Nazir onu çətinə düşürənlərlə hesablaşmaq qərarına gəlib

Olimpiya Komplekslərinin tikintisindəki mənimsəmələr naziri belə mat qoyub; daxili yoxlamalara star verildi
Hesablama Palatasının apardığı araşdırmalar nəticəsində dövlət büdcəsindən Gənclər və İdman Nazirliyinə ayrılan, tikintisi 2011-2013-cü illərdə başa çatmış obyektlər üçün nəzərdə tutulan vəsaitlərin istifadəsində ciddi korrupsiya hallarına yol verilməsinə dair faktlar aşkarlanıb. Belə ki, Hesablama Palatasının 2013-cü ildəki fəaliyyəti haqqında hesabatında deyilir ki, Daşkəsən rayonunda Olimpiya İdman Kompleksinin tikintisi üzrə müəyyən tikinti-quraşdırma işləri yerinə yetirildikdən sonra obyektin təyinatı dəyişdirilərək onun bazasında Gənclərin Təlim və İstirahət Mərkəzi tikilib.
Başqa 2 rayonda isə olimpiya kompleksinin tikintisi zamanı asfalt-beton örtüyü işləri tam yerinə yetirilmədiyi halda bu obyektlər üzrə işlərin qəbulu haqqında akt bağlanıb. Hesabata görə, 5 rayonda olimpiya komplekslərinin tikilməsi prosesində bəzi inventar və avadanlıqlar obyektlərdə olmadığı halda qəbul aktlarına daxil edilib, 2 rayonda tikintisi başa çatmış kompleks istifadəyə verilsə də, dövlət qəbul komissiyasının aktlarının imzalanması bir ilədək gecikdirilib. Həmçinin, tikintisi başa çatmış 14 obyekt üzrə dövlət qəbul komissiyasının aktlarının başa çatdırılması tamamlanmayıb, 12 podratçı təşkilat üzrə kreditor borcun yaranmasına yol verilib.
Şəffaflığın qorunması isə təkcə Hesablama Palatasının hesabatında göstərilən sahələrdə yox, xüsusilə tikinti sektorunda pozulub. Ölkənin demək olar ki, bütün bölgələrini Olimpiya İdman Kompleksləri ilə təmin edən nazirlik aşağıdan yuxarı elə sürətlə qalxıb ki, heç ballistik raket də bu sürətlə qalxmaz.
Gənclər və İdman Nazirliyindən isə palatanın nöqsanlarının aradan qaldırılması istiqamətində tədbirlərin görüldüyü bildirilib. Göründüyü kimi, Gənclər və İdman Nazirliyi ittihamları qəbul edib, bu isə məsələnin içində doğurdan da ciddi korrupsiya və yeyintinin olmasından xəbər verir. Daxil olan məlumatlara görə, hazırda nazir Azad Rəhimov Nazirliyin Tikinti Təchizat İdarəsinin işinin yoxlanmasına dair xüsusi tapşırıq verib. Belə ki, indi nazirliyin özünün xüsusi komissiyası Hesablama Palatasına paralel olaraq Tikinti Təhcizat İdarəsində təftiş aparır. Mənbəmizin sözlərinə görə, əslində baş vermiş korrupsiya hallarının bir çoxundan nazirin özünün də xəbəri olmayıb və bu üzdən də nazir daxili yoxlamalara göstəriş verib. Həmin yoxlamaların nəticəsində isə Nazirliyin Tikinti Təchizat İdarəsinin bəzi məsul şəxslərinin vəzifədən azad olunacağı, hətta həbslərin belə mümkünlüyü iddia olunur.
R.ƏLİCANLI