“Ölkədə elmsiz, məntiqsiz idarəetmə mövcuddur”
“Əsl alimlər sevinməlidirlər ki, onların repressiyası başlamayıb”


“Qərb-Azərbaycan əməkdaşlığı hakimiyyətin qorunmasına xidmət edir”

“Bələdiyyə seçkilərində partiya olaraq iştirak etməyəcəyik”

Mirmahmud Mirəlioğlu: “Ölkədəki bütün problemlərin səbəbkarını hər kəs xorla söyləyir...”

KXCP sədri Mirmahmud Mirəlioğlu ölkədəki son siyasi proseslərlə bağlı Moderator.az saytı və "Hürriyyət" qəzetinə müsahibə verib.

-Mirmahmud bəy, son vaxtlar Azərbaycandakı siyasi məhbus problemi, təzyiq və repressiyalarla bağlı beynəlxalq təşkilatlar, aparıcı dövlətlərin yetkililəri tərəfindən ciddi bəyanatlar verilməkdədir. Sizcə bu bəyanatlar hakimiyyətin bu məsələdəki mövqeyinə az və ya çox dərəcədə təsir göstərə bilibmi?

-Dəyişiklik təbii ki, yalnız sözdədir. Baş verən proseslər göstərdi ki, Azərbaycan hakimiyyətinə doğrudan da heç nə təsir etmir. Nəticə də ortadadır. Ona görə təsir etmir ki, Azərbaycanla Qərb dövlətləri, Avropa dövlətləri arasında bir əməkdaşlıq mövcuddur. Bu əməkdaşlıqda da demokratiya heç də ilk yerdə deyil. ABŞ və Avropa ilə bu əməkdaşlıq iqtisadi, təhlükəsizlik və s. sahələri əhatə edir. Bu əməkdaşlıq ümumilikdə mövcud hakimiyyətin qorunub saxlanılmasına hesablanan bir əməkdaşlıqdır. Buna görə də demokratik inkişaf, siyasi məhbus problemi və s.kimi məsələlər elə də ciddi əhəmiyyət kəsb etmir və Azərbaycan hakimiyyəti üçün önəm daşımır. Ən yaxşı halda Qərb bu məsələlərlə bağlı hansısa sözlər, bəyanatlar səsləndirir və bununla da hər şey bitir. Problem isə həll edilməmiş qalır.

-Həm hüquq müdafiəçisi Oqtay Gülalıyevin övladı Əli Gülalıyev, həm də Azərbaycan Ziyalılar Birliyinin sədri Eldəniz Quliyevlə bağlı məhkəmə hökmü elan edildi. Hökmdən sonra E.Quliyev etiraf etdi ki, o da, ictimaiyyət də daha ağır cəza gözləyirdi. Maraqlıdır, doğrudanmı artıq elə bir situasiya yetişib ki, günahsız insanlar gözləntilərindən daha az cəza alanda sevinirlər?

-Eldəniz bəyin açıqlaması sevinc açıqlaması deyil. Onun gözləntisi Azərbaycan hakimiyyətinin mahiyyətinə uyğun olan bir gözləntidir. Həm Oqtay bəyin övladı, həm də E.Quliyevlə bağlı elan edilən məhkəmə hökmləri, verilən cəzalar Azərbaycan hakimiyyətinin mahiyyətinə, xarakterinə, ənənəvi qəzəbinə uyğun deyil. Buna görə də Eldəniz bəy məsələni bu cür qoyur.

-Prezident Administrasiyasının rəhbəri Ramiz Mehdiyev son açıqlamasında ölkədə elmin, təhsilin ağır vəziyyətdə olduğunu, cəmiyyətdə əxlaqi-mənəvi dəyərlərin aşındığını vurğuladı. Halbuki, bugünə qədər hakimiyyət bunun tam tərsini iddia edirdi. Sizcə R.Mehdiyevin son açıqlaması ilə bugünə qədərki açıqlamalar arasındakı bu ciddi təzad nə ilə bağlıdır? Necə ola bilər ki, “çiçəklənən” bir ölkə birdən-birə normal kadrdan, təhsildən və düşüncədən malik bir obraza sahiblənsin?

