Əməkdaşımız saat markalarının hamını şoka salan qiymətləri ilə maraqlanıb

İndi saat zaman idarəsi funksiyasını itirib, stili tamamlayan bir aksessuara çevrilib. Bununla belə, saat bütün dövrlərin ən yaddaqalan, maraqlı hədiyyəsi sayılıb və yenə də bu nüfuzunu qoruyub saxlayır. Həmin nüfuz əsas saat istehsalçılarını ildən-ilə daha funksional və maraqlı kəşflərə həvəsləndirir.

Zaman keçdikcə saatların da mexanizmləri, görünüş və markaları dəyişir. Məsələn, SSRİ dövründə məşhur olan “Raketa”, “Slava”, “Polyot” kimi saat markaları indi yerini “Tissot”, “Sitizen”, “Swatch” Cartier", “Oriyent” kimi brendlərə verib.

Orijinalı 2 min manat, saxtası 100 manat

Telefonlarda, yollarda, avtobuslarda, metrolarda vaxtı göstərən mexanizmlərin quraşdırılması saata olan ehtiyacı aşağı salsa da, qiymətindən asılı olmayaraq növbənöv saatlar vitrinləri bəzəyir. Əvvəllər sadəcə dəmir və dəri kəmərli saatlar vardısa, indi muncuqlu, gümüşlü, yaylıqlı saatlar da satılır. Ən ucuzu “Sədərək” ticarət mərkəzindədir. Burda 2 manata saat almaq mümkündür. Onların nə qədər işləyəcəyi isə naməlumdur. Metrostansiyaların giriş-çıxışlarında qiymət 2 manatdan başlayıb 2 yüz manatda qurtarır.

“Azadlıq prospekti” metrosunda saat satan Şəhriyar deyir ki, mobil telefonlar çıxandan sonra qol saatları öz funksionallığını itirib: “İndi saatdan yalnız aksessuar kimi istifadə edirlər. Bir də ancaq hədiyyə üçün alırlar. Ona görə çalışırıq ki, əhalinin cibinə uyğun mallar gətirək”.

Satıcının sözlərinə görə, bazarda Çin, Koreya, Dubay istehsallı məhsullar var. Məşhur brendlərin adı altında müxtəlif ölkələrdə istehsal olunan mallara üstünlük verilir. Məsələn, dünya şöhrətli “Rodania”nın orijinalı 2 min manatdan yuxarı olduğu halda, saxtası 100 manatadır. Satıcı məhsulların keyfiyyətdə orijinaldan geri qalmadığını iddia eləyir...

Saatların işləməməsindən isə nadir hallarda şikayət gəlir: “Günə 7-8 saat satıram. Çox vaxt ya saatın kəmərini dəyişirəm, ya da daşlarını yeniləyirəm. Alıcı daha keyfiyyətli, dizaynlı kəmər istəyirsə, onun qiyməti artır. Bu saatlar uzun müddət işləyir. Nəzərə almaq lazımdır ki, malın qiyməti 5 manatdır. Həm də bu qədər bolluq içində heç saatı xarab olana kimi işlədən olur ki?”

Dözümlü, sukeçirməz İsveçrə saatları

Paytaxtda bahalı saat dükanları da var. Bu dükanlarda brend məhsulların satıldığı deyilir, mallara 1 ildən 5 ilədək zəmanət verilir. Belə saatlar zərbəyə və suya davamlıdır, kəmərləri təbii dəridən olmaqla keyfiyyətini uzun müddət qoruyub saxlayır. Daha çox hədiyyəlik alınır, gündəlik istifadə üçün bu qiymətə saat alanlar azdır. Belə brend saatların ikinci əl olanını da almaq mümkündür. Bu halda qiymətlər aşağı olur.

Gənclər arasında isə bahalı saatlara maraq yox dərəcəsindədir. Xüsusən gənc xanımlar nadir hallarda saat taxırlar. Bəziləri bilərzik formasında olan və sırf bəzək funksiyası daşıyan saatlara meyl edir.
Ən yaxşı, möhkəm, dözümlü, sukeçirməz və digər keyfiyyətlərinə görə fərqlənən saatlar İsveçrə saatları sayılır. Müasir dünyada İsveçrə ənənəvi saat ölkəsi kim tanınır. Paytaxtın məşhur mağazalarında satılan məhsulların baha olmasının səbəbini də məhz İsveçrə istehsalı ilə izahlayırlar.

“Aztime” saat mağazalarında qiymətlər 25 manatdan başlayır. VİP mağazanın satıcısı deyir ki, ən bahalısı İsveçrənin “Elysee” brendidir. Qiyməti 5 min manatdır. “Rodania” brendi isə 400 manatdan başlayır. Bu brendin kişi üçün qol saatları 2300, qadın üçün olanı isə 1500 manatdır.

Nizami küçəsindəki “Royal collection” mağazasında “Carrera y Carrera”, “Pasquale Bruni”, “Leo Pizzo”, “Antonini” kimi məşhur brendlərin məhsullarına rast gəlmək olar. Qiymətlər 500 manatdan 7-8 min manatadək dəyişir.

Baxmaq olar, şəklini çəkmək yox!

