Nəsimi Məmmədli : “Gündəm Xəbər” qəzetinin “Azərbaycan” Nəşriyyatından çıxarıması heç də yaxşı niyyətdən xəbər vermir”

Müstəqil siyasətçi, “Sivil Toplum” Platformasının siyasi eksperti Nəsimi Məmmədli ilə müsahibəni təqdim edirik.

- Nəsimi bəy, seçkilər elan edilib, partiyalar seçkilərlə bağlı mövqelərini dəqiqləşdirir, amma azad mətbuatla bağlı problemlər durur. “Gündəm Xəbər” qəzeti Azərbaycan Nəşriyyatından çıxarılıb. Bu baxımdan durumu necə qiymətləndirirsiniz?

Ölkədə növbədənkənar prezident seçkilərində partiyaların sərbəst iştirakını əngəlləyən üç əsas amil mövcuddur. Birincisi, qanunvericilik və praktik baxımından əlverişli seçki mühitinin olmaması, ikincisi, maliyyənin yoxluğu, digəri isə növbədənkənar seçkiyə partiyaların hazırlıqsız yaxalanmalarıdır. Təbii ki partiyalar bu istiqamətdə artıq öz qərarlarını elan edir və atacaqları addımlar tədricən bəlli olur. Ancaq azad medianın durumu ilə bağlı problemlərin həlli perspektivi görünmür. Bu istiqamətdə durum olduqca pis qiymətləndirilə bilər. Məhz seçki öncəsi azad media mühitini genişləndirmək əvəzinə, onun daha da qapadılması, habelə “Gündəm Xəbər” qəzetinin Azərbaycan Nəşriyyatından çıxarıması heç də yaxşı niyyətdən xəbər vermir və cəmiyyət tərəfindən qınanmalıdır.

- Hətta azacıq tənqidə üstünlük verən sayt və qəzetlərə qarşı belə addımlar hakimiyyətin media siyasətini idarə edən şəxslərin tənqidə dözümsüzlüyünün təzahürü ola bilərmi?

- Əslində KİV-ə yönəlik basqılar xeyli müddətdir müxtəlif səviyyələrdə davam edirdi. Əgər öncəki illərdə mediaya istiqamətlənən bu basqılarda bir pərakəndilik müşahidə edilirdisə, təəssüf ki artıq sistemli xarakter almaqdadır. Yanaşma onu göstərir ki hökumət üzvləri şəffaflıqdan, hesabatlılıqdan, tənqidlərdən qaçmaq üçün çarəni media üzərinə basqılarda görür. Bu hal dövlətin informasiya təhlükəsizliyini təhdid etməklə yanaşı, məmur özbaşınalığına, rüşvətxorluğa və korrupsiyaya qarşı mübarizəyə əngəl törətmək məqsədi güdür. Hakimiyyətin media siyasətini idarə edən şəxslər bu neqativ halların qarşısını almırsa, ya özləri bunda maraqlıdır, ya da artıq media siyasətini idarə etməyi bacarmırlar.

- Uzun illərdir siyasətdəsiniz. Media ilə bağlı hansı addımların atılmasını vacib hesab edirsiniz, ümumiyyətlə mətbuatla bağlı siyasətin dəyişməsi lazımdırmı?

Şübhəsiz ki, azad media olmayan cəmiyyətdə sosial-siyasi inkişafdan, hüquqlara etibarlı təminatdan, azad bazar iqtisadiyyatından, cəmiyyətin demokratikləşməsindən danışmaq yersizdir. Azad media özü-özlüyündə çox geniş ictimai nəzarət platformasıdır və bu platformadan səmərəli istifadə edilməlidir. KİV-ın maddi təminatı üçün azad reklam bazarı formalaşmalı, dövlət tərəfindən medianın himayəsi minimuma endirilməlidir. Həmçinin, diffomasiya haqqında qanunun qəbulu, jurnalistlərin təqibinə son qoyulması, qəzetlərin sərbəst nəşrinə və yayılmasına imkan yaradılması, sosial mediaya inzibati müdaxilələrə son qoyulması, televiziya yayınlarında dövlət monopoliyasının götürülməsi doğru yanaşma olardı.

- Məmurlar hansı səbəblərdən tənqidə mənfi yanaşır?

Qanunsuz əməllər törədən, hüquq pozmalar edən istənilən şəxs və qurumlar azad medianı özü üçün təhlükə sayır və ona rəqibdir. Öz qanunsuzluqlarının ictimailəşməsindən çəkinən məmurlar, nöqsanlarının açılıb göstərilməsini istəməyən idarəçilər bütün vasitələrlə azad media müstəvisini qapatmağa çalışır və təəssüf ki həm də artıq ona nail olublar.

Nemət