-Şübhəsiz ki, birinci mövqe, yəni “hər şey yaxşıdır, hər şey əladır” mövqeyi hakimiyyətdə hər zaman olub. Hakimiyyət bildirib ki, necə ki ölkədə analoqu olmayan iqtisadi inkişaf var, digər sahələrdə də bu cür inkişaf həyata keçirilir. Halbuki, bu günə qədər ölkədə müxtəlif sahələrin inkişafı ilə bağlı çoxlu fikirlər səsləndirilib, təkliflər verilib. Buna görə də R.Mehdiyevin çıxışını etiraf kimi yox, ağlın məhsulu kimi qiymətləndirmək lazımdır. Bu, bugünə qədər müxalifət tərəfindən deyilən məsələlərin, səslənən fikirlərin çox məntiqli olduğu və hakimiyyət tərəfindən də ağlın hakim olduğunun təsdiqi, göstəricisidir. R.Mehdiyev bir qədər də dərinə gedib. Ona bu çıxışına görə istər-istəməz rəğbət yaranır. O, bütün sahələr üzrə kadr yoxluğuna diqqət çəkir. Son 21 il müddətində nələr olduğunu hər kəs bilir. “N” qədər universitetlər açıldı, onların sayı yağışdan sonrakı göbələk kimi artdı. Bu da bəs eləmədi, yeni yaranan bu universitetlərin saxta diplomları peyda oldu. Bu da kifayət qədər ciddi problemlərə səbəb oldu. Hər tərəfdə saxtakarlıq və s. vardı. Seçki saxtakarlığı, diplom saxtakarlığı, insanların bir-birinin haqqını yeməsi, yalanılıq, oğurluq mövcud idi. Haqqın oğurlanması, səsin oğurlanması, əmlakın oğurlanması, mülkün oğurlanması baş alıb gedirdi. Bu baxımdan hesab edirəm ki, R.Mehdiyevin məsələlərə bu şəkildə yanaşmasını obrazlı desək, ağlın təntənəsi hesab etmək olar. Ağıla hər kəs qulluq etməli, hər kəs ağılla hərəkət etməlidir. Ümumilikdə isə bunu sonun yaxınlaşması kimi də dəyərləndirmək olar.

-Dərsliklərdən tutmuş körpü və yollara, avtomobil plyonkalarının sökülməsindən tutmuş yumurtanın qiymətinin artıb-azalmasına qədər hər yerdə prezidentin adına rast gəlmək mümkündür. Görülən bütün işlərin prezidentin sərəncamı və göstərişi əsasında reallaşdığı bildirilir. Necə hesab edirsiniz, bütün bunlar onu söyləməyə əsas verirmi ki, bu ölkədə hökumət adına işləyən yeganə şəxs ölkə başçısıdır? Əgər həqiqətən də belədirsə, o zaman bütün nazirliklər gərəksiz institutlar kimi buraxılmalı deyilmi?