Dünyada qiyməti milyon dollardan yuxarı saatlar var. Bir az da bahalı saat dalınca düşdük. Üz tutduq “Azərbaycan” prospektindəki mağazalara. Burada 1000 manatdan başlayan saatların ən bahalısı
“Breguet” brendinə məxsusdur.

Hətta 40 min manata satılan kişi qol saatları da var. Satıcı deyir ki, hər saatın işlənmə mexanizmi, materiallarının tərkibi, əl işlərinin peşəkarlığı müxtəlif olduğundan qiymətlər də dəyişir. Bura daha bahalı saatlar xüsusi sifarişlə gətirilir. Digər saat mağazasında ən bahalı saat 200 min dollardır.

VMF-in küçəyə baxan vitrinlərindəki saatlara tamaşa edə-edə şirkətin mağazasına daxil olduq. Əlimizdə fotoaparatı və qələm-dəftəri görən satıcı reportaj üçün rəhbərliyin icazəsinin vacibliyini dedi. Qəribədir, hər kəsin gözlə gördüyü və qiymətləri üzərində olan saatların şəklini çəkməyə icazə verilmir. Bu qayda ilə, demək olar ki, bütün brend məhsullar satılan mağazalarda rastlaşdıq. Səbəb saatların dizaynının digər istehsalçı firmalar tərəfindən oğurlanmasının qarşısını almaqdır.

Burada qiyməti 1000 manatdan başlayan saatların ən bahalısı “Breguet” brendinə məxsusdur. 40 min manatlıq saatların başqalarından nəyinə görə fərqləndiyini soruşduq. Satıcı bildirdi ki, hər saatın işlənmə mexanizmi, materiallarının tərkibi, əl işlərinin peşəkarlığı müxtəlif olduğundan qiymətlər də qalxıb-düşür. O, qiyməti 100 min manatdan yuxarı olan saatların sifarişlə gətirildiyini dedi.

Mağazada olduğumuz müddətdə qapını açıb içəri girənə rast gəlmədik. Ümumiyyətlə, bu mağazaların qarşısından keçəndə içəridə satıcılardan başqa kimsə gözə dəymir. Satıcılar da sanki saatlara baxa-baxa saniyələrin sürətlə axmasını gözləyirlər. Əhatəndə bu qədər saat ola-ola vaxtın yerində sayması dəhşətdir!

Bahalı saatların alıcısı varmı?

“Park Bulvar”dakı brend markalarla zəngin mağazada da şəkil çəkmək arzumuz gözümüzdə qaldı. Dedilər guya, brend saatların şəkilini çəkib Çinə göndərir və onun “kopyası”nı sifariş verirlər. Satıcıya əks-arqumentimizi bildirdik. Axı, hər hansı firmaya məxsus saatın oxşarını istehsal etmək üçün çinlilərin bizə və foto-çəkilişlərə ehtiyacları yoxdur. İnternetdə istənilən saatın fotosunu əldə etmək mümkündür. Yaxud bu işlə məşğul olanların hər halda orijinal saat almaq imkanları da var. Bütün bunları satıcının diqqətinə çatdırandan sonra həmsöhbətimizi razı sala bilsək də, onun rəhbərliyi necə başa salacağının qəlizliyini düşünüb, istəyimizdən vaz keçdik.
Qeyd edək ki, bu mağazada ən bahalı saat 200 min dollardır. “CORUM” brendindən olan saat sifarişlə ölkəyə gətirilib.

Növbəti dayanacaq “Tagheuer” mağazası oldu. Burada, əsasən, İsveçrə istehsallı saatların satıldığını öyrəndik. İnanmaq istəməsək belə. Ən bahalı saatın qiyməti 1350 manat, ən ucuzu isə 990 manat...
Satıcı xanım bildirdi ki, digər mağazalarda baha qiymətə deyilən saatlar əslində İsveçrədə çox ucuzdur. Sadəcə, buradakı dilerlər öz çəkilərini, nüfuzlarını qaldırmaq üçün fantastik məbləğ müəyyənləşdirirlər. Həmin saatları heç alan da olmur.


Rəsmilərin sevimli saat modelləri

Dünyanı idarə edən siyasətçilərin vaxtı necə ölçmələri də maraqlıdır. Siyasətçilər arasında ən bahalı saatları ilə İtaliyanın sabiq baş naziri Silvio Berluskoni fərqlənib. O, “Vacheron Konstantin” modelindən istifadə edib. Qiyməti təxminən 600 min ABŞ dollarıdır.
Çeçen Respublikasının prezidenti Ramzan Kadırov “Bovet” markasının “Fleurier Minute Repeater with Reversed Hand Fitting” modelli qol saatına üstünlük verir. Bu saatın qiyməti 305 min dollardır, korpusu ağ qızıldan hazırlanıb. Rusiyanın baş naziri Dmitri Medvedyev İsveçrənin “Breguet” firmasının “Classique Moon Phase” modelinə maraq göstərir. Qiyməti 32 min dollardır.
Rusiya prezidenti Vladimir Putin vaxtını “Blancpain” firmasının “Leman Aqualung Grande Date” modelinə əsasən qurur. ABŞ prezidenti Barak Obama isə Çin istehsalı olan “Jorg Gray 6500" idman tipli saat taxır. Qiyməti cəmi 435 dollardır...

Naibə Qurbanova