Sərdar Cəlaloğlu: “Siyasətçilərdə şizofrenik tiplərin olmasını demək onların arasında şizofrenik xəstələr olduğu anlamını vermir”

ADP sədri Sərdar Cəlaloğlu ilə müsahibəni təqdim edirik:

- Müsahibənizin birində demişiniz ki, Azərbaycan siyasətçilərinin çoxu şizofrenikdir. Bu iddianızı əsaslandıra bilərsiniz?

- Mən elə söz deməmişəm. Mən sadəcə şizofrenik tiplər haqqında elmi məlumat vermişəm. Psixologiyada şizofrenik tip deyilən anlayış var. Müsahibədə ona elmi-məntiqi diaqnostikanı izah etmişəm. Sonrada demişəm ki, məsələn, insanların elə xarici görünüşü var ki, bu psixologiyada ayrı-ayrı ruhi xəstələrin klasifikasiya olunmasında istifadə edilir. Məsələn, Antropologiya elmində qabarıq almacıqların olması, qulaqların iri olması, başın iri olması, gözlərin həddən artıq çuxura düşməsi, ağzın dairəvi formada olması və s psixologiyada ayrı-ayrı şizofrenik tiplər kimi izah olunur. Bu zaman mənə müxalifətdə siyasətçilərin şizofrenik tipə aid olub-olmadığı haqda sual verilib. Nəzərə alın ki, şizofrenik tipə aid olmaq o mənanı vermir ki, həmin şəxs şizofrenik xəstədir. Söhbət ondan gedir ki, adətən şizofrenik xəstəliyi bu cür adamların sırasından daha çox meydana gəlir. Məsələn, bizdə genetik meylilik deyimi var. Amma genetik meyllilik o anlamı vermir ki, bu gendən olan bütün insanlar o xəstəliyə tutulmalıdır. Genetik meyllilik odur ki, bu genə aid olan insanlar içərisində bu cür xəstəliklərin meydana çıxma intensivliyi daha çox olur. Başqa sözlə, şizofrenik tip o deməkdir ki, şizofrenik xəstələri bu tip arasında daha çox çıxır. Demişəm ki, Azərbaycan siyasətində olan bəzi liderlər şizofrenik tipə aiddir. Ancaq bu o demək deyil ki, həmin siyasətçilər şizofrenikdir. Məndən elmi müsahibə almaq istəyiblər, mən də bunu elmi şəkildə çatdırmaq istəmişəm. Məni xüsusi bir şey kəşf etməmişəm. Bu fikirlər və məntiq mənim şəxsimdən deyil, psixologiya elmindən irəli gəlir.

- Davam edin...

- Məsələn, Lambrozo cinayətlərin insan antropologiyası ilə əlaqələrini öyrənən alim idi. Sübut etmişdi ki, kəllə qapağının qalınlığı çox olan insanlar daha çox cinayətə meyl edir. Hətta qeyd etmişəm ki, bizdə qanmaz adama qabırğası qalın deyirlər. Lakin Lambrozo sübut etmişdi ki, cinayətə meyllilik qabırğanın qalınlığı ilə deyil, kəllə qapağının qalınlığı ilə bağlıdır. Mən Antropologiya elminin bəzi nüanslarını açıqlamışam. Çünki suallar mənim ixtisasımla bağlı idi. Lambrozo özü də, məhkəmə-tibb eksperti olub. Ciddi elmi-təhqiqatları olub. Onun antropoloji nəzəriyyəsi o qədər qəbul edilməsə də, irəli sürdüyü fikirlərdə inandırıcı faktlar var. Mən də onun nəzəriyyəsindən bəzi misallar və nümunələr gətirmişəm. Hesab edirəm ki, müsahibəmi siyasiləşdirmək doğru deyil.

- Siz siyasətçilərə şizofrenikdir deyirsiniz və hesab edirsiniz ki, bunu siyasiləşdirmək qüsurludur?

-Mən demişəm ki, psixologiyada psixoloji tiplər var və bu tiplərə də uyğun insanlar var. Eləcədə siyasətçilər. Biz hamımız psixoloji tiplərə aidik. İnsanların bio-ritmlərinin, bio-potensialının təsdiq edilməsinin müxtəlif yolları var. Onlardan psixologiyada psixi xəstəliklərin adı ilə adlanan

tiplərdir. Odur ki, müxalifətdə şizofrenik tiplər var demək, o anlamı vermir ki, müxalifət siyasətçiləri arasında şizofrenik xəstələr var.

