Gənc ictimai fəal Elvin Məmiyev Azərbaycan Avropa Şurası əlaqələrindən və qurumdakı fəaliyyətin perspektivi barsində söhbət açdı.

- Elvin bəy, son dövrlər Azərbaycanla Avropa Şurasının münasibətləri daha çox müzakirə olunur. Hətta Azərbaycanın bu qurumu tərk edəcəyilə bağlı da məlumatlar yayılır

– Azərbaycan 2001-ci ildə Avropa Şurasının üzvüdür və həmin ildən qurumun parlament assambleyasında (AŞPA) və Avropa İnsan Hüquqları Məhkəməsində (AİHM) iştirak etməkdədir. Azərbaycanın AŞ-dakı 16 illik tarixində, qurumun digər üzv ölkələri kimi insan haqları və demokratik qurumların fəaliyyətilə bağlı dəfələrlə tənqidlərlə üzləşib. Bu dövrdə təşkilatın daxilində və ətrafında Azərbaycanın lobbiçilik fəaliyyətinə dair iddialar getdikcə şişərək, Azərbaycan Camaşırxanası adlı hesabat və AŞPA-da digər korrupsiya iddialarına dair müstəqil xarici istintaq qurumunun yaradılması ilə nəticələnib. Azərbaycanın AŞPA üzvlərinə rüşvət verərək onların səslərini və dəstəyini satın alması iddiaları təşkilatda gərginlik və ciddi reaksiyaya səbəb olub və yaranan narahatlıq Azərbaycan ətrafında bütün müzakirələrə öz təsirini göstərib. Buna görə də Azərbaycanın Avropa Şurasından çıxması və ya çıxarılmasıyla bağlı söz-söhbət yaranıb. Mən bu vəziyyətin nə ilə nəticələnməsindən asılı olmayaraq Avropa Şurasında Azərbaycanın olmasının vacibliyini vurğulamaq istərdim. Çünki, Azərbaycanın çoxlu sayda problemləri var və çağdaş dünyada biz demokratik ölkə imicini yaratmalıyıq. Qarabağ məsələsini həll etmək istəyiriksə bizə beynəlxalq dəstək lazımdır. Biz Avropa Şurasını tərk edəcəyiksə bu Ermənistana imkan verəcək ki, orada onlar bizim əlehimizə sözlərini desinlər. Biz demokratik imic yaratmalıyıq və bunun üçün demokratik təsisatlara dəstək verməliyik.

- Elvin bəy, sizcə Azərbaycanın rəsmi dairələri qurumun tərkibində qalmaqda maraqlıdırmı?

- Məncə heç bir hökumət bu cür beynəlxalq imici olan strukturun tərkibindən çıxmağa maraqlı olmaz. Sadəcə bəzi hökumət məmurları Avropa Şurasından çıxaralacağı ehtimalından öncədən bu cür bəyanatlar səsləndirir. Azərbaycanın AŞPA-da nümayəndə heyətinin sədri Səməd Seyidov Azərbaycanın potensial olaraq AŞ-dan çıxarıldığı halda "vallah, dünya da dağılmayacaq, problem də olmayacaq" deyib. Digər tərəfdən isə cənab Seyidov bildirib ki, "Azərbaycanın Avropa Şurasından çıxmaq ehtimalı yoxdur, sıfır dərəcəsindədir". Bu o deməkdir ki, biz həqiqətən Avropa Şurasından çıxmaq istəmirik. Bu heç bizə lazım da deyil. Sadəcə üzərimizə götürdüyümüz öhdəlikləri yerinə yetirməliyik. Bu öhdəliklər isə əsasən siyasi məhbuslarla və vətəndaş cəmiyyətinin vəziyyətilə bağlıdır. İlqar Məmmədovun həbsi ilə bağlı Azərbaycana xüsusi tələb var. Eyni zamanada Avropa İnsan Hüquqları Məhkəməsinin qərarlarının yerinə yetirilməməsilə bağlı Azərbaycandan tələblər edilib. Mənim fikrimcə Azərbaycan bu yöndə müəyyən addımlar atsa beynəlxalq arenada situasiyamıza müsbət təsir edəcək.

Rahib Bəxtiyarov
gundemxeber.az