Tofiq Bəhramov adına Stadionun təmirinə xərclənmiş 35 milyon manatın 25 milyon manatı yoxa çıxıb

gundemxeber.az Gənclər və İdman naziri Azad Rəhimov bir yığın yaxın adamını başına toplayaraq nazirliyin büdcəsini talan edir. Bu barədə redaksiyamıza daxil olan məlumatda bildirilir ki, Azad Rəhimov mebel sektorundan gətirilib nazir təyin edildikdən sonra Gənclər və İdman Nazirliyinin qara günləri başlayıb. Belə ki, biznes sahəsindən nazir vəzifəsi alan Azad Rəhimov elə Gənclər və İdman naziriliyinə də biznes sahəsi kimi baxmağa başlayıb.
İddiaya görə nazirlikdə nazir və müavinləri nazirlik işçiləri tərəfindən yeyib-içən oğlan kimi tanınırlar. Bir neçə dəfə isə Azad Rəhimov belə vəziyyətdə öz köməkçisi Vüqar Əsgərovu danlayıb, ona qarşı kobud davranıb. Məlumatda o da xatırladılır ki, Vüqar Əsgərov tanınmış ziyalı Şahlar Əsgərovun oğludur.
Daha sonra məlumatda nazirliyin iş prinsipinə də toxunulur. İddia olunur ki, Rəhimov nazirliyin demək olar ki, bütün layihələrini dost-tanışı arasında bölür. Nazirlik büdcəsi ilə öz cibi arasında ciddi fərq qoymayan nazirin bu yolda ən böyük yardımçısı isə nazirliyin bir zamanlar bütün qara işlərinə rəhbərlik edən Valeh adlı şəxs olub. Lakin daha sonralar Valehin Azad Rəhimova da kələk gəldiyinin üstü açıldığından o işdən uzaqlaşdırılıb və artıq o, nazirliyin həndəvərinə belə ayaq basa bilmir. Heç təsadüf deyil ki, işdən rüsvayçı şəkildə qovulan bu şəxs nazirin və nazirliyin bütün kirli işlərini bildiyinə görə qanunlar qarşısında cavab vermək məsuliyyətindən sığortalanıb.
Hazırda isə Rəhimovun maliyyə məsələlərinə görə “qızıl açar” rolunu Aparat rəhbəri Fuad Hacıyev oynayır. Valehin “göndərilməsindən” sonra əli-qol açan F. Hacıyev hazırda nazirliyin bütün maliyyə işlərini tək başına yürüdür. Yəni həm alan, həm də verən əl odur. İddialara görə, Universitetə qəbuldan tutmuş idman qurğularının tikintisinə qədər bütün səlahiyyətlər onun əlindədir. Bundan əlavə, biznesmen kimi uğur qazanıb nazir pilləsinə yüksələn Rəhimovun həm də bu sahədə səriştəsizliyi onu daha bir müavinindən asılı vəziyyətə salıb.
Məlumatda bildirilir ki, Nazriliyinin bütün siyasətini nazir müavini İntiqam Babayev təyin edir. Hətta Prezident Adminstrasiyası və Nazirlər Kabinetində də Nazirliklə bağlı ciddi müzakirələrə Azad Rəhimov deyil, İntiqam Babayev dəvət alır. Başqa sözlə, Rəhimovun varlığı və yoxluğu Nazirlikdə heç nəyi dəyişmir - maliyyə və tikinti məsələlərini Fuad Hacıyev, menecmenti isə İntiqam Babayev həyata keçirir.
Məlumatda həmçinin Tofiq Bəhramov adına Stadionun təmirinə xərclənmiş 35 milyon manata toxunulur. Nazirliyin hər bir işini kifayət qədər ciddi bilən mənbə iddia edir ki, təmirə ümumilikdə 10 milyon manat xərclənib. Qalan 25 milyon manatın heç 1 qəpiyi də stadionun təmirində iştirak etməyib. Yəni bu pul mənimsənib. Təbii ki, belə olan halda Avropa Olimpiya Oyunları üçün xərclənəcək təxminən 700 milyon dolları yada salmamaq, salıb da bu pulların necə və hara xərəclənəcəyini düşünüb dəhşətə gəlməmək mümkün deyil. Mənbə iddia edir ki, hazırda nazirə yaxın olan nazirliyin bir neçə işçisi bu pulların necə «yerbəyer» etmənin üzərində çalışırlar.
Bundan başqa məlumatda qeyd olunur ki, Azad Rəhimov nazirliyin gənclərlə bağlı bütün tədbirlərini öz obyektlərində, «Buta Palase»də və Sərgi Mərkəzində keçirir. Mənbə həmçinin Rəhimovun nazirliyin ən “qaymaq postları”na yaxın qohumlarını təyin etdiyini də bildirdi. Misal üçün Gənclər şöbəsinin müdiri Fərhad Hacıyev, Şahin Seyidzadə, çox yaxın münasibətlərdə olduğu millət vəkili Fuad Muradov və başqaları... Iddiaya görə büdcənin yağmalanma prosesində bu şəxslərin də ciddi “əməyi” olur. Nazirliyin büdcəsinin yarıdan çoxu məhz bu şəxslərin tədbirlərinə ayrılır.

Elçin Əmirov