- Azərbaycan siyasətində ən səbirli, sakit və hazırcavab şəxslərdən biri İsa Qəmbərdir. Sizcə, İsa bəy hansı tipə aiddir?

- Mən burada elmi məlumat verirəm, siyasətçiləri fərdi qiymətləndirmirəm. Məsələn, mən sizə birləşmə reaksiyası haqqında məlumat verirəm. Dünyada 1milyarddan çox birləşmə reaksiyası var. Hər birini sizə demirəm ki. Əksinə, birləşmə reaksiyasının özünün mahiyyətini izah etməyə çalışıram. Elmdə əsas mahiyyətdir. Əgər sən bu mahiyyəti mənimsəyə bilirsənsə, bu zaman özün müstəqil şəkildə kimin hansı tipə aid olduğunu müəyyən edə bilərsən. Elə mənim tipimi də. Hippokrat həkim haqqında obraz yaradıb. Həkimin yerişi, duruşu, boyu, baxışı və s barədə. Götürüb onun həkim obrazını qələmlə çəksəniz İbni Sinanın əllərdə olan mövcud portreti alınar. Hippokrata görə, həkim qartal kimi çatma qaş, iti gözlü, ilan kimi düz bədənli, yerişi iti qadın kimi incə və s. Bu peşənin xüsusiyyətinə uyğun olaraq antropoloji təsəvvürünü ortaya qoyur. Hər adam həkim olmaz. Siz heç 200 kiloqram ağırlığında müəllim görmüşünüz? Kobud bədənə, iri əllərə, iri qulaqlara malik həkim görmüşünüz? Həkimlik və müəllimlik peşəsini seçən insanların ümumi xarakterinə baxanda görərsiniz ki, onlar antropoloji tip olaraq incə tiplərdir. İqtisadi və hərbi peşəni seçən şəxslərdə isə kobud antropoloji elementlər qabarıq özünü göstərir.

- Bəs siyasi...

- Baxır siyasətçi kimdir. Stalin və Hitlerin psixoloji tipinə dair böyük psixoloq alimlər tərəfindən elmi kitablar yazılıb. Sübut edilib ki, Hitler və Stalində ağır şizofrenik xəstəliklər olub. Məşhur nevropatoloq Bexterin müəmmalı öldürülməsi də, onun Stalində şizofrenik xəstəliyinin olması haqda diaqnoz qoyması göstərilir. Eləcədə Hitlerin davranışlarını tədqiq edən alimlər sübut ediblər ki, Adolfda üzə təzahür etməyən şizofrenik əlamətlər olub. Bəli, siyasətə gizlin ruhu xəstələr gələ bilər, bəşəriyyətə ziyan vura bilərlər. Kaliqula və Neronun vaxtındakı dövrü təhlil edəndə insan ağlına sığmır ki, belə şeylər ola bilərdimi? Ancaq tarixdə bunlar olub.

- Nurçu təriqətinə münasibətiniz necədir?

-Mən təriqət və məzhəblərin yanlış olduğunu, onların insanları doğru yoldan azdırdığını, islam dünyasını cəhalətdə və nadanlıqda qalmasını təmin etdiyini düşünürəm. İslam dünyasının xristian dünyası qarşısında gücsüz olmasının yeganə səbəbini təriqətlərdə görürəm. Odur ki, ardıcıl olaraq təriqət və məzhəblərin yanlış olduğunu, insanların yenidən doğru yola qayıtmasını, məzhəb və təriqətlərdən imtina etməsini təbliğ edirəm. Odur ki, mənim nurçuluğa müsbət münasibətim ola bilməz.

-Nurçu təriqətinin fəlsəfəsi, dünyagörüşü nədən ibarətdir?