-Burada kiminsə çox yüksək ağlı görsənir. Ölkədə nə baş verirsə bütün məsələlərin mərkəzində birinci şəxs dayanır. Hətta bunu sənədləşdirərək, yazaraq təsdiqləyirlər. Bunu dərsliklərə, lövhələrə yazaraq göstərirlər. Yəni dərslik əgər bərbad vəziyyətdədirsə, bunun məsuliyyəti İ.Əliyevin üzərindədir. Bunu həmin dərsliyin İ.Əliyevin göstərişi ilə dərc edildiyini yazmaqla özləri təsdiqləyirlər. Burada böyük bir ağıl var ki, o, bütün bu məsələlərdə günahkarı göstərir. Yol gedirik, tıxacdır, tunelin qarşısında lövhədə yazılır ki, bu tunel filan tarixdə filankəsin göstərişi ilə inşa edilib. Yəni əlaqədar qurumun ağlının nəticəsidir ki, demək istəyir ki, mən bu məsələdə günahkar deyiləm, bütün bunların səbəbkarı bir nəfərdir, bu həmin şəxsin adı, soyadı, bu da onun imzası. Bu, hər kəsin, hamının bir araya gəlib səbəbkarı bir yerdə, xorla göstərməsidir. Azərbaycanda dərsliklər bildiyiniz kimi bərbad vəziyyətdədir. Elm bərbad vəziyyətdədir. Bunu hakimiyyətin bəzi nümayəndələri də etiraf edir. Azərbaycanda təhsil elə bir vəziyyətdədir ki, bəzi məmurlar vəziyyətin ağır olduğunu etiraf etməyə məcbur olur. Təhsil işçilərini idarə edənlərin, onlara yol göstərənlərin təhsilə, təlimə, intizama və s-ə heç bir aidiyyatı yoxdur. Onlar qətiyyən bu sahənin adamları deyillər. Ola bilsin ki, onlar öz sahələrində, tutaq ki, alverdı, biznesdə ola bilsin ki, kifayət qədər fəal adamlardır. Bunu biz bilmirik. Bunu bilənlər bilir. Amma təhsil onlarlıq deyil. Azərbaycan mediası, həmkarlarınız fikir verirsinizmi son vaxtlar daha çox nələri göstərir? Daha çox diqqəti quruculuq, abadlıq işlərinə, dövlət qulluğu və s. məsələlərinə cəlb edir. Deməli, hər kəsə yol göstərən çubuq bütün məsələləri idarə edir və göstərir ki, bütün məsuliyyət bir nəfərin üzərindədir. Sizin sualınızda ortaya qoyduğunu fikirlər də maraqlıdır. Lakin mənim mövqeyim belədir.

-KXCP bələdiyyə seçkilərində iştirak edəcəkmi?

-Bizim üzvlərimiz bu seçkilərdə iştirak edəcək. Biz seçkidə partiya olaraq iştirak etməyin tərəfdarı idik. Lakin Azərbaycanda Seçki Məcəlləsi elə bir vəziyyətdədir ki, YAP belə istəsə bu seçkidə iştirak edə bilməz. Baxmayaraq ki, YAP-ın bir qərargahı digər siyasi partiyaların ölkədəki bütün qərargahlarından üstündür. Seçkidə partiyanın iştirakı üçün “n” qədər qovluqlar lazımdır. Partiyanın hər bir fərd üçün qərarı olmalıdır. Notariusda təsdiq edilmiş partiyanın qeydiyyat şəhadətnaməsi, hər bir adam üçün notariusda təsdiq edilmiş nizamnamə lazımdır. Bütün bunları eləmək həm gülünc, həm də qeyri-mümkündür. Odur ki, üzvlərimiz vətəndaş olaraq ərizə verib öz namizədliklərini irəli sürəcəklər. Tələb olunduğu təqdirdə öz siyasi mənsubiyyətlərini də təbii ki, göstərəcəklər. Inşallah bu şəkildə seçkilərdə iştirak edəcəyik.

-Ölkədə elmin vəziyyətinin arzuedilməz olduğu söylənilsə də, elmə ayrılan vəsait hər ötən il bir qədər də azaldılmaqdadır. Elmin gələcəyindən narahat olanların elmə ayrılan vəsaitləri azaltması hansı məntiqlə izah oluna bilər?

-Elmə ayrılan vəsaitləri azaldanların öz məntiqi var. Əgər elmin inkişaf etdirilməsi arzu edilirsə, o zaman alimə, elm adamlarına hörmət və qayğı olmalıdır. Onların istəkləri, maddi təminatları diqqətdə saxlanılmalıdır. Azərbaycanda elmsiz, məntiqsiz bir idarəetmə var. Heç bir sahədən başı çıxmayan adam Azərbaycanda elmin başında dayanır, ən yüksək elmi titulları alır və s. Bunlar hər kəsin açıq-aydın bildiyi məsələlərdir. Buna görə də Azərbaycanda elmin real vəziyyəti acınacaqlıdır. Yəqin ki, bu müsahibədən sonra parlamentdə olan alimlər və ya alimciyəzlər belə buna etiraz edəcək, bu reallığıa başqa cür don geyindirməyə çalışacaqlar. Lakin onlar öz həmkarlarına baxsalar, onların yaşayışları ilə tanış olsalar, əsl mənzərənin nədən ibarət olduğunu görə bilərlər. Əsl alimlər sevinməlidirlər ki, onların repressiası başlamayıb.