Eldəniz Quliyev:
“Ziyalılar Forumu Azərbaycanda azad, ədalətli, şəffaf,
ləyaqətli seçki keçirilməsini, yalana qarşı həqiqətləri ortaya qoyur”

Azərbaycan Ziyalılar Birliyinin sədri, EL hərəkatı təşəbbüs qrupunun üzvü Eldəniz Quliyev fevralın 12-də “Media forum” saytının suallarını cavablandırıb.
- EL hərəkatının formalaşdırılması prosesi necə gedir? Hərəkat nə zaman elan olunacaq?
- Hərəkatın təsis toplantısını və təqdimat mərasimini fevralın ortalarında keçirməyi nəzərdə tuturduq. Lakin bu mümkün olmadı və təqdimat mərasimi bir qədər ləngiyir. Yazıçı Əkrəm Əylisli ilə bağlı hay-küydə müəyyən zərbələr aldıq. Ona görə də təqdimatı nəzərdə tutduğumuz vaxtda keçirə bilmədik. EL-in qərargah məsələsi həll olunub. Amma məsələ yalnız ofisdə deyil, biz komanda formalaşdırmalıyıq. Bu məsələ ləngiyir. EL hərəkatının təqdimat mərasimini böyük ehtimalla fevralın sonlarında keçirəcəyik.
- Təşkilatlanma işində hansı məsələlər həll olunmayıb?
- EL hərəkatının yerli strukturları 125 seçki dairəsi üzrə yaradılır. Bundan əvvəl isə İdarə Heyətini formalaşdırmalıyıq. Artıq bunu başa çatdırmaq üzrəyik. Hərəkatın Məclisi olacaq.
- İdarə Heyəti neçə nəfərdən ibarət olacaq?
- İndi bunu müəyyənləşdiririk: 9, ya da 11 nəfər nəzərdə tuturuq.
- Orada kimlər təmsil olunacaq?
- Bunu hələlik tam açıqlaya bilmərəm. Amma bir neçə nəfərin adını çəkə bilərəm. Mən və politoloq Eldar Namazov İdarə Heyətində təmsil olunacağıq.
- Keçmiş deputatlar Gültəkin Hacıbəyli, Gülnarə Qurbanova, politoloq Zəfər Quliyev, hüquqşünas Rəşid Hacılı, gənc fəal Rəşad Həsənov, Qərbi Azərbaycan Deportasiya Qurbanları Mərkəzinin sədri Köçəri Nağıbəyli, Dini Etiqad və Vicdan Azadlıqlarını Müdafiə Mərkəzinin rəhbəri İlqar İbrahimoğlu İdarə Heyətində təmsil olunurmu?
- Siz mənə cavabını bildiyiniz sualı verirsiniz.
- Yəni adlarını çəkdiyim şəxslər İdarə Heyətində var?
- Bunu mən demədim, siz söylədiniz. Niyə bu adları mən demədən açıqlayırsınız? Hər halda İdarə Heyəti 9-11 nəfərdən ibarət olacaq. Adlarını çəkdiyiniz insanların da namizədliyi müzakirə olunur.
- Müzakirə etdiyiniz başqa namizədlər də varmı?
- Məni pis vəziyyətə qoymayın. Hətta onu deyə bilərəm ki, İdarə Heyətində təmsil olunacaq 11 nəfərin hamısının namizədliyi təsdiq olunub. Sadəcə, ad çəkmək istəmirəm. EL-in təşəbbüskarlarından olan Rüstəm İbrahimbəyov İdarə Heyətində təmsil olunmayacaq. O, Ziyalılar Forumunun rəhbəridir. Forum EL hərəkatının yaradılmasına təşəbbüs göstərib, xeyir-duasını verib. Ziyalılar Forumu hərəkatda bundan artıq təmsil olunmayacaq.
- Riyaziyyatçı alim, professor Rafiq Əliyev hərəkatda təmsil olunacaqmı?
- Rafiq müəllim də hərəkatı dəstəkləyir. Hərəkatda təmsil olunmaq isə onun öz istəyindən asılıdır.
- Bəs EL hərəkatının sədri kim olacaq?
- Sədri İdarə Heyəti seçəcək. EL hərəkatının sədri Eldar Namazov olacaq. Bunu böyük ehtimalla deyirəm.
- “Əkrəm Əylisi məsələsinə görə zərbə almışıq” deyəndə nəyi nəzərdə tutursunuz?
- Əkrəm Əylisli ilə bağlı gedən müzakirələrdə, hay-küydə yeri gəldi-gəlmədi Ziyalılar Forumunun adını hallandırırlar. İctimai Televiziya Əkrəm Əylisli ilə ona qarşı çıxanların debatını təşkil edir və oradan elan edirlər ki, müzakirələrdə iştirak etmək üçün Ziyalılar Forumuna müraciət etdik, amma heç kim gəlmədi. Əslində isə bu doğru deyil, Ziyalılar Forumundan heç kimi dəvət etməyiblər. Bəzi müstəqil mətbuat orqanları son zamanlar Ziyalılar Forumuna qərəzli yanaşır və bu açıq-aydın görünür. Dövlət qəzetləri də Ziyalılar Forumu haqda palaz-palaz yazılar yazır, Rüstəm İbrahimbəyov, Eldar Namazov, Gültəkin Hacıbəyli haqda əsası olmayan qərəzli informasiyalar yayır. Bütün bunlar onu göstərir ki, hakimiyyət Ziyalılar Forumunu real rəqib kimi görür. Amma onu yaddan çıxarırlar ki, forumun məqsəd və istəyi hakimiyyətə gəlmək deyil. Ziyalılar Forumu Azərbaycanda azad, ədalətli, şəffaf, ləyaqətli seçki keçirilməsini, ölkədəki qanunsuzluqların aradan qaldırılmasını, qüsurların düzəldilməsini, hakimiyyətin idarəetmə ideologiyasındakı boşluqların doldurulmasını istəyir, bunun üçün çalışır, yalana qarşı həqiqətləri ortaya qoyur. Ona görə də hakimiyyət Ziyalılar Forumuna qurşaqdan aşağı zərbə vurmaqdan belə çəkinmir. Əkrəm Əylisli ilə bağlı məsələni də bunun üçün bəhanə edirlər. Bəzi qüvvələr bundan istifadə edib Ziyalılar Forumuna zərbə vurmağa həvəsləniblər, buna cəhd edirlər. Bütün bunlar da birbaşa hakimiyyətdən qaynaqlanır. - Rüstəm İbrhimbəyov hazırda xaricdədir. Onunla əlaqəniz varmı və baş verənləri necə qiymətləndirir?
- Rüstəm İbrahimbəyovla bir neçə gün əvvəl danışmışam. O, baş verənlərdən çox narahat, nigarandır. Dedi ki, Əkrəm Əylisliyə qarşı aparılan sifarişli kampaniya Azərbaycanın imicinə böyük zərbə vurur. Bildirdi ki, Əkrəm Əylisliyə qarşı aparılan sifarişli kampaniya, yazıçının kitablarının kütləvi formada yandırılması ABŞ-da, Avropada böyük rezonans doğurub, Azərbaycanın imicinə ağır zərbə vurub. Mütərəqqi fikirli insan olan Rüstəm İbrahimbəyov bunlardan çox böyük narahatlıq keçirir.
- Azərbaycana nə vaxt qayıdır?
- Dəqiq tarix söyləmədi, amma yaxın vaxtlarda Bakıda olacaq. Hazırda ABŞ-dadır. Oradan Rusiyaya, sonra isə Azərbaycana gələcək.
İmdad ƏLİZADƏ