Bəyanatda deyilir:

“Siyasi məhbus Saleh Rüstəmli haqsız yerə həbsdə saxlanılmasına etiraz olaraq artıq 23 gündür aclıq aksiyası keçirir. Onun sağlıq durumu artıq kritikdir. Penitensiar Xidmətin həkimləri də təsdiq edib ki, Saleh Rüstəmlinin orqanizmi artıq tükənib. Ombudsman özü Saleh Rüstəmli ilə telefonla danışaraq, ona vəziyyətinin kritik olduğu barədə həkimlərin rəyini çatdırıb, aksiyanı dayandırmağı xahiş edib, lakin Saleh Rüstəmli aksiyanı dayandırmayacağını bildirib. Beləliklə, Saleh Rüstəmlinin həyatı real təhlükə altındadır.

Saleh Rüstəmli AXC hakimiyyəti zamanı Gədəbəy rayonunun icra hakimiyyəti başçısı vəzifəsində işləyib. Rayonun Ermənistanın təcavüzündən qorunmasında müstəsna xidmət göstərib. Başkənd qəsəbəsinin geri alınması əməliyyatına rəhbərlik edib. İcra hakimiyyətinin başçısı ola-ola əlində silah vətən torpaqlarının qorunması uğrunda döyüşüb, birinci Qarabağ savaşının qazisidir.

Saleh Rüstəmli 2018-ci ildə şərlənərək həbs edilib. Onu guya AXCP-ni maliyyələşdirməklə çirkli pullar yumaqda ittiham ediblər. Gerçəkdə isə Saleh Rüstəmli bir neçə il ərzində siyasi məhbus ailələrinə kiçik məbləğlərdə maddi yardım göstərib və buna görə də həbs olunub. Onun həbsi hətta irəli sürülən rəsmi ittihamla da qanunsuzdur, çünki Saleh Rüstəmli Azərbaycanda gəlir gətirən heç bir fəaliyyətlə məşğul olmayıb.

Saleh Rüstəmlinin qanunsuz həbsdən azad edilməsi bütövlükdə Azərbaycan cəmiyyətinin mövqeyidir. Ötən 23 gün ərzində Saleh Rüstəmliyə dəstək məqsədilə Azərbaycanın öz sözünü deyə bilən əksər ictimai-siyasi xadimi açıqlamalar verib, çağırış edib. Bu müddətdə müxtəlif QHT-lər, gənclər təşkilatları, ziyalılar, siyasi partiyalar ayrı-ayrılıqda və ya birlikdə bəyanat verərək, ölkə rəhbərliyinə müraciət edərək Saleh Rüstəmlinin haqq etdiyi azadlığa buraxılmasını istəyib.

Milli Şura bəyan edir ki, Saleh Rüstəmlinin həyatına yaranan təhlükəyə görə birbaşa ölkə başçısı İlham Əliyev məsuliyyət daşıyır. Hətta Azərbaycana qarşı cinayətdə iştirak edən və əsir götürülən erməni hərbçilərinə də humanistlik göstərib, onları geri qaytaran İlham Əliyev hökuməti Azərbaycan torpaqları uğrunda döyüşmüş Saleh Rüstəmlini sırf siyasi məhbus ailələrinə yardım etdiyi üçün 4 ilə yaxındır haqsız yerə həbsdə saxlayır və indi də onun öz həyatı bahasına ədaləti bərpa etmək istəyinə heç bir reaksiya vermədən laqeyd yanaşır.

Milli Şura Saleh Rüstəmlinin həyatına yaranan təhlükədən dərin narahatlığını bir daha vurğulayır, ondan öz sağlamlığını bərpa olunmayacaq həddə pisləşdirməməyi xahiş edir. Milli Şura Azərbaycan hakimiyyətini bu məsələdə öz məsuliyyətini nəhayət dərk etməyə, günahsız, üstəlik Vətən və millət qarşısında böyük xidmətləri olan bir azərbaycanlını ölümə tərk etməyin cəzasının ağırlığını anlamağa çağırır, Saleh Rüstəmlinin bir an gec olmadan azadlığa buraxılmasını tələb edir.

Milli Şura beynəlxalq aləmi və Azərbaycan xalqını Saleh Rüstəmlinin haqq etdiyi azadlığa buraxılması naminə öz səsini daha ucadan duyurmağa, İlham Əliyev hakimiyyətinə daha effektiv tərzdə və kütləviliklə təsir göstərməyə çağırır.”

GÜNDƏMXƏBƏR.AZ