- Əslində bu istiqamətdə mənim marağına səbəb olan bir neçə təriqətlər var ki, onlar haqqında daima danışmışam. Bunlardan biri də nurçuluqdur. Əslinə baxsanız islamda nurçuluq masonluqdur. Masonların da, dünyada etdiyi cinayətlərin, pərdə arxası oyunların terrorçuların etdiyindən yeganə fərqi odur ki, elmə əsaslanırlar. Masonlarda düşünür ki, ümumtəhsil

sistemində həqiqi insan yetişə bilməz, odur ki, xüsusi və ya qapalı təhsil sistemi yradılmalı, həmin şəxslər burada ayrı həyat tərzi yaşamalı və yerdə qalan insanları idarə etməlidir. Fətullah Gülənin də apardığı siyasətin və işlərin mahiyyəti bundan ibarətdir. Əslində Gülənin apardığı hərəkatı islamda IX əsrdə olub. Nurçuluq əslində Əxilik hərəkatının yeni dövrdə ki, təzahürüdür. İslamın əvvəlki tarixində əxilik hərəkatı olub. Əxi tərcümədən abi deməkdir. Halbuki indi Gülən tərəfdarları abilik prinsipi əsasında təşkilatlanıb. Bu faktiki əxilik hərəkatıdır. XII əsrdə Osmanlı imperiyası yarandıqdan sonra əxilik hərəkatı iki hissəyə parçalandı. Bir hissə Osmanlının sərhədlərini qorumağa keçdi və buradan hərbçi əxilər meydana gəldi. Digər qrup isə Osmanlıda ticarət, maliyyə sistemini götürdülər və iqtisadiyyatla məşğul oldu. Eynilə sonradan Gülən öz adamlarını ya ordu, ya da iqtisadi rıçaqlar olan mühüm strukturlarda yerləşdirdi. Gülən hərəkatı əxilik hərəkatının yeni forması və təkrarıdır. Əxilik sonradan sıradan çıxdı və qısa müddət sonra başqa adla Avropada meydana çıxdı ki, bu da masonluq idi. Siz abilik sistemi ilə masonluq prinsipinə baxsanız görəcəksiniz ki, mahiyyət baxımından eyni şeylərdir. Mason sistemində də subay oğlanların yaşadığı vahid evlər olur, oğlanları özbaşına buraxmırlar ki, istədiyi xanımla evlənsin, masonlar da bir-birini tanıyır, amma başqaları onları tanımır, qardaşlıq əlaqələri var və s. Fətullah Gülən əslində islamdan xristianlığa keçən hərəkatı yenidən islama qaytaran hərəkata rəhbərlik edib. Bu hərəkatın ən təhlükəli tərəfi ondan ibarətdir ki, onlar quranı yanlış şərh edirlər. Bunlar nə sünnidir, nə də şiədir. Məsələn, Fətullah Gülən özünü Mehdi Zaman elan edib. Halbuki, bu tezisi şiəlik müdafiə edir. Digər tərəfdən, özünün bəzi nüans və davranışları, qaydaları sünilik təriqətindəndir. Belə sintez yaradıb və bu da imkan verib ki, onlar daha geniş dairədə fəaliyyət göstərsin. Məsələn, Nursi deyirdi ki, quranda bəzi ayələr mənə işarə edir. Bunu da, adlarını tez-tez dəyişib qurana uyğunlaşdırmaqla sübut etməyə çalışırdı.

- Fətullah Gülən və ya ona yaxın şəxslərlə görüşmüsünüzmü?

- Bir dəfə məni məclisə dəvət etmişdilər. Burada vaxtı ilə Naxçıvanda uzun illər rəhbər vəzifədə işləyən dostumla masanın bir tərəfində durub söhbət edirdik. Söhbət əsnasında kənarda duran iki şəxsdən biri müdaxilə edərək mənimlə danışan dostumdan bizi tanış edə biləcəyini soruşdu. Dostum da məni təqdim edərək bildirdi ki, Sərdar Cəlaloğludur, siyasətçidir, partiya sədridir və s. Bu zaman həmin şəxs dostumdan xahiş etdi ki, Sərdar bəylə bizim gizli görüşümüzü təşkil etsin. Həmin şəxs Gülənin Bakıdakı məktəblərdən birinin direktoru idi. Sonradan bəlli oldu ki, onun yanındakı şəxs isə Gülənin buradakı şeyxi, məktəblərə baxan şəxsdir. Belə söhbət oldu, sonra biz ayrıldıq. Bu zaman dostum mənə dedi ki, onlarla konfidensal görüşməyimi, ümumiyyətlə kontakt saxlamağı məsləhət görmür. Məndə bununla razılaşdım. Gülən hərəkatı təxminən 3 il əvvəl mənə təklif etmişdi ki, görüşək.

Nemət Orucov

gundemxeber.az