmirliyi və bəzi hallarda da İran İslam Resublikası müəyyən edilmişdi”.

Yüngül həyat tərzi keçirənlər əvəllər sadəcə yol kənarında dayanaraq özlərinə müştəri axtarırdısa, il-ildən bu daha da mütəşəkkil forma alır. Aşkarlanan əxlaqsız yuvalarının sayı çoxalır.

İnsan Alverinə Qarşı Mübarizə Baş İdarəsinin şöbə müdiri İlkin Qurbanov:

“2013-cü ilin 9 ayı ərzində həyata keçirilən tədbirlər nəticəsində fahişəliyə cəlb etmə sahəsində 53 cinayət faktı qeydə alınmışdır. Bundan başqa əxlaqsız yuvalar saxlama ilə bağlı 57 cinayət faktı qeydə alınmışdır”.

Daxili İşlər Nazirliyi fahişəlik problemi ilə inzibati yollarla mübarizə aparır. Lakin bu problemlə yalnız administrativ üsullarla mübarizə aparmaq mümkün deyil. Qadınlar fahişəliyə cəlb olunduqca onlar sanki bataqlığa daha da dərin batırlar.

Psixoloq Elnur Rüstəmov:

“Zaman keçdikcə bu onların həyat tərzinə çevrilməyə başlayır. Bir qismi başlayır ailə dağıtmağa, bir qismi başlayır daşıdığı virusu ətrafdakılara yaymağa, bir qismi dələduzluqla məşğul olur, oğurluq edir və bu kimi sairə işlər görürlər”.

2007-ci ildə saxlanılan Elnarə Əhmədovanı buna misal gətirmək olar. QİÇS-dən 2012-ci ildə dünyasını dəyişən Elnarə Əhmədova xəstə olduğunu bilə-bilə kişilərlə əlaqəyə girərək onları virusa yoluxdurmaq istəyirdi. Əslində bu fahişəliyin cəmiyyətə və mənəvi dəyərlərə necə böyük bir zərbə olduğunun göstəricisidir.

Fahişəlik bütün dünyada geniş yayılır. Bir ölkədə buna görə qadını daş-qalaq edə bilərlər, digərində fahişəliyə görə cinayət məsuliyyəti nəzərdə tutulub.

Digər qism ölkələrdə isə fahişəlik hətta leqallaşdırılıb. Amma bu addımların heç biri problemi həll etməyə imkan verməyib. Yəni, fahişəliklə mübarizənin yolu qadınların hüquqlarının qorunmasından və kasıb ailələrin sosial təminatının gücləndirilməsindən keçir.