ABŞ-da yaşayan güneyli mühacir, Güney Azərbaycan Milli Azadlıq Cəbhəsinin sözçüsü Əhməd Obalı “Media forum” saytının suallarını cavablandırıb.

- Bu günlərdə Güney Azərbaycan Milli Azadlıq Cəbhəsinin və Dünya Azərbaycanlıları Əlaqələndirmə Şurasının Bakıdakı ofisindən çıxarılması xəbəri yayıldı. Dünya Azərbaycanlıları Əlaqələndirmə Şurasının sədri Qulamrza Səbri Təbrizi Milli Elmlər Akademiyasının balansında olan ofisin İranın təkidi ilə onlardan alındığını bildirir. Siz nə deyə bilərsiniz bu barədə?

- Mənim dəqiq faktım yoxdur. Səbri bəylə telefonla danışmışam, mənə də dedi ki, ola bilsin, ofis İranın istəyi ilə bağlanıb. Onun da hər hansı faktı yoxdur. Təxminimiz budur ki, bu, iki məsələdən uzaq ola bilməz. Birincisi, Səbri bəyin dediyi kimi, sifarişlə bağlanıb. O da ehtimal oluna bilər ki, mərkəzdə, bahalı yerdədir deyə bəzilərinin həmin ofisə ehtiyacı var. Səbri bəyi istəməyən bir-iki nəfər də vardı, eşitdiyimizə görə, onların da məsələdə rolu olub.

- Güney Azərbaycan Milli Azadlıq Cəbhəsi də həmin ofisdə fəaliyyət göstərirdi?

- Xeyr. Amma Qulamrza Səbri Təbrizi həm də həmin təşkilatın sədridir.

- Bəs sizin təşkilat harada toplaşırdı, harada fəaliyyət göstərirdi?

- Güney Azərbaycanı Milli Azadlıq Cəbhəsinin Bakıda aktiv mərkəzi yoxdur. Bunu istəmirik də. Çünki Azərbaycan hakimiyyətini pis vəziyyətdə qoymaq olmaz, onun İranla münasibətlərini nəzərə alırıq. Heydər Əliyevin təşəbbüsü ilə Dünya Azərbaycanlıları Əlaqələndirmə Şurası yaradılmışdı, o otaqlar da həmin quruma verilmişdi. Görünür, artıq bu şuraya ehtiyac görülmür. Mən güney azərbaycanlıların heç birisinin Bakıda incidilməsini eşitməmişəm. Bizə orada hər hansı bir basqı yoxdur. Ona görə də məsələni ciddiləşdirmək istəmirik. Azərbaycan hökuməti hər hansı güney təşkilatını bağlasa və bu da mətbuata işıqlansa, məsələ güneylə quzey arasında ixtilaf yarada bilər. Ofisin bağlanması kiçik məsələdir və bunun nə GAMAC-ın fəaliyyətinə, nə Azərbaycan hakimiyyətinin GAMAC-a münasibətinə dəxli yoxdur. Ofis Əlaqələndirmə Şurasının olduğuna görə kimlərsə qərara gəlib ki, Heydər Əliyev çoxdan rəhmətə gedib, biz ofisi ələ keçirə bilərik. Ayrı cür şərh edə bilmirəm.

- Dünya Azərbaycanlıları Əlaqələndirmə Şurasında təmsil olunursunuzmu?

- Xeyr. Mən Azərbaycan hakimiyyətinin diaspor məsələsinə qarışmasına həmişə müxalif olmuşam. Çünki bu müdaxilə diaspor işinin keyfiyyətini aşağı salır. Diaspor işi diasporun əlində olmalıdır.

- Amerikada yaşayırsınız. Diaspor nümayəndəsi kimi Azərbaycanda seçkiöncəsi durumu necə qiymətləndirirsiniz?

- Arzu edərdim ki, seçkidə rus faktoru güclənməsin, tarix boyu rus faktoru gücləndikcə bizim milli maraqlarımız ayaq altda qalıb. Azərbaycan çox strateji bir torpaqdır, önəmli bölgədədir. Ona görə Qərb, Amerika hər hansı fikir söyləyəndə Bakını incitmək istəmir. Fikirləşirlər ki, Azərbaycanın üstünə çox getsək, rus faktoru güclənə bilər. Amma Qərb ölkələri demokratik prinsiplərin tərəfdarıdır. Azad seçkilər isə bu prinsiplərin təməl daşıdır. Seçki adı ilə daimi bir stulda oturmaq da düzgün deyil. Müxalifətin də hüquqları qorunmalıdır. Bu gün Azərbaycan dəyişməsə, islahatlar aparılmasa, əlbəttə, düşmənlər sevinəcək. Azərbaycanın gələcəyi üçün güclü müxalifət də lazımdır. Müxalifətlə iqtidar arasında ciddi dialoq gedərsə, bu, məmləkətin xeyrinədir. Arzu edirik nə müxalifət, nə iqtidar rus oyununa girməsin.

- Yeri gəlmişkən, Azərbaycan müxalifətinin birləşdiyi Demokratik Qüvvələrin Milli Şurasını Rusiyaya bağlayırlar...

- Mən inanmıram ki, İsa Qəmbər və ya oradakı başqa müxalifətçi gedib rusun oyununa qoşulsun.

- Rüstəm İbrahimbəyovun Azərbaycan müxalifətinin birləşdiyi Milli Şuranın prezidentliyə namizədi olmasını necə dəyərləndirirsiniz?

- Rüstəm İbrahimbəyovu qiyabi olaraq, intellektual insan kimi tanıyıram. Sadəcə olaraq Rusiyada yaşayan hər hansı müxalifətçinin fəaliyyəti İranda yaşayan müxalifətçininki kimi narahatlıq doğura bilər. Azərbaycanın müxalifəti Azərbaycanda olmalıdır. Yer vermirlərsə, ən azından Qərb ölkələrinə üz tuta bilər. Mən Rüstəm İbrahimbəyovun Rusiyaya bağlı olduğunu demək istəmirəm. Amma hər halda arzu edərdim özünü daha azad ölkələrdə görsün.